लग्नानंतरची पहिली दिवाळी: पूजा बिरारीने सासूबाई आणि आजीच्या फराळाचा घेतला आनंद

'स्वाभिमान' आणि 'येड लागलं प्रेमाचं' या मालिकांमुळे घराघरांत पोहोचलेली अभिनेत्री पूजा बिरारी हिची यंदाची दिवाळी तिच्यासाठी खास ठरली आहे. सोहम बांदेकरसोबत लग्न केल्यानंतरची ही तिची पहिलीच दिवाळी आहे. नव्या घरातला सणाचा उत्साह एका बाजूला आणि 'झी मराठी'वर सुरू होणारी तिची नवी मालिका 'येतेच आता मी नांदायला' दुसऱ्या बाजूला, अशा दुहेरी आनंदात ती दिवाळी साजरी करत आहे.

ही नवी मालिका येत्या 30 नोव्हेंबरपासून सुरू होणार आहे. तिच्या शूटिंगच्या धावपळीत पूजाला स्वतः फराळ बनवायला वेळ मिळाला नाही. तरीही सासूबाईंनी आणि आजीने बनवलेला फराळ खाऊन तिने दिवाळीचा मनमुराद आनंद घेतला.

दिवाळीबद्दल बोलताना पूजा म्हणाली, "दिवाळी हा माझा सगळ्यात आवडता सण आहे. नवीन वर्षाचं कॅलेंडर हातात आल्यावर मी सगळ्यात आधी दिवाळी कधी आहे, हेच बघते. सध्या नवीन मालिकेचं शूटिंग सुरू असल्याने मला फराळ बनवायला वेळ मिळाला नाही. पण माझ्या सासूबाईंनी बेसनाचे लाडू आणि आजीने शंकरपाळी बनवली आहे. थोडक्यात, मी स्वतः काही बनवलं नसलं तरी फराळ मात्र पोटभर खाल्लाय."

पुढे गमतीने ती म्हणाली की, एकीकडे पूजा म्हणून ती बांदेकरांच्या घरी नांदायला आली आहे, तर दुसरीकडे 'शिवानी कदम' बनून प्रेक्षकांच्या मनात 'येतेच आता मी नांदायला' म्हणते आहे. हे ऐकून सगळ्यांना हसू आलं. शूटिंग सुरू असूनही तिने घरातल्या सगळ्या गोष्टींमध्ये भाग घेतला आहे.

पहिल्या पाडव्याबद्दल पूजाने उत्सुकता बोलून दाखवली. ती म्हणाली, "लग्नानंतरची ही पहिलीच दिवाळी असल्याने घरात वेगळाच उत्साह आहे. शॉपिंगचाही मोठा प्लॅन आहे. पहिल्या पाडव्याला सोहमला ओवाळणे आणि त्या बदल्यात ओवाळणी म्हणून सोहमकडून मिळणारं खास गिफ्ट, याबद्दल मला खूप उत्सुकता आहे." सोहमनेही काहीतरी खास प्लॅन केला असल्याचं कळतं.

लहानपणीच्या आठवणी सांगताना पूजाने सांगितलं की, तिची दिवाळी तेव्हा मामाच्या गावी आजी-आजोबांकडे साजरी व्हायची. कॉलेजच्या दिवसांत तिने पुण्यात दिवाळी साजरी केली.

फटाक्यांमुळे होणाऱ्या प्रदूषणाबद्दल तिला लहानपणापासून माहिती होती, असं ती म्हणाली. "आई-बाबांनी मला कधी रोखलं नाही, तरी मी फक्त 2 ते 3 फटाके फोडायची आणि भरपूर दिवे लावून दिवाळी साजरी करायची. लहान वयातच दिवाळीची खरी मजा फटाक्यांमध्ये नसून कुटुंबासोबत वेळ घालवण्यात आहे, हे मला समजलं होतं," असं पूजाने सांगितलं.

घरातल्या परंपरेबद्दलही तिने आवर्जून सांगितलं. दिवाळीच्या काळात घरात दरवळणारा फराळाचा सुगंध आणि अभ्यंगस्नानानंतर कोवळ्या उन्हात बसून संपूर्ण कुटुंबाने एकत्र फराळ खाणे, ही त्यांच्या घरातली खास परंपरा आहे. अभ्यंगस्नान झालं की सगळ्यांनी एकत्र बसून फराळ खायचा आणि गप्पा मारायच्या, हाच दिवाळीचा खरा आनंद असतो, असं पूजा म्हणाली.

नवं घर, नवं कुटुंब, नवी मालिका आणि पहिला पाडवा, अशा सगळ्या नव्या गोष्टींनी पूजासाठी यंदाची दिवाळी भरलेली आहे. 'येतेच आता मी नांदायला' ही तिची नवी मालिका 30 नोव्हेंबरपासून सुरू होत आहे.