रेल्वेत नोकरीच्या आमिषाने चंद्रपुरातील तरुणाला गंडा; दोघांवर गुन्हा दाखल

रेल्वेत सरकारी नोकरी मिळवून देतो, असे आमिष दाखवून चंद्रपुरातील एका तरुणाची आर्थिक फसवणूक केल्याची घटना समोर आली आहे. या प्रकरणी चंद्रपूर शहर पोलीस ठाण्यात दोन जणांविरुद्ध गुन्हा दाखल झाला आहे. पोलीस वर्तुळात या फसवणुकीची चांगलीच चर्चा सुरू आहे.

फिर्यादी विशाल सुधाकर वानखेडे (वय ३७, रा. मच्छीमार्केट, बिनबा वार्ड, चंद्रपूर) हे खासगी नोकरी करून कुटुंबाचे पोट भरतात. त्यांच्या तक्रारीनुसार, नोव्हेंबर २०१४ मध्ये स्वराज शामरावजी भांदककर (रा. पठाणपुरा वार्ड, चंद्रपूर) याने त्यांना आणि त्यांच्या मित्राला माळी समाज भवन येथे गाठले. रेल्वे विभागात सरकारी नोकरी लावून देतो, असे त्याने सांगितले. आपला ओळखीचा आणि विश्वासातला माणूस नागपूर मनपात नोकरीला लागला आहे, असेही त्याने भासवले. या नोकरीसाठी एकूण ९ लाख रुपये खर्च येईल, असे तो म्हणाला.

फिर्यादींनी सुरुवातीला विचार करायला वेळ मागितला. नंतर जून २०१५ मध्ये चंद्रपूर शहरातील गांधी चौक परिसरात त्यांनी ३ लाख रुपये रोख स्वराज भांदककर याच्या हाती दिले. त्यानंतर भांदककर त्यांना नागपूर येथील हुडकेश्वर कार्यालयात घेऊन गेला आणि नितीन दामोधर दारूनकर या दुसऱ्या आरोपीशी ओळख करून दिली. उरलेले पैसे जॉइनिंग लेटर मिळाल्यानंतर द्या, असे दारूनकर याने सांगितले.

पुढे हे प्रकरण वर्षानुवर्षे लांबत गेले. २०१७ मध्ये जॉइनिंग लेटर तयार आहे, असे सांगून आरोपींनी फिर्यादी आणि त्यांच्या मित्राला नागपूरला बोलावले. तिथून त्यांना इंदूरला नेण्यात आले आणि आणखी ६ लाख रुपये रोख घेतले गेले. इंदूरला पोहोचल्यावर कोणतेही जॉइनिंग लेटर मिळाले नाही. मग मुंबईत गेटवे ऑफ इंडिया येथे नेण्यात आले, पण तिथेही फक्त तोंडी आश्वासनेच मिळाली.

फिर्यादींनी वारंवार पाठपुरावा केल्यावर आरोपींनी टाळाटाळ सुरू केली. दरम्यान आरोपींनी दिलेले धनादेश (चेक) स्पेलिंग मिस्टेक आणि इतर कारणांमुळे बँकेतून परत आले. पैसे मागितल्यावर आरोपी उडवाउडवीची उत्तरे देत राहिले. डिसेंबर २०२५ पर्यंत त्यांनी फक्त फोनपेच्या माध्यमातून २ लाख रुपये परत केले. उरलेले ७ लाख रुपये द्यायला मात्र त्यांनी स्पष्ट नकार दिला.

एवढेच नाही, तर "तुला जे करायचे ते कर, आमचे कोणीही काहीही बिघडवू शकत नाही," असे म्हणत आरोपींनी फिर्यादींना जिवे मारण्याची धमकी दिली, असा आरोप आहे. फसवणूक झाल्याचे लक्षात आल्यावर फिर्यादींनी चंद्रपूर शहर पोलीस ठाण्यात येऊन तक्रार दिली.

या तक्रारीवरून स्वराज शामरावजी भांदककर आणि नितीन दामोधर दारूनकर या दोघांविरुद्ध भारतीय न्याय संहिता (BNS) २०२३ च्या कलम ३१८(४) आणि ३(५) नुसार गुन्हा नोंदवण्यात आला आहे. पोलीस उपनिरीक्षक कृणाल रामटेके या प्रकरणाचा पुढील तपास करत आहेत.