सुट्या मसाल्यांच्या विक्रीवर निर्बंध; लहान विक्रेत्यांना तोटा, सर्वसामान्यांसमोर नवा प्रश्न

अन्न व औषध प्रशासनाचे आयुक्त तुकाराम मुंढे यांनी सुट्या मसाल्यांच्या विक्रीवर बंदी घालण्याचा निर्णय घेतला आहे. या निर्णयाचा परिणाम रोजंदारीवर काम करणाऱ्या मजुरांसह सर्वसामान्य ग्राहक आणि लहान मसाला विक्रेत्यांवर होत आहे. महाराष्ट्रात सुटे मसाले विकणारे आणि ते विकत घेणारे, अशा दोघांसमोर यामुळे नवा प्रश्न उभा राहिला आहे.

पॅकिंगचे मसाले महाग असल्याने अनेक गोरगरीब आणि सर्वसामान्य ग्राहक सुटे मसाले घेण्यालाच प्राधान्य देतात. रोजंदारीवर काम करणारे मजूर आणि कमी उत्पन्न असलेले ग्राहक आपल्या गरजेनुसार 10 ते 50 रुपयांपर्यंतचे सुटे मसाले विकत घेताना दिसतात. म्हणजे त्यांना हवे तेवढेच, हवे तेव्हा घेता येते.

अन्न व औषध प्रशासनाने सुट्या मसाल्यांच्या विक्रीवरील बंदी लागू केल्यास त्याचा आर्थिक फटका सर्वसामान्य ग्राहकांना बसण्याची शक्यता आहे. तसेच रस्त्याच्या कडेला आणि पदपथांवर मसाले विकणाऱ्या लहान विक्रेत्यांनाही त्याचा फटका बसू शकतो.

पॅकिंगचे मसाले महाग असल्यामुळे सर्वसामान्य गरीब ग्राहकांना ते परवडत नाहीत. म्हणूनच सुट्या मसाल्यांच्या विक्रीवर निर्बंध घालताना ग्राहकांची आर्थिक परिस्थिती आणि लहान विक्रेत्यांच्या व्यवसायाचाही विचार झाला पाहिजे, अशी भूमिका मसाले विक्रेत्यांनी मांडली आहे.

पॅकिंग केलेले मसाले महाग असल्याने रोजंदारी मजूर आणि कमी उत्पन्नाच्या ग्राहकांना आर्थिक भार सोसावा लागतो. रस्त्याच्या कडेला आणि पदपथांवर छोटेखानी सुट्या मसाल्यांचा व्यवसाय करणाऱ्या विक्रेत्यांच्या रोजगारावरही परिणाम होताना दिसत आहे. बाजारात मंदी आहे आणि पॅकिंग मसाले सामान्य ग्राहकांच्या आवाक्याबाहेर आहेत. अशा वेळी हा निर्णय फक्त मोठ्या ब्रँडेड कंपन्यांना फायदा करून देणारा आहे, असा सूर लहान व्यापारी आणि विक्रेत्यांमधून उमटत आहे.

मसाला व्यापाऱ्यांनी सांगितले की, यामुळे नुकसान आमचेच होत आहे. जे मसाले बाजारात महाग आहेत, तेच आम्ही स्वस्त दराने विकत आहोत. जे ग्राहक येतात, ते 10 ते 20 रुपयांच्या दराने मसाले घेतात. काही मसाले हजार रुपये किलो दराने विकले जातात. बाजारात मंदी असल्याने ग्राहक कमी आहेत.

सामान्य जनतेसाठी हा निर्णय चुकीचा आहे, असे या व्यापाऱ्यांचे म्हणणे आहे. सामान्य जनता पॅकिंग मसाले कशी खरेदी करणार, असा त्यांचा प्रश्न आहे. मसाले पॅकिंगमध्येच विकण्याची सक्ती म्हणजे मोठ्या कंपन्यांना मोठे करण्याचा प्रकार आहे, अशी प्रतिक्रिया त्यांनी दिली.