पडिक्कलचे द्विशतक एका धावेने हुकले, अंपायरच्या निर्णयावर नाराजी

धडाडीचा तरुण फलंदाज देवदत्त पडिक्कलचे द्विशतक भारत अ आणि न्यूझीलंड अ यांच्यातील पहिल्या अनधिकृत कसोटी सामन्यात अवघ्या एका धावेने हुकले. तो भारत अ संघाकडून खेळत आहे. तिसऱ्या क्रमांकावर फलंदाजीला आलेल्या पडिक्कलने २४८ चेंडूंत १९९ धावा केल्या आणि मग तो पॅव्हेलियनमध्ये परतला. या खेळीत त्याने २४ चौकार आणि तीन षटकार मारले. मात्र ही खेळी मनाला चटका लावून गेली, कारण त्याला अंपायरच्या एका चुकीच्या निर्णयामुळे परतावे लागले.

लेग साइडकडे जाणाऱ्या चेंडूवर पडिक्कलला झेलबाद देण्यात आले. प्रत्यक्षात चेंडू त्याच्या बॅटला लागला नाही, असे दिसून येत आहे. त्याने लेग साइडला चेंडू फ्लिक करण्याचा प्रयत्न केला होता, पण चेंडू आधी त्याच्या पॅडला आदळला आणि मग यष्टीरक्षकाच्या हातात गेला. न्यूझीलंड अ च्या खेळाडूंनी थोडेसेच अपील केले होते, तरीही अंपायरने बोट वर केले. या निर्णयाने पडिक्कल आश्चर्यचकित झाला आणि त्याने निर्णयाला विरोधही दर्शवला, असे दिसून आले.

भारत अ आणि न्यूझीलंड अ यांच्यातील तीन सामन्यांच्या अनधिकृत कसोटी मालिकेत DRS नाही. त्यामुळे पडिक्कलला अंपायरच्या निर्णयाला आव्हान देता आले नाही. धक्का बसलेल्या आणि निराश झालेल्या पडिक्कलला पॅव्हेलियनमध्ये परतावे लागले. तो २६ वर्षांचा आहे. प्रथम श्रेणी क्रिकेटमधले हे त्याचे १२ वे शतक होते. भारतीय संघासाठी तो चार कसोटी सामने खेळला आहे आणि त्यात त्याने दोन शतके झळकावली आहेत.

बर्ट सटक्लिफ ओव्हल येथे सुरू असलेल्या या सामन्यात भारत अ संघाचा पहिला डाव न्यूझीलंड अ विरुद्ध अवघ्या ११३ धावांत आटोपला. त्याला उत्तर देताना न्यूझीलंड अ ने ३१७ धावा केल्या आणि भारत अ पहिल्या डावात २०४ धावांनी मागे पडला.

दुसऱ्या डावात भारत अ ची सुरुवात खराब झाली. १० धावांत दोन गडी गेले होते. तिथून पडिक्कल आणि साई सुदर्शन यांनी संघासाठी २१५ धावांची भर घातली. सुदर्शन ९१ धावा करून बाद झाला. कर्णधार ध्रुव जुरेलला फक्त दोन धावा करता आल्या. त्यानंतर पाचव्या विकेटसाठी पडिक्कलने यश राठोडच्या साथीने १४२ चेंडूंत १४२ धावा जोडल्या.

तिसऱ्या दिवशी चहापानाच्या विश्रांतीपर्यंत भारत अ ने ५ गडी गमावून ३७७ धावा केल्या होत्या. दुसऱ्या डावात संघाची आघाडी १७३ धावांवर पोहोचली आहे. पडिक्कलचे द्विशतक मात्र एका धावेने हुकले आणि त्याचीच चर्चा या सामन्यात जास्त होत आहे.