घरच्या घरी हॉटेलसारखे मेदू वडे जमवायचे? डाळ, पीठ आणि तेलाची काळजी अशी घ्या

हॉटेलमध्ये मिळणारे मेदू वडे बाहेरून अगदी कुरकुरीत आणि आतून एकदम मऊ असतात. दिसायला सुंदर, खायलाही चविष्ट. पण तेच वडे आपण घरी करायला गेलो की हॉटेलसारखे का होत नाहीत, असा प्रश्न पडतो आणि अनेकांचा हिरमोड होतो. काही सोप्या टिप्स आणि ट्रिक्स पाळल्या तर घरच्या घरी असे वडे सहज जमू शकतात. त्या एकेक करून बघूया.

सुरुवात उडीद डाळीपासून. ही डाळ कमीत कमी 4 ते 5 तास पाण्यात भिजवून ठेवावी. भिजवण्याची वेळ महत्त्वाची आहे. डाळ जास्त वेळ भिजली तर पीठ जास्त तेल शोषून घेते आणि कमी वेळ भिजली तर वडे कडक होतात.

डाळ वाटताना पाणी एकदम ओतू नये. पीठ घट्ट राहावे म्हणून फक्त 1 ते 2 चमचे थंड पाणी शिंपडत डाळ वाटावी. ग्राइंडर किंवा मिक्सर गरम झाला तर पिठाचा रंग आणि चव बदलू शकते. ते टाळण्यासाठी फ्रिजचे थंड पाणी वापरावे किंवा एक बर्फाचा तुकडा घालून वाटावे. असे केल्यास पीठ छान फुलते.

शक्य असेल तर मिक्सरपेक्षा ग्राइंडरमध्ये पीठ वाटावे. ग्राइंडरमध्ये पिठात हवा भरली जाते आणि वडे कापसासारखे मऊ होतात. पीठ वाटून झाल्यावर हाताने एकाच दिशेने 3 ते 4 मिनिटे चांगले फेटावे. त्यामुळे पिठात एअर बबल्स तयार होतात आणि वडे आतून मऊ राहतात.

पीठ नीट झाले आहे का, हे तपासायचे असेल तर एका वाटीत पाणी घ्यावे आणि त्यात पिठाचा छोटा गोळा टाकावा. तो बुडला नाही आणि वर तरंगला, तर पीठ अगदी योग्य झाले असे समजावे.

वडे जास्त वेळ बाहेरून कुरकुरीत राहावेत म्हणून पीठ वाटल्यानंतर त्यात 1 ते 2 चमचे उपमा रवा किंवा तांदळाचे पीठ मिसळावे. चवीसाठी थोडे दही किंवा बारीक किसलेला दुधी भोपळा घातला तर वडे आतून अजिबात कडक होत नाहीत, उलट अतिशय मऊ होतात.

आता तळण्याची वेळ. यासाठी काही खास काळजी घ्यावी लागते. आधी तेल चांगले कडक तापू द्यावे. तेल कमी तापलेले असेल तर वडे जास्त तेल शोषतात. खूप जास्त तापलेले असेल तर वडे बाहेरून जळतात आणि आतून कच्चेच राहतात. म्हणून गॅस मध्यम आचेवर ठेवावा.

वडे तेलात सोडल्या सोडल्या उलटू नयेत. आधी एका बाजूने थोडे तळू द्यावेत आणि मग मध्यम आचेवर दोन्ही बाजूंनी सोनेरी तपकिरी रंग येईपर्यंत तळावेत. अशा पद्धतीने तळले की घरच्या घरी चविष्ट, सुंदर आणि सोनेरी रंगाचे कुरकुरीत वडे तयार होतात.

वडे चांगले फुगावेत म्हणून काही जण त्यात खाण्याचा सोडा वगैरे घालतात. पण त्यामुळे आरोग्याला अपाय होऊ शकतो. नैसर्गिक चवीसाठी त्याऐवजी थोडे दही मिसळणे केव्हाही चांगले.