सोमेश्वर निवडणूक: अजितदादांचे विचार पुढे न्यायचे तर कारखाना माझ्या हाती द्या, युगेंद्र पवारांचे आवाहन

सोमेश्वर साखर कारखान्याच्या निवडणुकीची रंगत वाढत असताना श्री सोमेश्वर शेतकरी विकास पॅनलच्या प्रचाराचा नारळ करंजे येथील सोमेश्वर मंदिरात फोडण्यात आला. या वेळी बोलताना राष्ट्रवादी काँग्रेस पक्षाचे (शरदचंद्र पवार) युवा नेते युगेंद्र पवार यांनी सभासदांना आवाहन केले. स्वर्गीय अजितदादांचे विचार घेऊन पुढे जायचे असेल तर कारखाना माझ्या हातात द्या, असे ते म्हणाले.

युगेंद्र पवार यांचे म्हणणे असे की, सोमेश्वर कारखान्याच्या माध्यमातून भारतीय जनता पक्ष बारामती तालुक्यात येण्याचा प्रयत्न करत आहे. मात्र सोमेश्वरचे सभासद खूप सुज्ञ आहेत आणि ते आपल्या भविष्याचा विचार करून निर्णय घेतील, असेही ते म्हणाले.

कारखाना हा सभासदांच्या प्रपंचाचा प्रश्न आहे, असे सांगून युगेंद्र पवार म्हणाले की, त्याला धक्का बसू नये म्हणून शरद पवार कारखान्यात लक्ष घालणार आहेत आणि संचालक मंडळाला सहकार्य करणार आहेत. अजितदादांनंतर सोमेश्वर कारखान्याला शरद पवारांशिवाय पर्याय नाही, असे त्यांनी सांगितले. शरद पवार सातत्याने शेतकऱ्यांचे हित बघतात आणि त्यांना सहकाराचा खूप मोठा अनुभव आहे. म्हणूनच शरद पवारांच्या विचारांचे संचालक मंडळ निवडून द्या, असे आवाहन त्यांनी केले.

स्वतःबद्दल बोलताना युगेंद्र पवार म्हणाले की, मला कारखान्यातील बऱ्यापैकी ज्ञान आहे. त्यामुळे आमचे पॅनल निवडून आल्यावर आठवड्यातील एक दिवस मी स्वतः सोमेश्वर कारखान्याच्या कार्यालयात बसून कामकाजाचा आढावा घेणार आहे. त्यासाठी शरद पवार यांचे मार्गदर्शन घेणार आहे, असे त्यांनी सांगितले.

येत्या काही दिवसांत एकमेकांवर चिखलफेक होईल आणि टीका होतील, असे युगेंद्र पवार म्हणाले. मात्र आपण त्यात पडणार नाही, आपल्यासाठी सभासदांचे हित महत्त्वाचे आहे, असे ते म्हणाले. वैयक्तिक टीकेपेक्षा सकारात्मक प्रचारावर आपला भर आहे, असेही त्यांनी सांगितले.

कार्यक्रमात युगेंद्र पवार यांनी आपल्या पॅनलमधील सर्व उमेदवारांची ओळख करून दिली आणि पॅनलचा जाहीरनामा प्रसिद्ध केला. जिल्हा परिषदेचे माजी अध्यक्ष सतीश खोमणे, ज्येष्ठ कामगार नेते तुकाराम जगताप, जिल्हा परिषदेचे माजी बांधकाम सभापती दत्ताआबा चव्हाण, बारामती पंचायत समितीचे माजी सभापती पोपट पानसरे आणि शरदचंद्र पवार गटाचे तालुकाध्यक्ष राजेंद्र जगताप यांच्यासह मोठ्या संख्येने सभासद उपस्थित होते.

निवडणूक चिन्हांचा उल्लेख करत युगेंद्र पवार म्हणाले की, शिट्टी म्हणजे धोक्याची घंटा आहे. शिट्टी वाजली म्हणजे भाजप आपल्या तालुक्यात प्रवेश करण्याचा प्रयत्न करत आहे, अशी ती सूचना आहे. कपबशीत चहा ओतायचा असेल तर कपबशीला किटलीची गरज लागणारच, अशी कोटी त्यांनी केली.

पत्रकार परिषदेत येत्या काळात किटली आणि कपबशी एकत्र येणार का, असा प्रश्न विचारला गेला. त्यावर ते किटलीने ठरवायचे, असे सूचक उत्तर युगेंद्र पवार यांनी दिले.