ऑक्टोबर हीटचा तडाखा: मुंबई, ठाणे, पालघर, रायगड आणि रत्नागिरीला यलो अलर्ट

ऑक्टोबर महिन्याचे दिवस सुरू असतानाच महाराष्ट्रातील काही भागांत उन्हाचा चटका आणि उकाडा वाढल्याचे दिसून येत आहे. हवामान विभागाने वर्तवलेल्या अंदाजानुसार कोकण आणि गोवा जिल्ह्यांमध्ये तुरळक ठिकाणी उष्ण आणि दमट हवामानाची शक्यता आहे. विशेषतः किनारपट्टीवरील नागरिकांना अस्वस्थ करणाऱ्या दमट वातावरणाचा सामना करावा लागत आहे.

या पार्श्वभूमीवर प्रशासनाने आणि हवामान विभागाने काही जिल्ह्यांसाठी विशेष दक्षता बाळगण्याचा इशारा दिला आहे. उष्ण आणि दमट हवामानाचा सर्वाधिक प्रभाव लक्षात घेऊन प्रशासनाने 5 प्रमुख जिल्ह्यांना यलो अलर्ट जारी केला आहे. यामध्ये मुंबई, ठाणे, पालघर, रायगड आणि रत्नागिरी या जिल्ह्यांचा समावेश आहे.

या किनारपट्टीवरील भागात हवेतील आर्द्रता अधिक असल्यामुळे नागरिकांना घाम फुटण्याचा आणि उष्णतेचा त्रास जाणवण्याची शक्यता आहे.

यलो अलर्टच्या केंद्रस्थानी असलेल्या मुंबई शहरात 12 ऑक्टोबर रोजी हवामान मुख्यत: निरभ्र, पण अतिशय उष्ण आणि दमट राहण्याची दाट शक्यता आहे. मुंबई शहर आणि उपनगरांमध्ये सूर्यप्रकाश तीव्र राहणार असून कमाल तापमान 37 अंश सेल्सिअस आणि किमान तापमान 26 अंश सेल्सिअसच्या आसपास नोंदवले जाण्याचा अंदाज आहे. त्यामुळे मुंबईकरांना दिवसा प्रखर उन्हाचा आणि उकाड्याचा सामना करावा लागणार आहे.

गेल्या 24 तासांत राज्याच्या विविध भागांत तापमानात मोठी तफावत पाहायला मिळाली. एका बाजूला उत्तर महाराष्ट्रातील मालेगाव येथे राज्यातील सर्वाधिक कमाल तापमान 38.4 अंश सेल्सिअस इतके नोंदवले गेले. दुसऱ्या बाजूला जळगाव येथे सर्वात कमी किमान तापमान 18.2 अंश सेल्सिअस इतके नोंदवले गेल्याने काहीसा दिलासा मिळाला आहे.

हवामान खात्याच्या अंदाजानुसार पुढील 3 ते 4 दिवसांत महाराष्ट्रातील कमाल तापमानात 1 ते 3 अंश सेल्सिअसने हळूहळू घट होण्याची शक्यता आहे. त्यानंतर मात्र तापमानात मोठा बदल होण्याची शक्यता नाही. तसेच गुजरात प्रदेशातही पुढील 4 ते 5 दिवसांत कमाल तापमानात फारसा बदल होणार नाही. किमान तापमानाच्या बाबतीत सांगायचे तर पुढील 4 ते 5 दिवसांत महाराष्ट्र परिसरात किमान तापमान स्थिर राहण्याचा अंदाज आहे.

विभागवार अंदाजानुसार 12 ऑक्टोबर रोजी कोकण, मध्य महाराष्ट्र, मराठवाडा आणि विदर्भ या चारही विभागांत हवामान कोरडे राहण्याची शक्यता आहे. 13 ऑक्टोबरसाठीही कोकण, मध्य महाराष्ट्र, मराठवाडा आणि विदर्भ या चारही विभागांत हवामान कोरडे राहण्याचा अंदाज वर्तवण्यात आला आहे.