चंद्रपुरात दीक्षाभूमीकडे जाणारे रस्ते वाहनांसाठी बंद, 15 ऑक्टोबरपासून वाहतुकीत बदल
धम्मचक्र अनुप्रवर्तन सोहळ्यासाठी जिल्हा पोलीस अधीक्षक आयुष नोपानी यांनी चंद्रपूर शहरातील वाहतुकीत बदल करण्याचे आदेश दिले आहेत.
छायाचित्रे सत्यापित केलेली नाहीत
चंद्रपूर शहरातील दीक्षाभूमी येथे 15 आणि 16 ऑक्टोबर रोजी धम्मचक्र अनुप्रवर्तन सोहळा होणार आहे. या सोहळ्याला जिल्ह्यातील तसेच जिल्ह्याबाहेरील अनुयायी मोठ्या संख्येने येत असतात. त्या काळात वाहतुकीचा आणि रहदारीचा प्रश्न निर्माण होऊ नये आणि कायदा व सुव्यवस्था कायम राहावी, म्हणून दीक्षाभूमी मैदानाकडे जाणाऱ्या रहदारीच्या मार्गांवरची सर्व प्रकारची वाहतूक बंद ठेवणे गरजेचे आहे. त्यामुळे जिल्हा पोलीस अधीक्षक आयुष नोपानी यांनी शहरातील वाहतुकीत बदल करण्याचे आदेश काढले आहेत.
या आदेशानुसार हे बदल 15 ऑक्टोबरच्या सकाळी 8 वाजल्यापासून 17 ऑक्टोबरच्या सकाळी 8 वाजेपर्यंत लागू राहतील. ही अधिसूचना याच काळात अंमलात राहील. तिच्या अंमलबजावणीत आवश्यकतेनुसार बदल केले जातील, असेही सांगण्यात आले आहे.
दीक्षाभूमीकडे जाणाऱ्या बौद्ध बांधवांची गर्दी लक्षात घेता पाण्याची टाकी चौक, जुना वरोरा नाका ते कलेक्टर बंगला रोड आणि हुतात्मा स्मारकाजवळचा रोड या मार्गांवर सर्व प्रकारच्या वाहनांना प्रवेशबंदी असेल. वरोरा नाका चौक, मित्रनगर चौक ते सिंधी पंचायत भवन आणि मित्रनगर चौक ते जिल्हा स्टेडियमपर्यंतचा परिसरही यात येतो. हा सर्व परिसर 'नो पार्किंग व नो हॉकर्स झोन' म्हणून जाहीर करण्यात आला आहे. त्यामुळे या काळात तिथे कोणीही वाहने किंवा हॉकर्स लावू नयेत.
दुचाकी आणि चारचाकी (हलकी) वाहनांसाठी जुना वरोरा नाका चौक ते आंबेडकर महाविद्यालय, मित्र नगर चौक आणि टी.बी. हॉस्पिटलपर्यंतचा मार्ग सायकलसह सर्व वाहनांसाठी बंद करण्यात आला आहे. पाण्याची टाकी, विश्रामगृह ते जुना वरोरा नाका हा मार्गही सायकलसह सर्व वाहनांसाठी दोन्ही बाजूंनी बंद असेल. नागपूरकडून शहराकडे येणारी वाहने (जड वाहने वगळून) वरोरा नाका, उड्डाणपूल, सिद्धार्थ हॉटेल, बस स्टँड आणि प्रियदर्शनी चौक या मार्गाने शहरात जातील.
अवजड वाहनांसाठी पर्यायी मार्ग असा आहे. नागपूरकडून चंद्रपूरकडे येणारी सर्व प्रकारची जड वाहने गरजेनुसार हॉटेल कुंदन प्लाझा येथून सीटीपीएस मार्गे नेहरू नगरवरून मूल रोडला जातील. मूलकडून नागपूरकडे जाणारी जड वाहने बंगाली कॅम्प, सावरकर चौक, वरोरा नाका उड्डाणपूल या मार्गाने किंवा नेहरू नगरवरून सीटीपीएस मार्गे नागपूरकडे जातील. गरजेनुसार ही वाहने एम.ई.एल. नाका, सावरकर चौक, वरोरा नाका उड्डाणपूल येथे थांबवली जातील. बल्लारशाहकडून नागपूरकडे जाणारी जड वाहने बंगाली कॅम्प, नेहरू नगरवरून सीटीपीएस मार्गे जातील. दीक्षाभूमी मार्गावरील अनुयायांची गर्दी पाहून ती बंगाली कॅम्प डी.आर.सी. बंकर, बायपास रोड येथे थांबवण्यात येतील.
रामनगर, मित्र नगर, आकाशवाणी, स्नेहनगर आणि वडगाव परिसरात राहणाऱ्या नागरिकांनी पाण्याची टाकी, दवा बाजार, संत केवलराम चौक आणि दाताळा रोड या पर्यायी मार्गाने आपली वाहने (जड वाहने वगळून) न्यावीत. जटपुरा गेटकडून रामनगर मार्गे जुना वरोरा नाक्याकडे जाणाऱ्या वाहनचालकांनी पाण्याची टाकी, प्रियदर्शनी चौक, बस स्टँड, सिद्धार्थ हॉटेल आणि उड्डाणपूल या मार्गाने नागपूरकडे जावे. दीक्षाभूमी ते संत केवलराम चौक दरम्यान राहणाऱ्या रहिवाशांनी वाहने रस्त्याच्या कडेला उभी न करता जाहीर केलेल्या पार्किंगमध्ये ठेवावीत.
आय.टी.आय. कॉलेज ते जिल्हा स्टेडियमपर्यंत, तसेच वरोरा नाका दर्ग्याच्या उजव्या बाजूने जाणारा रस्ता, पुट्टेवार हॉस्पिटल, बुकावार हॉस्पिटल आणि वरोरा नाका ते पिंक प्लॅनेटपर्यंतचा भाग नो पार्किंग झोन व नो हॉकर्स झोन म्हणून जाहीर करण्यात आला आहे.
सोहळ्याला येणाऱ्या नागरिकांसाठी वाहन पार्किंगची ठिकाणे ठरवण्यात आली आहेत. नागपूर रोडने येणाऱ्या वाहनांसाठी शकुंतला लॉन आणि जनता कॉलेजसमोरील पटांगण (ईदगाह मैदान) आहे. शहरातून येणाऱ्या वाहनांसाठी सेंट मायकल स्कूलचे मैदान आणि सिंधी पंचायत भवनाजवळचे मैदान आहे. वडगाव, आकाशवाणी आणि लगतच्या परिसरातून येणाऱ्या वाहनांसाठी जिल्हा स्टेडियमजवळचे लोकमान्य टिळक हायस्कूल आहे. मूल रोड, बंगाली कॅम्प, तुकूम परिसरातून येणाऱ्या अनुयायांनी मोटार सायकली कृषी भवनजवळच्या ट्रॅव्हल्स स्टँडवर लावाव्यात आणि चारचाकी वाहने वर दिलेल्या इतर पार्किंग ठिकाणी लावावीत.
सोहळ्यात सहभागी होणारे सर्व बौद्ध बांधव, अनुयायी आणि नागरिकांनी या वाहतूक व्यवस्थेचा वापर करावा, वाहने जाहीर केलेल्या पार्किंगमध्येच ठेवावीत आणि शांतता व सुव्यवस्था कायम राखण्यासाठी पोलिसांना सहकार्य करावे, असे आवाहन पोलीस विभागाने केले आहे.
