टपाल विभागाची ग्रामीण डाक सेवक भरतीची पहिली मेरिट लिस्ट जाहीर, २३,७५७ पदे भरली जाणार

इंडिया पोस्टने ग्रामीण डाक सेवक (GDS) भरती २०२६ ची पहिली मेरिट लिस्ट indiapostgdsonline.gov.in या वेबसाइटवर जाहीर केली आहे. या भरतीतून एकूण २३,७५७ रिक्त पदे भरली जाणार आहेत. या भरतीसाठी कोणतीही लेखी परीक्षा किंवा मुलाखत घेतली जात नाही. ही सरकारी नोकरी विशेषतः १० वी पास उमेदवारांसाठी आहे.

उमेदवाराला आपल्या राज्याची किंवा सर्कलची यादी वेबसाइटवरून डाऊनलोड करता येते. त्यात Ctrl+F वापरून रजिस्ट्रेशन नंबर किंवा नाव शोधता येते आणि मिळालेले पद, डिव्हिजन व १० वीच्या टक्केवारीची माहिती दिसते. याबद्दलचे सर्व अपडेट्स iapost.gov.in/gdsonlineengagement या अधिकृत वेबसाइटवरही पाहता येतात.

यादीत नाव आल्यावरच खरी प्रक्रिया सुरू होते. माहितीच्या अभावामुळे अनेक उमेदवारांना पुढचे टप्पे समजत नाहीत आणि एका छोट्या चुकीमुळे किंवा कागदपत्रांतील गडबडीमुळे निवड झालेल्यांचीही उमेदवारी रद्द केली जाते. म्हणून आनंद साजरा करण्याआधी पुढच्या तयारीला लागणे गरजेचे आहे.

निवड झालेल्या उमेदवारांना सर्व मूळ कागदपत्रांसह संबंधित विभागीय कार्यालयात डॉक्युमेंट व्हेरिफिकेशन करून घ्यावे लागेल. यादीत प्रत्येकाच्या नावापुढे डिव्हिजनल हेडचे नाव आणि व्हेरिफिकेशनची अंतिम तारीख लिहिलेली असते. नोंदणीकृत मोबाईल नंबर आणि ईमेलवरही मेसेज येतो. पहिली यादी आल्यानंतर ओरिजिनल डॉक्युमेंट्ससह रिपोर्ट करण्यासाठी १० ते १५ दिवसांचा वेळ मिळतो.

या फेरीत अर्जात भरलेले गुण आणि माहिती खऱ्या मार्कशीट व प्रमाणपत्रांशी ताडून पाहिली जाते. सर्व कागदपत्रे अचूक निघाली तर प्रोव्हिजनल व्हेरिफिकेशन स्लिप दिली जाते.

सोबत प्रत्येक ओरिजिनलच्या २ झेरॉक्स कॉपी न्याव्यात. यात १० वीची मार्कशीट आणि बोर्ड सर्टिफिकेट, जात प्रमाणपत्र (ओबीसी, एससी, एसटी, ईडब्ल्यूएससाठी केंद्र सरकारच्या फॉरमॅटनुसार), पीडब्ल्यूडी, ओळखपत्र (आधार कार्ड, पॅन कार्ड किंवा वोटर आयडी), निवास प्रमाणपत्र, कॉम्प्युटर नॉलेज सर्टिफिकेट आणि १० वीत शिकलेल्या स्थानिक भाषेचे ज्ञान दाखवणारे प्रमाणपत्र यांचा समावेश आहे. कॉम्प्युटर विषय १० वीत असल्यास वेगळ्या सर्टिफिकेटमधून सूट मिळते. शिवाय नुकताच काढलेला पासपोर्ट साईज रंगीत फोटो किमान ६ ते ८ प्रती लागतो.

डाक विभागात दोनदा व्हेरिफिकेशन होते. पहिले (DV-1) ही प्राथमिक तपासणी असते आणि ते क्लिअर झाल्यावर काही दिवसांनी DV-2 साठी बोलावले जाते. त्यात १० वीची मार्कशीट खरी आहे का, हे पाहण्यासाठी ती संबंधित शिक्षण बोर्डाकडे पाठवली जाते. याच काळात पोलीस व्हेरिफिकेशनचा फॉर्म भरून घेतला जातो आणि कोणत्याही सरकारी हॉस्पिटलच्या मेडिकल ऑफिसरकडून (CMO) मेडिकल फिटनेस सर्टिफिकेट काढण्यास सांगितले जाते.

दोन्ही व्हेरिफिकेशन आणि मेडिकल क्लिअरन्स झाल्यावर उमेदवारांना ५ ते १५ दिवसांच्या प्रॅक्टिकल आणि सिस्टीम ट्रेनिंगसाठी पाठवले जाते. ब्रांच पोस्टमास्टर (BPM) पदासाठी निवड झाली असल्यास 'DARPAN' डिव्हाइस चालवणे, टपाल व्यवहार, खाते उघडणे आणि पैसे जमा-काढणी याचे डिजिटल प्रशिक्षण मिळते. ट्रेनिंगनंतर डाक विभाग अलॉटमेंट लेटर देतो आणि त्यानंतर लगेच वाटप केलेल्या ब्रांच पोस्ट ऑफिसमध्ये (BO) किंवा सब पोस्ट ऑफिसमध्ये (SO) जाऊन कार्यभार स्वीकारावा लागतो.