अजितदादांची स्वप्ने पूर्ण करण्यासाठी सोमेश्वरच्या सभासदांनी साथ द्यावी, सुनेत्रा पवार यांचे आवाहन

बारामती : सोमेश्वर कारखाना कोणा एकाची खाजगी मालमत्ता नाही, असे उपमुख्यमंत्री सुनेत्रा पवार यांनी स्पष्ट केले. अजितदादांची स्वप्ने पूर्ण करायची असतील, तर सोमेश्वरच्या सभासदांनी साथ द्यावी, असे आवाहन त्यांनी केले. कारखान्याच्या निवडणुकीच्या पार्श्वभूमीवर त्यांनी हे मत मांडले.

श्री सोमेश्वर कारखान्याच्या निवडणुकीत श्री सोमेश्वर कारखाना विकास पुरुष अजितदादा पॅनल उभे आहे. या पॅनलच्या प्रचाराची सांगता सभा झाली आणि त्या सभेत सुनेत्रा पवार बोलत होत्या.

सुनेत्रा पवार म्हणाल्या, सोमेश्वर सहकारी साखर कारखाना हा फक्त ऊस गाळप करणारा उद्योग नाही. हजारो शेतकरी सभासदांच्या संसाराचा तो आधार आहे. शेतकरी, कामगार आणि त्यांची कुटुंबे कारखान्याशी जोडलेली आहेत. त्यामुळे कारखान्याची प्रगती म्हणजे या सर्वांच्या आयुष्यातील प्रगती आहे. कारखाना कुणा एका व्यक्तीची मालमत्ता नसून सभासद हेच त्याचे खरे मालक आहेत, ही भूमिका अजितदादांनी कायम जपली, असेही त्यांनी सांगितले.

अजितदादांच्या निधनानंतरची ही पहिली निवडणूक आहे. त्यांच्या अचानक जाण्याने निर्माण झालेली पोकळी आजही प्रत्येकाला जाणवत आहे, असे त्या म्हणाल्या. मात्र दादांची शिकवण फक्त दुःखात राहण्याची नव्हती, तर संकटांचा सामना करून पुढे जाण्याची होती. दादांवर प्रेम करणाऱ्या जनतेला पोरके होऊ द्यायचे नाही, हा निर्धार करून आपण जबाबदारी स्वीकारली, अशी भावना त्यांनी व्यक्त केली.

प्रचारासाठी सोमेश्वरच्या कार्यक्षेत्रातील गावागावांत, वाड्या-वस्त्यांवर आणि शेतकऱ्यांच्या बांधावर गेल्यावर प्रत्येक ठिकाणी अजितदादांच्या आठवणी ऐकायला मिळाल्या, असे त्यांनी सांगितले. कुणाच्या घरातील छायाचित्रातून, कुणाच्या डोळ्यांतील अश्रूंमधून, तर कुणाच्या आठवणींतून दादा आजही जनतेच्या मनात जिवंत असल्याचे जाणवले. जनतेने दिलेले प्रेम आणि विश्वास आयुष्यभर विसरणार नाही. या प्रेमाचे ऋण विकासकामांच्या माध्यमातून फेडण्यासाठी आपण कटिबद्ध आहोत, असे त्यांनी सांगितले.

निवडणुकीमुळे बदललेल्या राजकीय समीकरणांवर बोलताना त्यांनी स्पष्ट केले की, कारखान्याच्या विकासासाठी काम करणाऱ्या प्रत्येकाला सोबत घेऊन पुढे जाण्याची आपली भूमिका आहे. कोण आपला आणि कोण परका, अशी विभागणी करण्यापेक्षा कारखान्याचे हित सर्वोच्च मानले पाहिजे, असे त्या म्हणाल्या. सभासदांनीही निवडणुकीच्या राजकारणापलीकडे जाऊन कारखान्याच्या भवितव्याचा विचार करावा, असे आवाहन त्यांनी केले.