देवली पेंढरीच्या शेतात महिलेचा कुजलेला मृतदेह; बेपत्ता मीना तेलंग यांचा असल्याचा अंदाज

नागपूर जिल्ह्यातील हिंगणा परिसरात असलेल्या देवली पेंढरी भागात एका महिलेचा संशयास्पद मृत्यू झाल्याने सगळीकडे खळबळ उडाली आहे. मंगळवारी दुपारी शेतात एका महिलेचा मृतदेह पडल्याची माहिती पोलिसांना मिळाली. पोलीस तिथे पोहोचले, तेव्हा मृतदेह पूर्णपणे कुजलेला होता आणि त्यावरून ओळख पटवणे शक्य नव्हते.

याच भागातील एक महिला गेल्या २८ दिवसांपासून बेपत्ता असल्याची माहिती आता पुढे आली आहे. हा मृतदेह त्याच महिलेचा असावा, असा अंदाज बांधला जात आहे. मात्र डीएनए चाचणीनंतरच काही स्पष्ट सांगता येईल, अशी पोलिसांची भूमिका आहे.

देवली परिसरात राहणाऱ्या बाली उर्फ मीना रणवीर तेलंग (वय ४३) बेपत्ता असल्याची तक्रार ७ ऑक्टोबर रोजी हिंगणा पोलीस स्टेशनमध्ये नोंदवण्यात आली होती. पोलिसांनी अपहरणाचा गुन्हा नोंदवून तपास सुरू केला होता, पण मीना यांचा कोणताही मागमूस लागला नव्हता.

मीना यांचे पती रणवीर यांनी पोलिसांना सांगितले की, ६ ऑक्टोबरला ते शेतातील काम आटोपून घरी परतले होते. रात्री साधारण आठच्या सुमारास एका व्यक्तीशी बोलणे सुरू झाल्यामुळे रणवीर आणि मीना यांच्यात वाद झाला. वादानंतर रणवीर घरातील हॉलमध्ये बसले, तर मीना "जेवण बनवते" असे म्हणून स्वयंपाकघरात गेल्या. थोड्या वेळाने रणवीर स्वयंपाकघरात गेले, तेव्हा मीना तिथे नव्हत्या. आजूबाजूला शोध घेऊनही पत्ता लागला नाही, म्हणून त्यांनी पोलिसांत तक्रार दिली.

मंगळवारी दुपारी साडेबारा वाजण्याच्या सुमारास देवली परिसरातील एका शेतात मृतदेह असल्याची खबर पोलिसांना मिळाली. ती मिळताच झोन १ चे डीसीपी एस. ऋषिकेश रेड्डी आणि इन्स्पेक्टर प्रमोद घोंगे आपल्या पथकासह घटनास्थळी पोहोचले. मृतदेहाचा चेहरामोहरा ओळखता येत नव्हता, पण मीना बेपत्ता झाल्यावर त्यांच्या अंगावरील कपड्यांचे जे वर्णन सांगण्यात आले होते, ते या मृतदेहावरील कपड्यांशी जुळते. मीना बेपत्ता होऊन २८ दिवस झाले आहेत आणि मंगळवारी सापडलेला मृतदेहही पूर्णपणे कुजलेला आहे.

नातेवाईकांना मृतदेहाची ओळख पटवता आलेली नाही. त्यामुळे मीना यांच्या आईवडिलांचे नमुने घेऊन त्यांचा डीएनए जुळवण्याचा प्रयत्न केला जाणार आहे. सध्या पोलिसांनी आकस्मिक मृत्यूची नोंद करून मृतदेह पोस्टमार्टमसाठी पाठवला आहे.

डीसीपी रेड्डी यांनी सांगितले की, डीएनए चाचणीतून सगळे स्पष्ट होईल. मृतदेह मीना यांचा असेल, तर त्यांच्या मृत्यूचे कारण शोधणेही गरजेचे आहे. मात्र मृतदेहाची अवस्था इतकी वाईट आहे की मृत्यूचे कारण कळू शकत नाही. पोस्टमार्टमनंतरच काही स्पष्ट होऊ शकेल, असेही त्यांनी म्हटले.