गेवराईत लग्नाच्या नावाखाली तरुणाला अडीच लाखांचा गंडा, १५ वर्षांच्या मुलीशी लावले लग्न

मराठवाड्यात लग्नासाठी मुली मिळत नाहीत, ही गंभीर सामाजिक समस्या आहे. तिचाच फायदा घेऊन काही टोळ्या सक्रिय झाल्या आहेत. बीड जिल्ह्यातील गेवराई तालुक्यात अशाच एका फसवणुकीचा प्रकार समोर आला आहे. एका होतकरू तरुणाकडून लग्न जमवण्याच्या नावाखाली अडीच लाख रुपये घेतले गेले. यामागे मोठे आंतरराज्य रॅकेट असल्याचा दावा सामाजिक कार्यकर्त्यांनी केला आहे.

मिळालेल्या माहितीनुसार, गेवराईतील या तरुणाच्या लग्नासाठी जालना जिल्ह्यातील जाफ्राबाद येथील मध्यस्थांशी संपर्क साधला गेला होता. २२ जून रोजी बायोडाटा दिल्यानंतर मध्यस्थांनी मुलीचा फोटो पाठवला आणि जाफ्राबादमध्ये मुलगी पाहण्याचा कार्यक्रम ठरवला. १ ऑक्टोबर रोजी तरुणाचे कुटुंब तिथे गेले. तेव्हा "मुलीला वडील नाहीत, लग्नासाठी अडीच लाख रुपये खर्च द्यावा लागेल," अशी अट त्यांच्यासमोर ठेवण्यात आली.

घरची परिस्थिती गरिबीची असल्याने कुटुंबाने एका ऊस तोडणी मुकादमाकडून येत्या हंगामाची (२०२६-२७) उचल घेऊन ही रक्कम द्यायला होकार दिला. ठरल्याप्रमाणे ५ ऑक्टोबर रोजी संबंधित मंडळी कारने गेवराईत आली. मध्यस्थांना दोन वेगवेगळ्या फोन-पे खात्यांवर प्रत्येकी २५ हजार रुपये आणि उरलेले २ लाख रुपये रोख देण्यात आले. त्यानंतर मुलाच्या घरी ब्राह्मणाकडून विधिपूर्वक लग्न लावले गेले.

लग्नाला दोनच दिवस झाले आणि नवरीने माहेरी जायचा हट्ट धरला. "दसऱ्याचा सण झाल्यावर जाऊ," असे नवऱ्या मुलाने समजावले. पण तेव्हा मुलीनेच सगळे सांगून टाकले की, हे लग्न पैसे आणि दागिने लाटण्याच्या कटाचा भाग आहे. तरुणाने मध्यस्थांना फोन केला, तर त्यांनी उडवाउडवीची उत्तरे दिली. फसवणूक झाल्याचे लक्षात येताच तरुणाने पोलीस स्टेशन गाठून लेखी तक्रार दिली.

१९ ऑक्टोबर रोजी तरुणीने स्वतः पोलीस स्टेशनात जाऊन जबाब नोंदवला. कागदपत्रांवर वय २० वर्षे दिसावे म्हणून नवीन आधार कार्ड तयार केले होते. मात्र चौकशीत तिचे खरे वय १५ वर्षे ८ महिने असल्याचे, म्हणजे ती अल्पवयीन असल्याचे निष्पन्न झाले. तिला जबरदस्तीने गेवराईत आणून लग्न लावले गेले आणि यात आपलीही फसवणूक झाली, असे तिने जबाबात मान्य केले.

गेवराई पोलिसांनी तिला बाल कल्याण समितीसमोर हजर केले आणि पुढील व्यवस्थेसाठी सुधारगृहात पाठवले. पोलीस या रॅकेटचा कसून शोध घेत आहेत. मुलीच्या आईनेही आपली फसवणूक झाल्याचे बालकल्याण समितीसमोर सांगितले आहे.

महिला बालकल्याण समितीचे अध्यक्ष अशोक तांगडे यांनी पालकांना आणि तरुणांना सावध राहण्याचे आवाहन केले. "मुलांना लग्नासाठी मुली मिळत नसल्याच्या समस्येचा गैरफायदा घेऊन पैसे उकळणाऱ्या अनेक टोळ्या सक्रिय आहेत, अशा लोकांच्या भूलथापांना बळी पडू नका," असे ते म्हणाले.

सामाजिक कार्यकर्ते गणेश ढवळे यांनी तीव्र संताप व्यक्त केला. मराठवाड्यात दुष्काळ आणि विवाह जुळत नसल्याची समस्या गंभीर झाली आहे, असे ते म्हणाले. याचा फायदा घेऊन कर्नाटक, मध्य प्रदेश आणि इतर राज्यांतून मुलींची खरेदी-विक्री होत असून त्यात ३ ते १० लाखांपर्यंत दर आकारले जात आहेत. यात मुलीचे आई-वडीलही सामील असल्याचे दिसत आहे, असेही त्यांनी म्हटले. या रॅकेटचा बिमोड करून लग्नाळू तरुणांची आर्थिक आणि मानसिक पिळवणूक पोलिसांनी तातडीने थांबवावी, अशी मागणी जोर धरत आहे.