कर्जतच्या जंगलात दोन हजार झाडांवर कुऱ्हाड; संजय राऊत यांचा सरकारवर हल्लाबोल

कर्जत येथील जंगलातली अनेक झाडे सध्या तोडली जात आहेत. यावर ठाकरे गटाचे खासदार संजय राऊत यांनी तीव्र शब्दांत टीका केली. मुंबईत माध्यमांशी बोलताना त्यांनी या जंगलतोडीबद्दल आपली भूमिका मांडली आणि इतरही अनेक मुद्द्यांना हात घातला.

राऊत म्हणाले, "काल आम्ही कर्जतला गेलो होतो. २०० वर्षे वयाची झाडे ज्या पद्धतीने कापली, असे कृत्य राक्षसच करू शकतो. केंद्र हे मानवी राक्षसच आहेत. आतापर्यंत दोन हजार झाडे तोडली आहेत. ३३ हजार झाडे तोडली जाणार आहेत."

या परिसराचे महत्त्व सांगताना त्यांनी भीमाशंकरचा उल्लेख केला. भीमाशंकर तिथून २० किलोमीटरवर आहे, तिथे अनेक वनौषधी आहेत आणि विष उतरवणाऱ्या वनौषधीही आहेत, असे ते म्हणाले. गुजरातच्या टोरंट कंपनीला हे जंगल ताब्यात दिले आहे, असा त्यांचा आरोप आहे. मेहता, शहा यांना जंगले द्यायला सुरुवात केली आहे, असेही त्यांनी म्हटले. ग्रामस्थांना मारण्यासाठी पोलीस आणले आहेत, असा आरोप करून राऊत म्हणाले, "ही लढाई थांबणार नाही. बघूया, हा प्रकल्प कसा होतोय."

झाडे तोडल्यानंतर रोपटी कुठे लावणार आहेत, असा सवालही त्यांनी विचारला. झाडे तोडताना पक्ष्यांची घरटी गेली आणि ते पक्षी रात्रभर तडफडत होते, असे सांगून त्यांनी सरकारवर टीका केली. या सरकारला लाज वाटत नाही, त्यांनी पर्यावरण खाते बंद करावे, असे राऊत यांनी म्हटले आहे.

झाडे तोडण्यामागे पैसे खाल्ले जातात, असा आरोप राऊत यांनी केला. राज्यात यापूर्वीही उद्योग आले आहेत, एमआयडीसी वगैरे आम्ही आणल्या आहेत, असे सांगून ते म्हणाले की यांना इथे काळा पैसा गुंतवायचा आहे. त्यानंतर त्यांनी उज्ज्वल निकम यांच्यावर निशाणा साधला. या लोकांची वकिली कोण करतंय, असा प्रश्न विचारून त्यांनी सांगितले की निकम टोरंट कंपनीच्या बाजूने आहेत. हे महाराष्ट्राचे दुर्दैव आहे, असे राऊत म्हणाले.

निकम यांच्याबद्दल बोलताना राऊत यांची भाषा आणखी कडक झाली. खासदारकीसाठी अब्रूची लक्तरे काढून घ्यावी लागतात, हे दिसत आहे, असे ते म्हणाले. दहा झाडे तोडणे म्हणजे एक कसाब, झाडे तोडणारे कसाबचे बाप आहेत, हे निकम यांनी समजून घ्यावे, असे त्यांनी म्हटले. त्यांची बाजू घेणे म्हणजे कसाबची बाजू घेणे, असेही राऊत म्हणाले.

शेवटी त्यांनी चंद्रपूरचा विषय काढला. अदाणींनी देशाच्या इभ्रतीची कत्तल केली आहेच, असे सांगून ते म्हणाले की अदाणींसाठी व्याघ्र प्रकल्पावर कुऱ्हाड चालवणार आहे. चंद्रपुरात पाच हजार झाडे तोडली जाणार आहेत, असेही राऊत यांनी सांगितले.