वाशिममध्ये दुष्काळामुळे प्रत्येक ग्रामपंचायतीत व्हीबी जी राम जी कामे सुरू करा, कुंभेजकरांचे आदेश

वाशिम जिल्ह्यात दुष्काळी परिस्थिती आहे. अशा वेळी गावांमध्ये लोकांना जास्तीत जास्त रोजगार मिळावा, म्हणून व्हीबी जी राम जी योजनेतून प्रत्येक ग्रामपंचायतीत कामे सुरू करा, असे निर्देश जिल्हाधिकारी योगेश कुंभेजकर यांनी दिले.

जिल्हाधिकारी कार्यालयातील काटेपूर्णा दालनात दुष्काळ देखरेख समितीची बैठक झाली. कुंभेजकर यांनी तिचे अध्यक्षपद सांभाळले. अपर जिल्हाधिकारी ब्रिजेश पाटील आणि निवासी उपजिल्हाधिकारी विश्वनाथ घुगे यांच्यासह विविध यंत्रणांचे अधिकारी सभागृहात हजर होते. उपविभागीय अधिकारी, तहसीलदार आणि गटविकास अधिकारी व्हीसीद्वारे बैठकीत सहभागी झाले.

ग्रामीण भागात रोजगार तयार करण्यासाठी या योजनेतून जास्तीत जास्त कामे सुरू होणे आवश्यक आहे, असे त्यांनी सांगितले. त्यासाठी लागणारी प्रक्रिया तत्काळ पूर्ण करावी आणि दुष्काळाचे गांभीर्य लक्षात घेऊन वेगाने काम करावे, असेही ते म्हणाले. कामे शेल्फवर नाहीत म्हणून सुरू झाली नाहीत, असे कुठेही घडता कामा नये. तसे झाले तर कठोर कारवाई करू, असा इशारा त्यांनी संबंधित यंत्रणांना दिला.

बैठकीत कृषी, वन विभाग, मृद व जलसंधारण, सार्वजनिक बांधकाम विभाग आणि जलसंपदा या विभागांचा आढावा घेण्यात आला. जलाशयांतील पाणी उपलब्धता, वीजपुरवठा आणि सार्वजनिक वितरण प्रणाली यांचाही आढावा घेतला गेला.

अवैध उपसा रोखण्यासाठी दक्षता पथके स्थापन करण्यात आली आहेत. ग्रामस्तरीय पाणीपुरवठा व स्वच्छता समित्या, आपदा मित्र, जलसुरक्षक आणि स्वयंसेवक यांनी जलस्रोतांवर नियमित देखरेख ठेवावी आणि गस्त घालावी, यासाठी त्यांना प्रोत्साहन द्यावे, असे जिल्हाधिकाऱ्यांनी सांगितले. पाणीबचतीबद्दल मोठ्या प्रमाणावर जनजागृती होणे आवश्यक आहे, असेही ते म्हणाले.

घरगुती पाणीबचतीबद्दलही लोकांना जागरूक करावे, असे त्यांनी सांगितले. शिक्षण विभागाने सरकारी आणि खासगी शाळांमार्फत जलदूत नेमावेत. विद्यार्थ्यांनी आपल्या घरात पाणी किती उपलब्ध आहे आणि किती वापरले जाते, याचे वॉटर ऑडिट करावे, यासाठी त्यांना प्रोत्साहन द्यावे. त्यामुळे पाणीबचतीचा संदेश सर्वदूर पोहोचेल, असे निर्देश त्यांनी दिले.

चारा लागवडीसाठी बियाणे वाटपाचे काम लवकरात लवकर पूर्ण करावे, असेही कुंभेजकर यांनी सांगितले. जलसंधारणाची कामे आणि चारा लागवड यांना अधिकाधिक प्रोत्साहन द्यावे, असे त्यांनी यंत्रणांना सांगितले.