साधा वरणभातही लागेल चविष्ट, १० मिनिटांत झटपट बनवा कच्च्या पेरूचं चटपटीत लोणचं

सध्या बाजारात पेरू मोठ्या प्रमाणात आले आहेत. पेरू दिसला की सगळ्यांच्या तोंडाला पाणी सुटतं. अनेक जण पेरू कापून त्यावर लाल तिखट आणि मीठ लावून खातात. हे फळ वर्षभर बाजारात मिळतं आणि चवीसोबतच शरीरासाठीही फायदेशीर आहे. पेरूपासून अनेक प्रकारचे पदार्थ बनवले जातात.

पेरूमध्ये फायबर, विटामिन सी आणि अँटीऑक्सिडंट्स भरपूर प्रमाणात आढळतात. म्हणूनच विटामिन सी वाढवण्यासाठी रोज एक पेरू खाण्याचा सल्ला दिला जातो. पेरू खाल्ल्याने पचनक्रिया सुधारते.

आज आपण पेरूचं चटपटीत लोणचं बनवण्याची सोपी पद्धत पाहणार आहोत. या पद्धतीने बनवलेलं लोणचं साध्या वरणभातासोबतही मस्त लागतं. हे लोणचं दोन ते तीन आठवडे व्यवस्थित टिकून राहतं. चला तर मग, ही रेसिपी जाणून घेऊया.

साहित्य म्हणून पेरू, मोहरीचं तेल, पिवळी मोहरी, बडीशेप, मेथी दाणे, हिंग, हळद, काश्मिरी लाल तिखट, आमचूर पावडर, लिंबाचा रस आणि साधं मीठ लागेल. हे सगळं साहित्य आधी जवळ काढून ठेवा, म्हणजे लोणचं बनवताना धावपळ होणार नाही.

पेरूचं लोणचं बनवण्यासाठी सगळ्यात आधी पेरू पाण्याने स्वच्छ धुवून घ्या. मग ते कोरडे करा आणि मध्यम आकाराचे तुकडे कापा.

पेरू कापताना आतल्या बिया काढून टाका. असं केल्याने बिया दातांत अडकणार नाहीत आणि चवही छान लागेल.

आता पॅनमध्ये बडीशेप, मेथी दाणे आणि मोहरी मंद आचेवर लालसर होईपर्यंत भाजा. भाजल्यामुळे या पदार्थांचा कच्चेपणा कमी व्हायला मदत होईल.

भाजलेले हे मसाले थंड होऊ द्या. नंतर ते मिक्सरच्या भांड्यात घालून बारीक वाटून त्याची पावडर तयार करा.

यानंतर कढईत मोहरीचं तेल गरम करायला ठेवा. तेल थोडं कोमट झालं की त्यात हिंग, कलौंजी, हळद, लाल तिखट, साधं मीठ, काळं मीठ आणि तयार केलेला मसाला घालून नीट मिक्स करा.

शेवटी या मिश्रणात पेरूचे तुकडे आणि लिंबाचा रस घालून सगळं एकत्र करा. तयार झालेलं लोणचं काचेच्या बरणीत भरून ठेवा. अशा प्रकारे सोप्या पद्धतीने चटपटीत पेरूचं लोणचं तयार होतं.