अरुणाचल क्रिकेट संघटनेतील वादामुळे रणजी सामना रद्द, नागालँडला वॉकओव्हर

देशांतर्गत क्रिकेट हंगामाची सुरुवात होत असतानाच अरुणाचल प्रदेशच्या क्रिकेट संघापुढे मोठा पेच उभा राहिला आहे. रणजी ट्रॉफी २०२६-२७ च्या प्लेट ग्रुपमध्ये अरुणाचल प्रदेश आणि नागालँड यांच्यात सामना होणार होता. मात्र अरुणाचलचा संघ सामन्यासाठी आलाच नाही, त्यामुळे नागालँडला वॉकओव्हर मिळाला.

राज्य क्रिकेट मंडळातील अंतर्गत वाद आणि एक न्यायालयीन प्रकरण यामुळे अरुणाचलचा संघ ११ ऑक्टोबर रोजी नागालँडविरुद्ध आपला पहिला रणजी सामना खेळू शकला नाही. एवढेच नव्हे, तर मेघालयाविरुद्धच्या सीके नायडू ट्रॉफीतील पहिल्या सामन्यातूनही संघाला माघार घ्यावी लागली. हे सामने रद्द झाल्याला बीसीसीआयनेही दुजोरा दिला आहे.

हा वाद नेमका काय आहे, ते पाहू. अरुणाचल क्रिकेट असोसिएशन (ACA) सध्या कायदेशीर वादात अडकली आहे. असोसिएशनच्या निवडणुकांवरून दोन गटांमध्ये तीव्र वाद सुरू आहे. अनेक जिल्हा क्रिकेट संघटनांनी निवडणुकीत हेराफेरी आणि अनियमितता झाल्याचा आरोप केला आहे. त्यानंतर हे प्रकरण गुवाहाटी उच्च न्यायालयाच्या इटानगर खंडपीठासमोर पोहोचले. याच कारणामुळे अरुणाचल प्रदेशला २०२६-२७ च्या रणजी ट्रॉफीसाठी आपला संघ जाहीर करता आला नाही.

वरिष्ठ संघातील खेळाडू तेची नेरी यांनी सांगितले की, खेळाडूंसाठी कोणतीही निवड प्रक्रिया, तयारी किंवा सराव शिबिर झालेले नाही. त्यामुळे ते सध्या इटानगरमध्येच अडकून पडले आहेत. या प्रशासकीय संकटाचा फटका ज्युनियर क्रिकेटलाही बसला असून, राज्याचा १९ वर्षांखालील संघ विनू मांकड ट्रॉफीमध्ये सहभागी होऊ शकलेला नाही.

बीसीसीआयचे सचिव देवजित सैकिया यांनी यापूर्वीच स्पष्ट केले होते की, एसीएमधील दोन गटांमधील सध्याच्या तणावामुळे क्रिकेटविषयक निर्णय आणि संघ निवड यांत अडथळा येत आहे. अरुणाचल प्रदेशातील सहा जिल्ह्यांच्या क्रिकेट संघटनांनी एसीएच्या अधिकृत निवडणुकीत नियमांचे उल्लंघन झाल्याचा आरोप केला आहे आणि फेरनिवडणुकीची मागणी केली आहे.

अरुणाचल प्रदेशने खेळण्यास नकार दिल्यानंतर नागालँडला विजेता घोषित करून सहा गुण देण्यात आले. पुढच्या आठवड्यात अरुणाचलचा सामना सिक्कीमविरुद्ध आहे. कायदेशीर प्रक्रिया पुढे सरकली नाही आणि काहीच निकाल लागला नाही, तर हा सामनाही रद्द होऊ शकतो.

गेल्या १७ वर्षांत रणजी ट्रॉफीचा सामना रद्द होण्याची ही पहिलीच वेळ आहे. याआधी २००९ मध्ये सर्व्हिसेस संघाने सुरक्षेच्या कारणास्तव श्रीनगरला जाण्यास नकार दिला होता. त्या वेळी जम्मू आणि काश्मीरला वॉकओव्हरने विजयी घोषित करण्यात आले होते.