विसापूरच्या क्रीडा संकुलात अग्निवीर भरती सुरू, 8017 उमेदवार सहभागी

चंद्रपूर जिल्ह्यातील बल्लारपूर तालुक्यातल्या विसापूर येथील क्रीडा संकुलात अग्निवीर सैन्य भरती सुरू आहे. ही भरती 2 ऑक्टोबरपासून सुरू झाली असून 17 ऑक्टोबरपर्यंत चालणार आहे. विदर्भ, महाराष्ट्रातील इतर जिल्हे आणि गुजरात राज्यातून मिळून एकूण 8017 उमेदवार या भरतीत सहभागी होत आहेत.

आर्मी रिक्रूटिंग ऑफिस, नागपूर यांच्या वतीने यापूर्वी लेखी परीक्षा घेण्यात आली होती. त्यात उत्तीर्ण झालेल्या उमेदवारांची आता पुढच्या टप्प्यात शारीरिक क्षमता चाचणी आणि वैद्यकीय तपासणी घेतली जात आहे. अग्निवीर जनरल ड्युटी, अग्निवीर टेक्निकल, अग्निवीर क्लर्क/स्टोअर कीपर टेक्निकल, अग्निवीर ट्रेड्समन (दहावी उत्तीर्ण) आणि अग्निवीर ट्रेड्समन (आठवी उत्तीर्ण) या पदांसाठी ही प्रक्रिया राबवली जात आहे.

एकूण 8017 उमेदवारांपैकी 6556 उमेदवार विदर्भातील आहेत. महाराष्ट्रातील इतर भागांतून 930, तर गुजरात राज्यातून 531 उमेदवार आले आहेत. भारतीय सैन्यात दाखल होऊन देशसेवा करण्याची संधी मिळवण्यासाठी उमेदवारांमध्ये मोठा उत्साह दिसत आहे.

वेगवेगळ्या जिल्ह्यांतून येणाऱ्या उमेदवारांची गैरसोय होऊ नये म्हणून जिल्हा प्रशासनाने आवश्यक त्या सुविधा उपलब्ध करून दिल्या आहेत. उमेदवारांच्या जेवणाची व्यवस्था सामाजिक उत्तरदायित्व निधी (सीएसआर) अंतर्गत औद्योगिक कंपन्यांच्या सहकार्याने केली आहे. चंद्रपूर महाऔष्णिक वीज केंद्र, लॉयड्स मेटल्स अँड एनर्जी लिमिटेड, बल्लारपूर इंडस्ट्रीज लिमिटेड, धारिवाल इन्फ्रास्ट्रक्चर लिमिटेड, वेस्टर्न कोलफिल्ड्स लिमिटेड, जीएमआर एनर्जी लिमिटेड, ओमेंट बेस्ट लिमिटेड, अरविंदो रिअॅलिटी अँड इन्फ्रास्ट्रक्चर प्रा. लि., केपीसीएल, एसीसी सिमेंट, अंबुजा सिमेंट आणि अल्ट्राटेक सिमेंट अशा 12 कंपन्यांचा यात सहभाग आहे. जेवणाचे नियोजन जिल्हा पुरवठा अधिकारी, चंद्रपूर यांच्या समन्वयाने होत आहे.

भरतीसाठी आलेल्या उमेदवारांना खाद्यपदार्थ आणि रोजच्या गरजेच्या वस्तू सहज मिळाव्यात म्हणून माविम आणि उमेद यांच्या माध्यमातून क्रीडा संकुलाच्या प्रवेशद्वाराबाहेर महिला बचत गटांचे सशुल्क स्टॉल लावण्यात आले आहेत. त्यामुळे उमेदवारांची सोय झाली असून बचत गटांच्या महिलांनाही व्यवसायाची संधी मिळाली आहे.

भरती सुरक्षित, शिस्तबद्ध आणि सुरळीत व्हावी यासाठी जिल्हाधिकारी वसुमना पंत यांनी संबंधित विभागांची आढावा बैठक घेऊन सूचना दिल्या. क्रीडा संकुलाची डागडुजी आणि स्वच्छता, पिण्याचे पाणी, स्वच्छतागृहे, अखंडित वीजपुरवठा, कायदा व सुव्यवस्था, वैद्यकीय सेवा, अग्निसुरक्षा, वाहतूक व्यवस्था, भोजन सुविधा आणि आवश्यक मनुष्यबळ याबाबत निर्देश देण्यात आले आहेत.

या कामासाठी पोलीस विभाग, जिल्हा परिषद, चंद्रपूर महानगरपालिका, बल्लारपूर नगर परिषद, सार्वजनिक बांधकाम विभाग, आरोग्य विभाग, वीज वितरण विभाग, परिवहन विभाग आणि इतर संबंधित विभागांमध्ये समन्वय ठेवण्यात आला आहे. भरतीसाठी आलेल्या सैन्य पथकाच्या राहण्याची व्यवस्था विसापूर येथील तालुका क्रीडा संकुलातच केली आहे.

ही भरती आर्मी रिक्रूटिंग ऑफिस, नागपूर येथील भरती अधिकारी कर्नल अंशुल श्रीवास्तव यांच्या अधिपत्याखाली, भारतीय सैन्याच्या ठरलेल्या नियम आणि निकषांनुसार राबवली जात आहे. उमेदवारांची निवड पूर्णपणे सैन्याच्या नियमांनुसार होत असून, जिल्हा प्रशासन सैन्य भरती पथकाला आवश्यक प्रशासकीय आणि पायाभूत सुविधा पुरवत आहे.

उमेदवारांना कोणतीही अडचण येऊ नये म्हणून सर्व संबंधित यंत्रणा समन्वयाने काम करत आहेत. संपूर्ण भरती पारदर्शक, सुरक्षित आणि नियोजनबद्ध पद्धतीने पार पाडण्यासाठी जिल्हा प्रशासन कटिबद्ध असल्याची माहिती उपजिल्हाधिकारी तथा जिल्हा सैनिक कल्याण अधिकारी शुभम दांडेकर यांनी दिली.