तिबेटमध्ये ७.० रिश्टरचा भूकंप, १६ जणांचा मृत्यू, ३०० हून अधिक घरे उद्ध्वस्त

तिबेटच्या पठारी प्रदेशात गुरुवारी रात्री ७.० रिश्टर तीव्रतेचा जोरदार भूकंप झाला. हा प्रदेश भारताच्या सीमेला लागून आहे. या भूकंपात किमान १६ जणांचा मृत्यू झाला असून ३२ हून अधिक नागरिक गंभीर जखमी झाले आहेत. तसेच ३०० हून अधिक घरे उद्ध्वस्त झाली आहेत.

एकीकडे जगभर वातावरणीय बदलांचे आणि एल निनोचे संकट असतानाच आशिया खंडात आता आणखी एक मोठी नैसर्गिक आपत्ती आली आहे. भूकंपाचे धक्के बसताच लोक घाबरून घराबाहेर पळाले, पण काही क्षणांतच शेकडो कुटुंबांचे संसार मातीमोल झाले. रात्रीच्या वेळी झालेल्या या भूकंपामुळे लोकांच्या किंकाळ्यांनी सगळा परिसर हादरून गेला.

स्थानिक वेळेनुसार गुरुवारी रात्री १० वाजून ३३ मिनिटांनी हे जोरदार धक्के बसले. अनेक जण गाढ झोपेत होते, त्यामुळे त्यांना सावरायला वेळच मिळाला नाही. अवघ्या काही सेकंदांच्या धक्क्यांतच ३०० हून अधिक घरे पत्त्याच्या बंगल्यासारखी कोसळली. अनेक कुटुंबांनी आपली जवळची माणसे गमावली असून काही क्षणांत हसते-खेळते संसार उद्ध्वस्त झाले आहेत. परिसरातील वीजपुरवठा आणि दूरसंचार सेवा पूर्णपणे विस्कळीत झाली असून सगळीकडे अंधार पसरला आहे.

चायना अर्थक्वेक नेटवर्क्स सेंटर आणि अमेरिकन भूगर्भीय सर्वेक्षण (USGS) यांच्या माहितीनुसार, भूकंपाचा केंद्रबिंदू उत्तर तिबेटमधील नागचू परिसरातील बाचेन काउंटीच्या मारू टाउनशिपमध्ये होता. तो जमिनीखाली १० किलोमीटर खोलीवर होता. हे ठिकाण तिबेटची राजधानी ल्हासापासून सुमारे ३९० किलोमीटर ईशान्येला आहे.

हा संपूर्ण भाग समुद्रसपाटीपासून ४,८६४ मीटर उंचीवर आणि दुर्गम डोंगराळ प्रदेशात आहे. तिथे हवामान अतिशय थंड आहे आणि भौगोलिक परिस्थितीही कठीण आहे. त्यामुळे मदत आणि बचाव पथकांना घटनास्थळी पोहोचताना आणि ढिगारे हटवताना मोठ्या अडचणींचा सामना करावा लागत आहे.

शुक्रवारी पहाटेपर्यंतच्या माहितीनुसार, जखमींपैकी ११ जणांची प्रकृती अत्यंत चिंताजनक आहे. आपत्कालीन विभागाने संपूर्ण परिसरात अलर्ट जारी केला असून बचाव पथके युद्धपातळीवर शोधमोहीम राबवत आहेत. या दुर्गम आणि अतिउंचावरील पर्वतीय भागात आपत्कालीन विभागाकडून बचावकार्य सुरू आहे.

ढिगाऱ्याखाली आणखी काही नागरिक अडकले असण्याची दाट शक्यता व्यक्त केली जात आहे. प्रशासनाकडून नुकसान नेमके किती झाले आहे, हे तपासण्याचे काम सुरू आहे.