दिवाळीत भेसळीवर एफडीएची नजर: राज्यात ६४ कोटी ४५ लाखांचा अन्नसाठा जप्त

दिवाळी सुरू झाली आहे आणि बाजारात मिठाई, खवा, मावा तसेच इतर खाद्यपदार्थांची जोरदार विक्री चालू आहे. सणासुदीत मिठाईला मोठी मागणी असते. या मागणीचा फायदा घेऊन काही विक्रेत्यांकडून भेसळयुक्त किंवा निकृष्ट दर्जाचे पदार्थ विकले जाण्याची शक्यता असते. म्हणूनच मिठाई आणि खवा घेताना विशेष काळजी घ्या, असे आवाहन अन्न व औषध प्रशासनाचे (FDA) आयुक्त तुकाराम मुंढे यांनी केले आहे.

मुंढे यांच्या म्हणण्यानुसार, नागरिकांनी मिठाई किंवा खवा लागेल तेवढाच घ्यावा. दुकानात दोन ते तीन दिवसांपेक्षा जास्त काळ ठेवलेली खव्याची मिठाई घेऊ नये. शक्यतो नावाजलेल्या आणि योग्य लेबल असलेल्या दुकानांतूनच खरेदी करावी. मिठाई किंवा खव्याच्या पाकिटावर तयार केल्याची तारीख लिहिली आहे का, हेही पाहून घ्यावे.

मिठाईत भेसळ असल्याचा संशय आला किंवा काही तक्रार असेल, तर ती FDA ला कळवावी, असे मुंढे यांनी सांगितले. अशा तक्रारीवर योग्य ती कारवाई केली जाईल, असेही त्यांनी स्पष्ट केले.

मिठाईचा रंगही तपासावा, असे मुंढे यांनी सांगितले. खूप भडक रंगाची किंवा कृत्रिम रंग जास्त वापरलेली मिठाई घेणे टाळावे. सोन्या-चांदीचा वर्ख लावलेल्या मिठाईबाबतही सावध राहावे. चांदीचा वर्ख हातात घेतल्यावर तो विरघळतो की त्याची फॉईल तयार होते, हे पाहावे. फॉईल तयार होत असेल, तर तो वर्ख अॅल्युमिनियमचा असू शकतो, असे मुंढे यांचे म्हणणे आहे.

सणासुदीत लोकांना सुरक्षित आणि चांगल्या दर्जाचे अन्नपदार्थ मिळावेत, यासाठी FDA ने राज्यभर तपासणी मोहीम राबवली आहे. मुंढे यांनी दिलेल्या माहितीनुसार, १ सप्टेंबर ते ३ नोव्हेंबर या काळात राज्यातील ९,६६७ अन्न आस्थापनांची तपासणी झाली. त्यापैकी ४,६०३ आस्थापनांना नोटिसा देण्यात आल्या आणि ९५४ परवाने निलंबित करण्यात आले. या कारवाईत ६४ कोटी ४५ लाख रुपये किमतीचा अन्नसाठा जप्त झाला. तपासणीसाठी ८,८३५ अन्न नमुने घेण्यात आले आणि एकूण ३९८ टन अन्नसाठा जप्त करण्यात आला.

दिवाळीच्या काळात म्हणजे १५ ऑक्टोबर ते ३ नोव्हेंबर या दरम्यान FDA ने विशेष तपासणी मोहीम घेतली. यात ३,३३२ अन्न आस्थापनांची तपासणी झाली आणि त्यांपैकी १,५०१ आस्थापनांना नोटिसा देण्यात आल्या. नियम मोडल्याबद्दल ३२६ परवाने निलंबित झाले, तर १५ परवाने रद्द करण्यात आले. दिवाळीच्या निमित्ताने इतर राज्यांतून महाराष्ट्रात आणले जाणारे खवा, मावा, दूध, पनीर, खाद्यतेल, खाद्यरंग आणि इतर खाद्यपदार्थही तपासण्यात आले आहेत.

मिठाई विक्रेत्यांनीही स्वच्छता, अन्नाचा दर्जा आणि साठवणुकीचे नियम पाळणे आवश्यक आहे, असे यात म्हटले आहे. सणाचा आनंद घेताना आरोग्य धोक्यात येऊ नये, म्हणून मिठाई घेताना सावध राहावे, असे आवाहन तुकाराम मुंढे यांनी पुन्हा केले आहे.