हिंजवडीत बिर्ला इस्टेट्सचा नवा प्रकल्प, १,६५० कोटींची महसूल क्षमता

आदित्य बिर्ला ग्रुपचा भाग असलेल्या बिर्ला इस्टेट्स प्रायव्हेट लिमिटेडने पुण्यातील हिंजवडी येथे नवीन प्रकल्प हाती घेतल्याची घोषणा आज केली. ही कंपनी आदित्य बिर्ला रिअल इस्टेटची पूर्ण मालकीची उपकंपनी आहे. हा प्रकल्प जॉइंट डेव्हलपमेंट अॅग्रीमेंट म्हणजेच जेडीएच्या माध्यमातून उभा राहणार आहे.

या प्रकल्पातून अंदाजे १,६५० कोटी रुपयांची एकूण महसूल क्षमता असल्याचे कंपनीने सांगितले. प्रकल्प ५.६२ एकर म्हणजे अंदाजे २२,७३७.२७ चौरस मीटर जागेवर पसरलेला आहे. त्यातून अंदाजे १.२५ दशलक्ष चौरस फूट एकूण विक्रीयोग्य क्षेत्र उपलब्ध होणार आहे. कंपनी इथे रिटेल घटकासह प्रीमियम निवासी घरे बांधण्याचे नियोजन करत आहे.

हिंजवडी हे पुण्यातील सर्वाधिक स्थापित आयटी आणि रोजगार केंद्र आहे. हा प्रकल्प राजीव गांधी इन्फोटेक पार्कच्या अगदी जवळ आहे. इन्फोसिस, विप्रो आणि टाटा टेक्नॉलॉजीजसह इतर तंत्रज्ञान कंपन्यांचे मोठे कॅम्पसही जवळच आहेत. या भागाला मुंबई-पुणे एक्सप्रेसवे आणि मुंबई-बंगळुरू महामार्गाची उत्तम कनेक्टिव्हिटी आहे. आगामी हिंजवडी-शिवाजीनगर मेट्रोमुळे मध्य पुण्याशी जोडणी आणखी सोपी होईल, अशी अपेक्षा आहे.

परिसरात सामाजिक सुविधाही चांगल्या आहेत. मेट्रो स्टेशन ५०० मीटर अंतरावर आहे, तर ग्रँड हायस्ट्रीट मॉल सुमारे २०० मीटरवर आहे. प्रमुख शाळा, महाविद्यालये आणि रुग्णालये प्रकल्पापासून अगदी कमी अंतरावर आहेत. बिर्ला इस्टेट्सच्या संपूर्ण पोर्टफोलिओतील शाश्वततेच्या बांधिलकीनुसार हा प्रकल्प संकल्पना डिझाइनच्या टप्प्यावर आयजीबीसी गोल्ड प्रमाणपत्राचा विचार करून आखण्यात आला आहे.

बिर्ला इस्टेट्सचे एमडी आणि सीईओ श्री. के. टी. जितेंद्रन म्हणाले, "आमच्या विकास योजनांसाठी पुणे सातत्याने मुख्य बाजारपेठ राहिली आहे. हिंजवडी पुण्यातील सर्वात सक्रिय निवासी बाजारपेठ आहे आणि येथील मागणीला मोठ्या व सातत्याने वाढणाऱ्या व्यावसायिक मनुष्यबळाचा प्रबळ आधार आहे. हा विकास प्रकल्प पुण्यातील आमची उपस्थिती अधिक दृढ करतो आणि उच्च-वाढ असलेल्या सूक्ष्म-बाजारपेठांवर आमचा भर असल्याचे दर्शवतो. आमचा एकात्मिक रिटेल सुविधांसह प्रीमियम आणि विचारपूर्वक नियोजित कम्युनिटी निर्माण करण्याचा मनसुबा आहे."

पुण्यात बिर्ला इस्टेट्सचे यापूर्वीचे प्रकल्प आहेत. मध्य पुण्यात 'बिर्ला पुण्य' आणि मांजरी येथे 'बिर्ला एवम' हे ते दोन प्रकल्प. या दोन्ही प्रकल्पांसह हिंजवडीतील नव्या प्रकल्पामुळे कंपनीची पुण्यातील उपस्थिती आणखी भक्कम होते. भारतातील उच्च-वाढ असलेल्या निवासी बाजारपेठांवर कंपनीचे सातत्यपूर्ण लक्ष असल्याचेही यातून दिसते.