जयबद्दलच्या शर्वरीच्या मनातलं मॅकने ओळखलं, 'सनई चौघडे'ला नवं वळण

झी मराठीवरील 'सनई चौघडे' या मालिकेत लवकरच एक मोठं वळण येणार आहे. शर्वरी आणि जय खानोलकर यांची जोडी प्रेक्षकांना खूप आवडते. दोघांची मस्ती, भांडणं आणि मैत्री पाहायला लोकांना मजा येते. सध्या मराठी मालिकांमध्ये जोरदार स्पर्धा सुरू आहे. प्रत्येक चॅनल आपली मालिका टॉपला यावी म्हणून प्रयत्न करतंय आणि त्यात झी मराठीच्या मालिका नेहमीच पुढे असतात.

काही दिवसांपूर्वी गणपतीसाठी परब आणि खानोलकर कुटुंब कोकणात गेलं होतं. तिथे जयला शर्वरीचं एक वेगळंच रूप पाहायला मिळालं. तेव्हापासून आपण शरूच्या प्रेमात पडतोय, असं त्याला वाटू लागलं. शर्वरीला मात्र आपण फक्त चांगले मित्र आहोत असंच वाटत होतं. प्रेमाची जाणीव तिला अजून झाली नव्हती. आता ही गोष्ट बदलणार असून आपल्याला जय आवडू लागला आहे, हे शर्वरीला कळणार आहे.

झालं असं की कामासाठी जय आणि रावी दुबईला निघाले. वरवर पाहता ते दोघं प्रेमाचं नाटक करत आहेत आणि तेही शर्वरीनेच त्यांना सांगितलं आहे. तरीही जय दुबईला जातोय म्हटल्यावर शर्वरीला आतून वाईट वाटलं. एकदा खानोलकर कुटुंब परबांच्या घरी बसलेलं असताना जयची आई अचानक म्हणाली, "तुम्हाला दुबईला जायला उशीर होतोय, आवरा लवकर." हे ऐकताच शर्वरीचा चेहरा एकदम पडला. जयने आपल्याला काहीच सांगितलं नाही म्हणून तिला खूप वाईट वाटलं. जयसुद्धा तिला न सांगता जातोय म्हणून थोडा नाराज होता.

आता या मालिकेचा एक नवीन प्रोमो प्रेक्षकांसमोर आला आहे. त्यात शर्वरी मॅकसोबत बसलेली दिसते आणि रागारागात जय आणि रावीचे फोटो डिलीट करत असते. ते पाहून मॅक तिला विचारतो, काय झालं, फोटो का डिलीट करते आहेस? त्यावर शर्वरी म्हणते, "मला न सांगता तो दुबईला कसा गेला?" तिच्या या बोलण्याने मॅकला शंका येते.

तो थेट तिला विचारतो, "ते तुला का सांगतील? तू त्याच्या प्रेमात पडली आहेस का काय?" मॅकच्या या प्रश्नाने शर्वरी एकदम गोंधळून जाते. जयसोबतचे सगळे चांगले क्षण तिच्या डोळ्यांसमोर येऊ लागतात. ती लगेच म्हणते, "मी वेडी आहे का त्याच्या प्रेमात पडायला?" पण पुढच्याच क्षणी ती म्हणते, "पण त्याने मला विसरलेलं मला अजिबात आवडणार नाही." तिच्या याच वाक्यावरून शर्वरीच्या मनात जयबद्दल नक्की काही तरी आहे, हे मॅकला कळतं.

मॅक हा शर्वरीचा सगळ्यात जवळचा मित्र आहे. त्यामुळे या दोघांना एकत्र आणण्यासाठी तो नक्की मदत करणार, असं वाटतंय. जय आणि शर्वरी कधी एकदा एकमेकांना I Love You म्हणतात, याची प्रेक्षक आतुरतेने वाट बघत आहेत. हा सगळा धमाका 8 ऑक्टोबरच्या भागात पाहायला मिळणार आहे. शर्वरीला झालेली प्रेमाची जाणीव मालिकेला आता एका नव्या वळणावर घेऊन जाणार आहे. त्यामुळे झी मराठीवर 'सनई चौघडे' बघायला विसरू नका.