एअरटेलचा 348 रुपयांचा नवा प्रीपेड प्लॅन, 349 रुपयांच्या प्लॅनपेक्षा 1 रुपयाने स्वस्त
एअरटेलने ग्राहकांसाठी 348 रुपयांचा नवा प्रीपेड रिचार्ज प्लॅन आणला आहे. आधीपासून सुरू असलेल्या 349 रुपयांच्या प्लॅनमध्ये केवळ 1 रुपयाचा फरक असला, तरी दोन्ही प्लॅनच्या फायद्यांमध्ये बदल आहेत.
टेलिकॉम कंपन्या आपल्या ग्राहकांसाठी नेहमीच नवनवे आणि आकर्षक रिचार्ज प्लॅन घेऊन येत असतात. त्याच पद्धतीने एअरटेलने आपल्या ग्राहकांसाठी 348 रुपयांचा नवा प्रीपेड रिचार्ज प्लॅन आणला आहे. हा प्लॅन खिशाला परवडणारा आहे. कंपनीचा 349 रुपयांचा लोकप्रिय प्लॅन आधीपासून सुरू आहे आणि त्याच्या तुलनेत हा नवा प्लॅन फक्त 1 रुपयाने स्वस्त आहे. मात्र या एका रुपयाच्या फरकात कंपनीने दोन्ही प्लॅनच्या फायद्यांमध्ये काही महत्त्वाचे बदल केले आहेत.
आधी 348 रुपयांच्या प्लॅनचे फायदे पाहू. या नव्या प्रीपेड प्लॅनची व्हॅलिडिटी 28 दिवसांची आहे. यात युजरला रोज 2GB हायस्पीड डेटा मिळतो. कोणत्याही नेटवर्कवर अनलिमिटेड कॉलिंग आणि रोज 100 एसएमएसचाही लाभ मिळतो. म्हणजेच संपूर्ण व्हॅलिडिटीच्या काळात ग्राहकांना एकूण 56GB डेटा मिळतो.
या प्लॅनची खास बाब म्हणजे यात 12 महिन्यांसाठी अॅडोब एक्सप्रेस प्रीमियम (Adobe Express Premium) चे सब्सक्रिप्शन पूर्णपणे फ्री मिळते. त्याशिवाय एअरटेल सेफ आणि 30 दिवसांसाठी हॅलोट्यून्सही फ्री मिळणार आहे.
आता 349 रुपयांच्या प्लॅनशी तुलना करू. हा प्लॅन एअरटेलने यापूर्वीच बाजारात उपलब्ध करून दिला आहे. दोन्ही प्लॅनच्या किमतीत केवळ 1 रुपयाचा फरक आहे, पण डेटा आणि इतर लाभांमध्ये फरक आहे. 349 रुपयांच्या प्लॅनमध्ये रोज 1.5GB डेटा मिळतो, तर 348 रुपयांच्या प्लॅनमध्ये रोज 2GB डेटा मिळतो.
मात्र 349 रुपयांच्या प्लॅनचे सर्वात मोठे फीचर म्हणजे अनलिमिटेड 5G डेटा. तुमच्याकडे 5G स्मार्टफोन असेल आणि तुमच्या भागात 5G नेटवर्क उपलब्ध असेल, तर तुम्ही अनलिमिटेड हायस्पीड इंटरनेट वापरू शकता. याशिवाय 349 रुपयांच्या प्लॅनमध्ये 6 महिन्यांसाठी एप्पल म्युझिक आणि अॅडोब एक्सप्रेस प्रीमियमचा लाभ मिळतो.
मग तुमच्यासाठी कोणता प्लॅन योग्य ठरेल? तुम्ही 4G स्मार्टफोन वापरत असाल आणि इंटरनेटसाठी जास्त डेटाची गरज असेल, तर 1 रुपयाने स्वस्त असलेला 348 रुपयांचा प्लॅन अधिक फायदेशीर ठरेल. कारण यात रोज जास्त म्हणजे 2GB डेटा मिळतो.
याउलट, तुमच्याकडे 5G फोन असेल आणि तुम्ही 5G कव्हरेज असलेल्या क्षेत्रात राहत असाल, तर 349 रुपयांचा प्लॅन निवडणे उत्तम राहील. त्यामुळे तुम्हाला अनलिमिटेड 5G इंटरनेटचा आनंद घेता येईल. थोडक्यात, किमतीत फक्त 1 रुपयाचा फरक असला तरी दोन्ही प्लॅनचे फायदे वेगवेगळे आहेत.
