वसई रोड टर्मिनसच्या कामाला गती; मार्च २०२८ पर्यंत प्रकल्प सेवेत आणण्याचे उद्दिष्ट
पश्चिम रेल्वेच्या वसई रोड टर्मिनस प्रकल्पासाठी कंत्राटदारांची नियुक्ती पूर्ण झाली असून जोगेश्वरीचा मालधक्का वसईत हलवला जात आहे.
छायाचित्रे सत्यापित केलेली नाहीत
मुंबई उपनगरीय रेल्वे नेटवर्कवरील प्रवाशांचा वाढता ताण कमी व्हावा आणि लांब पल्ल्याच्या गाड्यांसाठी नवा पर्याय मिळावा, यासाठी पश्चिम रेल्वेने वसई रोड टर्मिनसचा प्रकल्प हाती घेतला आहे. या प्रकल्पाच्या कामाने आता प्रत्यक्ष वेग घेतला आहे. कंत्राटदारांची नियुक्ती पूर्ण झाली असून हा संपूर्ण प्रकल्प मार्च २०२८ पर्यंत प्रवाशांच्या सेवेत आणण्याचे उद्दिष्ट ठरवण्यात आले आहे.
या बहुद्देशीय प्रकल्पावर सुमारे १०५ ते १५० कोटी रुपये खर्च अपेक्षित आहे. प्रकल्प पूर्ण झाल्यावर वसई-विरार, पालघर आणि ठाणे-नवी मुंबई परिसरातील लाखो प्रवाशांना थेट कनेक्टिव्हिटी मिळण्याचा मार्ग मोकळा होणार आहे.
जोगेश्वरी येथील मालधक्क्याचे वसई परिसरात स्थलांतर हा या प्रकल्पाचा मुख्य भाग आहे. सध्या जोगेश्वरी यार्डमधून सिमेंट, ऑटोमोबाईल्स आणि इतर अवजड वस्तूंची वाहतूक होते आणि त्यातून रेल्वेला वर्षाला सुमारे १०० कोटी रुपयांचा महसूल मिळतो. हे यार्ड आता वसई रोड-दिवा या सध्याच्या कॉर्ड लाईन आणि नायगाव-जुचंद्र या प्रस्तावित कॉर्ड लाईनच्या दरम्यान उभारले जात आहे.
'डेडिकेटेड फ्रेट कॉरिडॉर'शी जोडणी मिळण्याची शक्यता असल्याने पुढे या मालवाहतुकीतून रेल्वेचा महसूल आणखी वाढणार आहे. मालवाहतूक स्वतंत्र ट्रॅकवर वळवल्यामुळे मुख्य मार्गावरील लोकल आणि एक्सप्रेस गाड्यांचा खोळंबा कायमस्वरूपी टळेल.
सध्या जागेवर कॉक्रीट अॅप्रन, भूमिगत ड्रेनेज व्यवस्था उभारण्याचे आणि जुने अनावश्यक ट्रॅक हटवण्याचे काम वेगाने सुरू आहे. स्थापत्य कामांसोबतच ट्रॅक लिंकिंग, ओव्हरहेड वायर, सिग्नलिंग आणि टेलिकॉम यंत्रणांच्या आधुनिकीकरणाचे कंत्राट अंतिम टप्प्यात पोहोचले आहे.
सुमारे ४.५ हेक्टर रेल्वे जागेवर १.८ मार्ग किलोमीटर आणि ५.१ ट्रॅक किलोमीटरचे जाळे विणले जात आहे. नव्या टर्मिनसवर एकाच वेळी १२ प्रवासी ट्रेन्स हाताळण्याची क्षमता असेल.
प्लॅटफॉर्म सुमारे ८५० मीटर लांब आणि २७ मीटर रुंद असेल. त्याच्या १,२०० मीटर लांबीच्या संरक्षण भिंतीपैकी ५०० मीटरहून अधिक काम पूर्ण झाले आहे. यार्डमध्ये प्रत्येकी ८०० मीटर लांबीच्या दोन मालवाहतूक लाईन तयार केल्या जात आहेत. दक्षिण दिशेला मालवाहू वाहनांसाठी रॅम्प आणि रेल्वेचे दैनंदिन कामकाज व व्यावसायिक सुविधांसाठी स्वतंत्र बहुमजली इमारत उभारली जात आहे.
मार्च २०२८ पर्यंत हे टर्मिनस पूर्ण झाल्यास मुंबई सेंट्रल आणि वांद्रे टर्मिनसवरील लांब पल्ल्याच्या गाड्यांचा भार हलका होईल आणि वसई रोड हे उपनगरातील एक प्रमुख केंद्र ठरेल.
