दुष्काळाचा फटका बसलेल्या मच्छीमारांना मदत द्या, सुधीर मुनगंटीवार यांचे मुख्यमंत्र्यांना पत्र

चंद्रपूर जिल्ह्यातील दुष्काळसदृश परिस्थितीमुळे अडचणीत आलेल्या मच्छीमारांना आर्थिक मदत मिळावी, अशी मागणी आमदार सुधीर मुनगंटीवार यांनी केली आहे. यासाठी त्यांनी मुख्यमंत्री देवेंद्र फडणवीस आणि मत्स्यव्यवसाय मंत्री नितेश राणे यांना पत्र पाठवले आहे. बाधित तलावांचे चालू वर्षाचे भाडे माफ करावे, अशीही त्यांची मागणी आहे.

पत्रात म्हटल्याप्रमाणे, जिल्ह्यात यंदा पाऊस कमी झाला. त्यामुळे अनेक नैसर्गिक आणि कृत्रिम तलावांमधील पाण्याची पातळी खूप खाली गेली आहे. याचा फटका फक्त शेतीला बसला नाही, तर मत्स्यव्यवसायावर अवलंबून असलेल्या हजारो कुटुंबांनाही बसला आहे, असे पत्रात नमूद आहे. तलावांतील पाणीसाठा घटल्यामुळे माशांचे संगोपन आणि उत्पादन ठप्प झाले असून, मच्छीमार सहकारी संस्था आणि त्यांचे नोंदणीकृत सदस्य गंभीर आर्थिक संकटात सापडले आहेत, असे मुनगंटीवार यांनी म्हटले आहे.

स्थानिक मच्छीमार सहकारी संस्थांनी हे तलाव भाडेतत्त्वावर घेतले होते. त्यात मत्स्यबीज म्हणजे बोटुकली सोडण्यासाठी आणि माशांच्या संगोपनासाठी त्यांनी मोठी गुंतवणूक केली होती. मात्र ऐन हंगामात तलावातील पाणी आटल्यामुळे मत्स्यसंवर्धनावर वाईट परिणाम झाला. बोटुकली खरेदी, खाद्य आणि तलावभाडे यावर झालेला खर्च भरून काढणेही आता संस्थांना शक्य नाही. उत्पन्न घटल्याने मच्छीमारांच्या वर्षभराच्या उदरनिर्वाहाचा प्रश्न उभा राहिला आहे, असे पत्रात म्हटले आहे.

मत्स्यव्यवसाय करणाऱ्यांना शासनाने शेतकऱ्यांचा दर्जा दिला आहे, याकडे मुनगंटीवार यांनी शासनाचे लक्ष वेधले आहे. त्यामुळे नैसर्गिक आपत्तीत नुकसान झालेल्या मच्छीमारांनाही शेतकऱ्यांप्रमाणेच आर्थिक मदत आणि आवश्यक सवलती मिळण्याचा पूर्ण अधिकार आहे, असे त्यांचे म्हणणे आहे.

पत्रात त्यांनी काही मागण्या स्पष्ट मांडल्या आहेत. जलसंपदा आणि महसूल विभागाने बाधित तलावांचे तातडीने वस्तुनिष्ठ सर्वेक्षण करून नुकसानीचे मूल्यांकन करावे. बोटुकली खरेदी व मत्स्यसंवर्धनासाठी झालेला खर्च आणि घटलेले उत्पन्न लक्षात घेऊन बाधित संस्था आणि सदस्यांना थेट आर्थिक सानुग्रह अनुदान द्यावे. तसेच दुष्काळी परिस्थिती पाहता चालू वर्षाचे तलाव भाडे पूर्णपणे माफ करून या निर्णयाची अंमलबजावणी लगेच करावी, असे त्यांनी पत्रात म्हटले आहे.

नैसर्गिक संकटामुळे मच्छीमारांनी वर्षभराच्या उदरनिर्वाहासाठी केलेली मेहनत आणि भांडवल धोक्यात आले आहे, असे मुनगंटीवार यांचे म्हणणे आहे. अशा वेळी त्यांना फक्त आश्वासनांवर ठेवू नये, तर प्रत्यक्ष आर्थिक मदतीचा भक्कम आधार मिळणे गरजेचे आहे, असेही त्यांनी म्हटले आहे. शेतकऱ्यांप्रमाणेच मत्स्यव्यावसायिकांचे आर्थिक स्थैर्य टिकावे आणि हा व्यवसाय पुन्हा उभा राहावा, यासाठी हा प्रश्न शासनदरबारी तडीस नेण्यासाठी आपण खंबीरपणे पाठीशी उभे आहोत, असे आमदार सुधीर मुनगंटीवार यांनी स्पष्ट केले आहे.