इंडिया मोबाईल काँग्रेस 2026 मध्ये मोटोरोला सिग्नेचर 27 ची झलक, 200MP कॅमेरा आणि 7 वर्षांचे अपडेट्स

दिल्लीमध्ये इंडिया मोबाईल काँग्रेस 2026 चे आयोजन करण्यात आले होते. या कार्यक्रमात टेक कंपनी मोटोरोलाने आपल्या नेक्स्ट जनरेशन फ्लॅगशिप स्मार्टफोनची झलक सादर केली आहे. मोटोरोला सिग्नेचर 27 असे या फोनचे नाव आहे. प्रीमियम हार्डवेअर, अ‍ॅडव्हान्स इमेजिंग आणि दीर्घकाळ मिळणारा सॉफ्टवेअर सपोर्ट यावर भर देऊन कंपनीने हा नवीन स्मार्टफोन डिझाईन केला आहे. मोटोरोलाचा हा आगामी फोन कंपनीच्या अल्ट्रा-प्रीमियम सेगमेंटमधील डिव्हाईस आहे.

प्रोसेसरबद्दल सांगायचे तर, मोटोरोला सिग्नेचर 27 हा स्मार्टफोन क्वालकॉमच्या स्नॅपड्रॅगन 8 एलिट एक्सट्रीम जेन 6 चिपसेटसह लाँच होणार आहे. या आगामी स्मार्टफोनमध्ये आर्क्टिकमेश कूलिंग सिस्टिम आणि सिक्स-अँटेना सेटअप देण्यात आला आहे. हा सेटअप कनेक्टिव्हिटी आणि नेटवर्क सुधारतो, असे सांगितले जात आहे. वर्कलोड, गेमिंग आणि मल्टीटास्किंग करताना हा फोन अधिक चांगला परफॉर्मन्स देतो.

कॅमेऱ्याच्या बाबतीत कंपनीच्या या आगामी डिव्हाईसमध्ये 50MP सोनी लायटिया 910 प्रायमरी कॅमेरा आणि 200MP पेरिस्कोप टेलीफोटो लेन्स देण्यात आली आहे. फोनच्या कॅमेरा सिस्टिममध्ये 3.5-अ‍ॅक्सिस ऑप्टिकल इमेज स्टेबिलायझेशन, क्वालकॉम इलेक्ट्रॉनिक इमेज स्टेबिलायझेशन आणि मोटोरोलाचे व्हिडीओ एन्हान्समेंट इंजिन आहे. त्यामुळे इमेज क्वालिटी, झूम फोटोग्राफी आणि व्हिडीओ स्टेबिलिटी सुधारते. ही कॅमेरा सेटिंग वेगवेगळ्या परिस्थितीत अधिक चांगली इमेज क्वालिटी देते.

ऑडिओसाठी कंपनीने बँग अँड ओलुफसेन यांच्यासोबत पार्टनरशिप केली आहे. बँग अँड ओलुफसेनने पहिल्यांदाच एखाद्या स्मार्टफोनसाठी ऑडिओ ट्यून केला आहे. हा ब्रँड इमर्सिव म्युझिक, गेमिंग आणि व्हिडीओ प्लेबॅक साउंडसाठी ओळखला जातो. हा फोन अँड्रॉईड 17 वर आधारित इंटीग्रेटेड गूगल जेमिनीच्या एआय पॉवर्ड असिस्टंटला सपोर्ट करतो.

सॉफ्टवेअर अपडेट्सबाबत कंपनीने दावा केला आहे की, आपल्या आगामी स्मार्टफोनसाठी 7 वर्षांपर्यंत ऑपरेटिंग सिस्टम अपग्रेड आणि 7 वर्षांसाठी सिक्योरिटी मेंटेनन्स अपडेट रिलीज केले जातील.

रंगाच्या पर्यायांबद्दल बोलायचे तर, मोटोरोला सिग्नेचर 27 हा स्मार्टफोन पँटोन कोल स्मोक आणि पँटोन कॅपूलेट ओलिव या कलर ऑप्शनमध्ये लाँच केला जाणार आहे. कंपनीने अद्याप या स्मार्टफोनची किंमत तसेच इतर फीचर्स किंवा स्पेसिफिकेशन्सबाबत माहिती शेअर केलेली नाही. हा स्मार्टफोन लवकरच लाँच केला जाऊ शकतो, अशी शक्यता आहे.