बीडमध्ये तीन ठिकाणी दसरा मेळावे, नागपुरात संघाचा विजयादशमी उत्सव

मराठवाड्यावर दुष्काळाची गडद छाया आहे. अशा वेळी बीड जिल्ह्यात आज तीन ठिकाणी दसरा मेळावे होत आहेत. विचारांचे सोने लुटले जाणार, की आरोप-प्रत्यारोपांच्या फैरीत शिट्या आणि टाळ्यांचे आवाज घुमणार, याकडे सगळ्यांचे लक्ष लागले आहे. गेल्या तीन ते चार वर्षांपासून बीडची सामाजिक वीण विस्कटण्याचा प्रयत्न झाला, पण अनेक जण या राजकीय स्पर्धेत बळी गेले नाहीत आणि त्यांनी सामाजिक सलोखा टिकवण्याचे काम केले.

सावरगाव घाट येथील भगवान भक्तीगडावर भाजप नेत्या पंकजा मुंडे यांचा मेळावा आहे. नारायणगडावर मराठा आरक्षण आंदोलनकर्ते मनोज जरांगे पाटील यांचा मेळावा होणार आहे. आष्टी तालुक्यातील मच्छिंद्रनाथ गड येथे भाजप आमदार सुरेश धस यांचा मेळावा आहे. हे नेते कोणते भावनिक आवाहन करतात आणि काय संदेश देतात, याची उत्सुकता आहे.

जरांगे पाटील यांचा पारंपारिक मेळावा दरवर्षीप्रमाणे यंदाही श्री क्षेत्र नारायण गडावर शेकडो एकरवर होणार आहे. तयारी अंतिम टप्प्यात आली असून गडाच्या चारही बाजूंनी पार्किंगची व्यवस्था केली आहे. लाखो लोकांच्या राहण्याची, जेवणाची आणि पाण्याचीही सोय करण्यात आली आहे. स्टेज, साऊंड सिस्टीम आणि इतर नियोजनही झाले आहे. मेळावा आज सकाळी 11 वाजता सुरू होणार आहे.

मेळाव्यापूर्वी गेल्या आठवड्यात जरांगे यांनी सरकारवर टीका केली. सोमठाणा गडावरील रेणुका मातेच्या दर्शनानंतर बोलताना त्यांनी म्हटले की, दुष्काळाने होरपळलेल्या शेतकऱ्यांना हेक्टरी एक लाख रुपयांचे अनुदान द्यायला हवे, असे असताना सरकारकडून पाच हजार रुपये देणे म्हणजे जखमेवर मलमपट्टी करण्याचा प्रयत्न आहे. दिवाळीपूर्वी पाच हजारांची मदत देऊन शेतकऱ्यांची दिशाभूल केली जात आहे, असा आरोप त्यांनी केला. आंदोलने आणि मोर्चांपासून शेतकऱ्यांचे लक्ष हटवण्यासाठी सरकार हा डाव खेळत आहे, असेही ते म्हणाले. सरकारचे धोरण शेतकरीहिताचे नाही, असा आरोप करत पाच हजारांसाठी शेतकऱ्यांना बँकांच्या रांगेत उभे राहावे लागणे हीदेखील थट्टाच आहे, असे जरांगे यांनी म्हटले.

पंकजा मुंडे यांचा मेळावा पाटोदा तालुक्यातील सावरगाव घाट येथे भगवान भक्ती गडावर दरवर्षीप्रमाणे होत आहे. आमदार धनंजय मुंडे, मंत्री मेघना बोर्डीकर, महादेव जानकर, सुजय विखे, माजी खासदार प्रीतम मुंडे यांच्यासह इतर नेते उपस्थित राहणार असल्याची माहिती आहे. तयारी अंतिम टप्प्यात असून मोठ्या संख्येने लोक सहभागी होतील, असे आयोजकांनी सांगितले. तीन ठिकाणी हेलिपॅड तयार असून पोलीसांचा मोठा बंदोबस्त सावरगाव घाटात दाखल झाला आहे.

मेळाव्यापूर्वी मुंडे म्हणाल्या की, त्यांनी तेथे गोपीनाथ गड स्थापन केला आहे आणि मुंडे साहेबांची समाधी आहे. तुळजाभवानी, रेणुकामाता, महालक्ष्मी अशा देवींची मंदिरे उभारली आहेत. नवरात्रीत पंचक्रोशीतील भाविक येतात आणि दर अष्टमी व नवमीला होम हवन केले जाते. आज सकाळी कन्यापूजन केले, मुलींनी सुंदर स्तोत्र सादर केले आणि त्यांच्या आवाजाने भारावून गेले, असे त्यांनी सांगितले. तेथे गेल्याशिवाय काही सांगता येत नाही, जे सुचते ते तेथे गेल्यावर सुचते, हा मेळावा माझा नाही, लोकांचा आहे, असेही त्या म्हणाल्या. अंगणवाडी सेविकांना दिली जाणारी भाऊबीज ही प्रतिकात्मक रक्कम आहे, केंद्र आणि राज्याची मदत तसेच इतर मदती हा त्यांच्यासाठी दिलासा आहे, ही अंतिम रक्कम नाही, असे मुंडे म्हणाल्या.

आमदार सुरेश धस यांचा पारंपारिक मेळावा आष्टी तालुक्यातील श्रीक्षेत्र मच्छिंद्रनाथ गड येथे विजयादशमीच्या मुहूर्तावर होणार आहे. मेळाव्याचे हे अठरावे वर्ष आहे. विविध संत-महंतांच्या उपस्थितीत हा धार्मिक सोहळा पार पडेल. नाथभक्त आणि भाविकांनी मोठ्या संख्येने येऊन धार्मिक परंपरेचा लाभ घ्यावा, असे आवाहन धस यांनी केले आहे.

तिकडे नागपूरमध्ये राष्ट्रीय स्वयंसेवक संघाचा विजयादशमी उत्सव शस्त्रपूजनाने सुरू होणार आहे. माजी उपराष्ट्रपती जगदीप धनखड आणि इस्रायलचे महावाणिज्यदूत यानिव रेवाच उपस्थित असतील. दैनिक जागरणचे मुख्य संपादक संजय गुप्ता प्रमुख पाहुणे असतील. संघाच्या स्थापनेला यंदा १०० वर्षे पूर्ण होत आहेत. देशातील विद्यार्थी आंदोलने आणि राज्यातील दुष्काळी परिस्थिती यांसह विविध विषयांवर सरसंघचालक डॉ. मोहन भागवत काय बोलतात, याकडे विशेष लक्ष आहे.