सांगली जिल्हा बँक निवडणूक: 21 जागांसाठी विक्रमी 351 उमेदवारी अर्ज दाखल
सांगली जिल्हा मध्यवर्ती सहकारी बँकेच्या निवडणुकीसाठी अर्ज भरण्याच्या शेवटच्या दिवशी 147 जणांनी अर्ज भरले. सोमवारी (दि. 5) छाननी होणार आहे.
सांगली जिल्हा मध्यवर्ती सहकारी बँकेच्या पंचवार्षिक निवडणुकीसाठी यंदा उमेदवारी अर्जांचा विक्रम झाला आहे. बँकेच्या 21 जागांसाठी एकूण 351 अर्ज दाखल झाले आहेत. अर्ज भरण्याची मुदत गुरुवारी संपली आणि त्या शेवटच्या दिवशी 147 जणांनी अर्ज दाखल केले.
निवडणूक 22 सप्टेंबर रोजी जाहीर झाली होती. त्यानंतर 24 सप्टेंबरपासून अर्ज भरायला सुरुवात झाली. गुरुवारी शेवटचा दिवस असल्याने बँकेच्या मुख्यालयातील निवडणूक कार्यालयात उमेदवारांसोबत कार्यकर्त्यांचीही मोठी गर्दी झाली होती. शेवटच्या दिवशी अर्ज भरलेल्यांपैकी काही जणांनी याआधीच अर्ज भरलेला असतानाही डमी अर्ज भरल्याचे दिसले.
गुरुवारी अर्ज भरणाऱ्यांमध्ये आमदार इद्रिस नायकवडी, माजी आमदार विक्रमसिंह सावंत, बँकेचे विद्यमान संचालक महेंद्र लाड, अजितराव घोरपडे आणि प्रकाश जमदाडे यांची नावे आहेत. जिल्हा परिषदेचे माजी अध्यक्ष अमरसिंह देशमुख, उपाध्यक्ष ऋषिकेश लाड, सांगली बाजार समितीचे माजी सभापती सुजय शिंदे, दिनकर पाटील आणि कडेगाव पंचायत समितीचे सभापती जितेश कदम यांनीही अर्ज दाखल केले. माजी नगराध्यक्ष वैभव पाटील, बसवराज पाटील, चन्नाप्पा होर्तीकर, रमेश पाटील, सदाशिव खाडे, सिकंदर जमादार आणि केदार नलवडे हेही या यादीत आहेत. बाजार समितीचे माजी उपसभापती महादेव अंकलगी, बाजार समितीचे संचालक बाबासो माळी, तसेच किरण लाड, समित कदम, प्रतिभा पाटील, वैभव पवार, निलेश येसुगडे आणि हणमंत देशमुख यांचाही त्यात समावेश आहे.
एकूण अर्जांमध्ये अनेक दिग्गजांची नावे आहेत. खासदार विशाल पाटील, माजी खासदार संजयकाका पाटील, आमदार डॉ. विश्वजीत कदम, आमदार सुरेश काळे, सत्यजित देशमुख आणि गोपीचंद पडळकर यांनी अर्ज भरले आहेत. माजी आमदार अजितराव घोरपडे, विक्रमसिंह सावंत, सुमनताई पाटील आणि विद्यमान संचालक महेंद्र लाड यांचेही अर्ज आहेत. याशिवाय संग्रामसिंह देशमुख, पृथ्वीराज पाटील, वैभव शिंदे, चिमण डांगे, मनोज शिंदे, बाळासाहेब होनमोरे, अनिता सगरे, अमोल बाबर, देवराज पाटील, विराज नाईक आणि रणधीर नाईक यांनीही उमेदवारी दाखल केली आहे.
या सर्व अर्जांची छाननी सोमवारी (दि. 5) होणार आहे. कोणाचा अर्ज बाद ठरणार, याची धाकधूक उमेदवारांना लागली आहे. यावेळी प्रथमच एवढ्या मोठ्या संख्येने अर्ज आल्याने निवडणुकीत मोठी चुरस होणार, हे स्पष्ट झाले आहे.
निवडणूक जाहीर होण्याआधीच महाविकास आघाडी आणि भाजप यांच्यातील वाद विकोपाला गेला आहे. त्यामुळे कोण कोणाचा काटा काढणार आणि कोणाला रिंगणातून बाजूला व्हावे लागणार, हे छाननीनंतरच समजेल.
