ऑडी अमेरिकेत उभारणार 4 अब्ज डॉलरचा कारखाना, 4,500 नोकऱ्यांची अपेक्षा

जर्मनीची लक्झरी कार कंपनी ऑडी अमेरिकेतील आपले अस्तित्व वाढवण्यासाठी मोठी गुंतवणूक करण्याच्या तयारीत आहे. कंपनी जॉर्जिया राज्यात सुमारे 4 अब्ज डॉलर गुंतवून नवा कार प्रोडक्शन प्लांट उभारण्याची योजना आखत आहे. या कारखान्याची क्षमता वर्षाला 2,00,000 वाहने तयार करण्याची असेल आणि त्यातून सुमारे 4,500 नोकऱ्या निर्माण होतील, अशी अपेक्षा आहे.

अमेरिकेचे अध्यक्ष डोनाल्ड ट्रम्प यांच्या आयात शुल्कासंबंधीच्या धोरणांच्या पार्श्वभूमीवर ऑडीचा हा निर्णय महत्त्वाचा मानला जात आहे.

हा प्रकल्प जॉर्जियातील पीच काउंटीमध्ये, मॅकॉन शहराजवळ असलेल्या मिडल जॉर्जिया मेगासाइट येथे उभारण्याची योजना आहे. जागा निवडताना पुरवठादारांचे जाळे, वाहतुकीच्या सोयी, कुशल कामगार मिळण्याची शक्यता आणि पुढे कारखान्याचा विस्तार करता येईल का, या सगळ्या गोष्टी विचारात घेण्यात आल्या आहेत.

कंपनीच्या म्हणण्यानुसार 2027 मध्ये सुरुवातीचे काम सुरू होण्याची अपेक्षा आहे. प्रत्यक्ष वाहनांचे मोठ्या प्रमाणावरील प्रोडक्शन 2030 च्या दशकाच्या सुरुवातीला सुरू होऊ शकते. जॉर्जिया सरकारने मात्र पूर्ण प्रोडक्शन सुरू होण्याचे लक्ष्य 2031 सांगितले आहे.

उत्तर अमेरिकेतील ग्राहकांचा विचार करून या कारखान्यात मोठ्या आणि प्रीमियम SUV तयार करण्याची योजना आहे. ऑडी Q7, Q8 आणि Q9 या मॉडेल्सचे प्रोडक्शन इथे होऊ शकते. मात्र कंपनीने मॉडेल्सची अंतिम यादी अजून अधिकृतपणे जाहीर केलेली नाही. गाड्या अमेरिकेतच तयार झाल्या तर अमेरिकन बाजारात वाहनांचा पुरवठा अधिक सुरळीत होईल आणि आयात प्रक्रियेवरचे अवलंबित्व कमी होण्यास मदत होऊ शकते.

अमेरिकेने आयात होणाऱ्या कार आणि ऑटो पार्ट्सवर अतिरिक्त शुल्क लावल्यामुळे परदेशी कंपन्यांचा आयातीचा खर्च वाढू शकतो. अमेरिकेत कार तयार केल्यास ऑडीला या शुल्काचा फटका कमी करता येईल, आंतरराष्ट्रीय पुरवठा साखळीवरचे अवलंबित्व घटवता येईल आणि चलनातील चढ-उतारांचा धोका सांभाळता येईल. तरीही जर्मनी आणि युरोपमधील प्रोडक्शन व इंजिनिअरिंगचे महत्त्व कायम राहील, असे कंपनीने स्पष्ट केले आहे.

जॉर्जियामध्ये किआ आणि ह्युंदाईसारख्या कंपन्यांचे प्रोडक्शन नेटवर्क आधीपासूनच आहे. सवाना आणि ब्रन्सविक येथील बंदरांमुळे गाड्यांची वाहतूकही सोपी होते. ऑडीचा नवा प्रकल्प सुरू झाल्यास स्थानिक पुरवठादार, लॉजिस्टिक्स आणि सेवा क्षेत्रातही रोजगाराच्या संधी निर्माण होऊ शकतात. त्यामुळे हा प्रकल्प फक्त ऑडीसाठीच नाही, तर अमेरिकेतील ऑटोमोबाईल उद्योगासाठीही महत्त्वाचा ठरू शकतो.