सायडोंगरमध्ये टोरंटसाठी वृक्षतोड; ३२ हजार ४८० झाडांच्या कत्तलीवरून संताप

कर्जत तालुक्यातील पाली तर्फे कोतवाल खलाटी येथील सायडोंगर परिसरात टोरंट पॉवरच्या जलविद्युत प्रकल्पासाठी मोठ्या प्रमाणावर झाडे तोडली जात आहेत. त्यामुळे पर्यावरणाचा प्रश्न पुन्हा ऐरणीवर आला आहे. या प्रकल्पासाठी वन विभागाने ६४० एकर वनजमिनीवरील तब्बल ३२ हजार ४८० झाडे तोडण्याची परवानगी दिल्याची माहिती समोर आली आहे.

सायडोंगर परिसरातील राखीव वन सर्व्हे क्रमांक २८ आणि २९ मधील ६४० एकर जमीन टोरंट प्रकल्पासाठी देण्यात आली आहे. कर्जत वन विभागाने ७ ऑक्टोबर २०२६ रोजी या क्षेत्रातील झाडे तोडण्याची परवानगी दिल्याचे सांगितले जात आहे. दसऱ्याच्या मुहूर्तावर वृक्षतोडीला सुरुवात झाली.

पालघर जिल्ह्यातील वाडा आणि मोखाडा तालुक्यांतून आलेले मजूर रोज सुमारे ५०० झाडे तोडत असल्याची माहिती आहे. हे सगळे काम पूर्ण व्हायला साधारण पाच महिन्यांचा कालावधी लागण्याची शक्यता आहे.

विशेष म्हणजे, हा परिसर संवेदनशील आणि संरक्षित वनक्षेत्र असल्याचे फलक खुद्द वन विभागानेच लावले आहेत. तसेच सायडोंगर परिसरात प्रवेश करण्यास मनाई असल्याचेही फलक तिथे आहेत. एकीकडे हा संवेदनशील आणि राखीव वनक्षेत्र असल्याचे फलक आणि दुसरीकडे त्याच ठिकाणी झाडे तोडण्याची परवानगी, यामुळे वन विभागाच्या भूमिकेवर प्रश्न उपस्थित होत आहेत. स्थानिक नागरिक आणि पर्यावरणप्रेमींनी याबद्दल संताप व्यक्त केला आहे. या वृक्षतोडीविरोधात राजकीय नेत्यांनीही आवाज उठवला आहे.

शिवसेना (उद्धव बाळासाहेब ठाकरे) पक्षाचे नेते आदित्य ठाकरे यांनी या प्रकरणावरून सरकारवर जोरदार टीका केली. स्थानिकांचा आणि पर्यावरणप्रेमींचा विरोध डावलून हजारो झाडांची कत्तल कुणाच्या आशीर्वादाने सुरू आहे, असा सवाल त्यांनी उपस्थित केला. नोव्हेंबरमध्ये होणाऱ्या भूमिपूजनाच्या घाईसाठी महाराष्ट्राच्या पर्यावरणाचा बळी का दिला जात आहे, असेही त्यांनी विचारले.

दरम्यान, कर्जत पर्यावरण बचाव समितीने या वृक्षतोडीविरोधात झाडांना मिठी मारून चिपको आंदोलन करण्याचा निर्णय घेतला आहे. अभिनेते सयाजी शिंदे या आंदोलनात सहभागी होणार असल्याचे समितीने जाहीर केले आहे. पर्यावरण बचाव समिती आणि नागरिक या कारवाईविरोधात आवाज उठवत आहेत. सायडोंगर परिसरातील या वृक्षतोडीला स्थानिक पातळीवर मोठ्या प्रमाणात विरोध होत आहे.

वृक्षतोडीला वाढता विरोध लक्षात घेऊन ठेकेदार कंपनीने वाडा आणि मोखाडा येथून आलेल्या झाडे कापणाऱ्या मजुरांना तेथून पाठवून दिल्याची माहिती आहे. त्यामुळे कालपासून सायडोंगर जंगलात झाडे तोडणारे मजूर दिसत नसल्याचे सांगितले जात आहे. मात्र, हजारो झाडांवरील संकट अजून कायम असल्याने पुढच्या काळात हा संघर्ष आणखी तीव्र होण्याची शक्यता आहे.