दिल्लीतील शाळेत तिसरीतील ९ वर्षांची विद्यार्थिनी वर्गात कोसळली, रुग्णालयात मृत्यू; पोलीस तपास सुरू

राजधानी नवी दिल्लीतील एका शाळेतून धक्कादायक घटना समोर आली आहे. माया विहार परिसरात असलेल्या लवली हेरिटेज स्कूलमध्ये गुरुवारी सकाळी तिसरीच्या वर्गात शिकणारी ९ वर्षांची एक विद्यार्थिनी शाळेत चालत असताना अचानक खाली झुकली आणि जमिनीवर कोसळली. नंतर रुग्णालयात तिचा मृत्यू झाला. ही घटना वर्गातील CCTV कॅमेऱ्यात नोंदली गेली असून त्याचे फुटेज सोशल मीडियावर व्हायरल झाले आहे.

CCTV फुटेजमध्ये ही मुलगी आधी हळूहळू खाली झुकताना दिसते आणि काही क्षणांतच जमिनीवर कोसळते. हे घडल्यावर वर्गातील इतर मुले आणि शिक्षक यांच्यात चिंतेचे वातावरण पसरले. या घटनेमुळे शाळा प्रशासनात खळबळ उडाली आहे. मुलगी नेमकी कशामुळे कोसळली आणि तिच्या मृत्यूमागचे कारण काय, हे अजून स्पष्ट झालेले नाही.

शाळेच्या प्राचार्यांनी सांगितले की, विद्यार्थिनीला अचानक कार्डियक अरेस्ट आला. त्या म्हणाल्या, "ही अत्यंत दुःखद घटना आहे. विद्यार्थिनीला अचानक कार्डियक अरेस्ट आला. ती वर्गात स्वतःहूनच खाली कोसळली. आम्ही तातडीने तिला रुग्णालयात घेऊन गेलो. मात्र, तेथे तिचा मृत्यू झाल्याचे सांगण्यात आले. ही विद्यार्थिनी खेळून वर्गात परत येत होती."

मुलीला निर्मान विहार येथील मलिक रेडिक्स हेल्थ केअर रुग्णालयात नेण्यात आले होते. तिथल्या डॉक्टरांनी तपासणी केल्यानंतर तिला मृत घोषित केले. इतक्या लहान वयाच्या विद्यार्थिनीचा असा अचानक मृत्यू झाल्यामुळे शाळा प्रशासनात आणि आसपासच्या परिसरात हळहळ व्यक्त होत आहे.

दिल्ली पोलिसांनी दिलेल्या माहितीनुसार, गुरुवारी सकाळी सुमारे 9:52 वाजता पीसीआरला फोन आला. माया विहारमधील लवली हेरिटेज स्कूलच्या ९ वर्षांच्या विद्यार्थिनीला निर्मान विहार येथील मलिक रेडिक्स हेल्थ केअर रुग्णालयात आणले असून डॉक्टरांनी तिला मृत घोषित केल्याचे पोलिसांना कळवण्यात आले.

ही माहिती मिळताच पोलिसांनी प्रकरणाची चौकशी सुरू केली. प्राथमिक तपासाचा भाग म्हणून त्यांनी वर्गातील CCTV फुटेज तपासले, त्यात मुलगी अचानक कोसळल्याचे दिसते.

या घटनेमागची नेमकी परिस्थिती समजून घेण्यासाठी दिल्ली पोलीस सविस्तर तपास करत आहेत. मुलीचे पालक आणि शाळेतील संबंधित अधिकारी यांचे जबाब नोंदवले जाणार आहेत. CCTV फुटेज आणि इतर उपलब्ध पुराव्यांचीही तपासणी सुरू आहे. ९ वर्षांच्या लेकीच्या अचानक झालेल्या मृत्यूमुळे तिच्या कुटुंबावर दुःखाचा डोंगर कोसळला आहे.

सध्या पोलीस तपास सुरू असून मृत्यूचे नेमके कारण अद्याप स्पष्ट झालेले नाही. प्राचार्यांनी कार्डियक अरेस्ट आल्याचे सांगितले आहे, तर पोलीस उपलब्ध पुराव्यांची तपासणी करत आहेत.