दलित, ओबीसी आणि आदिवासींनी स्वतःचे माध्यम उभे करावे, प्रकाश आंबेडकर यांचे आवाहन

वंचित बहुजन आघाडीचे अध्यक्ष अॅड. प्रकाश आंबेडकर यांनी दलित, ओबीसी आणि आदिवासी समाजाने स्वतःचे माध्यम म्हणजेच मीडिया उभे करावे, असे आवाहन केले आहे. आपल्या एक्स अकाउंटवर व्हिडिओ शेअर करून त्यांनी ही भूमिका मांडली.

सध्या राज्यात आणि राजधानी दिल्लीत काॅक्रोच जनता पार्टीचे आंदोलन सुरू आहे. काॅक्रोच जनता पार्टीच्या नेतृत्वात सुरू असलेले हे आंदोलन निवडणूक आयुक्त ज्ञानेश कुमार यांच्या राजीनाम्यासाठी तसेच MPSC, UPSC आणि NEET च्या पेपरफुटीविरोधात जोरदार सुरू असल्याचे दिसून आले. या आंदोलनात विद्यार्थी मोठ्या संख्येने उपस्थित होते. हजारो विद्यार्थी रस्त्यावर उतरून आपल्या न्याय्य हक्कांसाठी लढताना दिसत आहेत.

या पार्श्वभूमीवर आंबेडकर यांनी आपले म्हणणे मांडले. ते म्हणाले की, गेल्या काही महिन्यांपासून मी पाहत आहे, दलित असोत, ओबीसी असोत किंवा आदिवासी, त्यांच्याकडे टीव्ही, वर्तमानपत्रे आणि राजकीय पक्षांनी दुर्लक्ष केले आहे आणि त्यांना कुठेही स्थान मिळत नाही.

आंबेडकर यांच्या म्हणण्यानुसार, हा या समाजांना नाकारण्याचा आणि त्यांच्या अस्तित्वाला पुसून टाकण्याचा एक मार्ग आहे. हे लोक लोकांसमोर आले नाहीत, तर लोक त्यांना विसरून जातील, ही एक पद्धतच आहे, असे ते म्हणाले.

सर्व ओबीसी, आदिवासी, दलित आणि बौद्धांना उद्देशून त्यांनी विचारले की, ही गोष्ट तुम्हाला जाणवली आहे की नाही? अशा प्रकारे त्यांनी या चारही समाजांतील लोकांना थेट संबोधित केले.

ज्ञानेश कुमार यांच्या विरोधात जे आंदोलन चालले, त्यात बसपा अध्यक्ष मायावती दिसल्या नाहीत आणि चंद्रशेखर आझादही दिसले नाहीत, असे आंबेडकर यांनी सांगितले. हे दोघे आंदोलनात कुठेच दिसले नाहीत, तसेच पाठिंबा दर्शवतानाही दिसले नाहीत, असे ते म्हणाले.

म्हणूनच तुम्हाला तुमचे स्वतःचे माध्यम म्हणजेच मीडिया उभा करावा लागेल, तरच तुम्ही तुमचे अस्तित्व वाचवू शकाल, असे आंबेडकर यांनी सांगितले. मग ते मतदानाच्या माध्यमातून असो किंवा सोशल मीडियाच्या माध्यमातून, पण स्वतःची ओळख तुम्हाला स्वतःलाच निर्माण करावी लागेल, असेही त्यांनी आपल्या आवाहनात म्हटले आहे.

आपल्या पोस्टच्या शेवटी त्यांनी जय भीम, जय संविधान, असे म्हटले असून OBC, SC आणि ST हे हॅशटॅगही वापरले आहेत. ही पोस्ट १२ ऑक्टोबर २०२६ रोजी शेअर करण्यात आली.