नागपुरातील वांजरा ले-आउटमध्ये रूपम फूडवर एफडीएचा छापा; ७ लाख २६ हजार १४७ रुपयांचे १५ टन संशयित नूडल्स आणि

नागपुरातील वांजरा ले-आउट परिसरात सुरू असलेल्या एका नूडल्स कारखान्यावर अन्न व औषध प्रशासनाने (एफडीए) अचानक छापा टाकला. नागरिकांच्या आरोग्याशी खेळ करणाऱ्या खाद्य व्यावसायिकांविरोधात एफडीएने कारवाईचा धडाका सुरू केला आहे आणि ही कारवाई त्याचाच भाग आहे. एफडीएच्या विशेष पथकाने या कारखान्यातून १५ टनांहून अधिक संशयित नूडल्स आणि मैद्याचा साठा जप्त केला.

जप्त केलेल्या मालाची एकूण किंमत ७ लाख २६ हजार १४७ रुपये असल्याची माहिती आहे. पथकाने कारखान्यातून एकूण १५ हजार ८२ किलो संशयित नूडल्स आणि मैदा ताब्यात घेतला. हा सगळा साठा सील करण्यात आला असून त्याचे नमुने प्रयोगशाळेतील तपासणीसाठी पाठवण्यात आले आहेत.

वांजरा ले-आउट येथील 'मे. रूपम फूड' या कारखान्यात एफडीएचे पथक अचानक पोहोचले, तेव्हा तिथे मोठ्या प्रमाणावर नूडल्स तयार करणे, त्यावर प्रक्रिया करणे आणि पॅकेजिंगचे काम सुरू होते. तपासणीदरम्यान पथकाला उत्पादनाच्या गुणवत्तेत तसेच पॅकेजिंगमध्ये अनेक त्रुटी आढळल्या.

विशेषतः चुकीचे लेबल लावलेले 'वेज हक्का नूडल्स', मोठ्या प्रमाणात खुले नूडल्स आणि संशयित दर्जाचा मैदा कारखान्यात सापडला. खाद्यपदार्थांच्या पॅकेजिंगवर योग्य माहिती नसणे आणि दिशाभूल करणारे लेबल लावणे अशा गोष्टीही तपासणीत समोर आल्या.

एफडीए आयुक्तांच्या विशेष निर्देशानुसार ही छापेमारी अत्यंत गोपनीय पद्धतीने करण्यात आली. सहआयुक्त (अन्न) कृष्णा जयपुरकर आणि सहायक आयुक्त अजय सदार यांच्या मार्गदर्शनाखाली अन्न सुरक्षा अधिकारी डॉ. ए. एन. खांडारे आणि त्यांच्या विशेष पथकाने ही कारवाई केली.

प्रयोगशाळेचा अहवाल आल्यानंतर संबंधित कारखान्याविरोधात पुढील कायदेशीर कारवाई केली जाणार आहे. दरम्यान, शहराच्या सीमेलगतच्या वांजरा परिसरात अशी अवैध उत्पादन युनिट्स मोठ्या प्रमाणावर सुरू असल्याची माहितीही समोर येत आहे. नागरिकांना सुरक्षित आणि दर्जेदार अन्नपदार्थ मिळावेत, यासाठी प्रशासनाकडून तपासणी मोहीम अधिक तीव्र करण्यात आली आहे. आता सर्वांचे लक्ष प्रयोगशाळेच्या अहवालाकडे लागले आहे.