आगरकर जाताच जडेजाची एक्सवर कमेंट, अर्ज प्रक्रियेबद्दल थेट विचारणा

अजित आगरकर यांनी मुख्य निवडकर्त्याचे पद सोडताच रवींद्र जडेजाने एक्सवर केलेल्या एका कमेंटकडे सगळ्यांचे लक्ष गेले आहे. बीसीसीआयच्या मुख्य निवड समितीच्या पोस्टवर जडेजा अचानक दिसला आणि त्याने अर्ज प्रक्रियेबद्दल विचारणा केली. त्यावरून आगरकर यांच्या काळात सगळे आलबेल नव्हते, असा अंदाज बांधला जात आहे. जडेजा आगरकर यांच्या निर्णयांवर नाराज होता का, असा प्रश्नही आता विचारला जात आहे.

जडेजा आणि आगरकर यांच्यात कधीही उघड मतभेद दिसले नव्हते, हे खरे आहे. पण आगरकर यांच्या कार्यकाळात एकदिवसीय संघात जडेजाची जागा नेमकी कुठे आहे, याबद्दल सतत अनिश्चितता होती. २०२२ च्या टी-२० विश्वचषकातील दारुण पराभवानंतर आगरकर यांनी टी-२० संघात तरुण खेळाडूंना प्रोत्साहन देण्याचे धोरण राबवले. मात्र २०२४ च्या टी२० विश्वचषकाच्या अगदी आधी रोहित शर्मा, विराट कोहली आणि रवींद्र जडेजा संघात परतले आणि भारताने विश्वचषक जिंकला. विजेतेपद मिळवल्यानंतर लगेचच या तिन्ही दिग्गज खेळाडूंनी टी२० फॉरमॅटमधून निवृत्ती घेतली.

एकदिवसीय संघाचा विचार केला, तर आगरकर यांच्या काळात जडेजाला २०२४ मध्ये श्रीलंकेविरुद्धच्या आणि २०२५ मध्ये ऑस्ट्रेलियाविरुद्धच्या एकदिवसीय मालिकेतून वगळण्यात आले होते. जडेजा हा एकदिवसीय संघाचा महत्त्वाचा भाग आहे, असे आगरकर नेहमी म्हणायचे. पण त्यांच्या निर्णयांवरून ते त्याला खरेच संघाचा भाग मानत होते, असे कधी दिसले नाही. याची खंत जडेजालाही कायम राहिली आहे. आताच्या कमेंटवरून या दोघांमध्ये कधीच सगळे आलबेल होते, असे वाटत नाही.

जडेजाची ही नाराजी याआधीही समोर आली होती. ऑस्ट्रेलिया दौऱ्याच्या आधी वेस्ट इंडिजविरुद्धच्या कसोटी मालिकेदरम्यान त्याला एकदिवसीय संघातून वगळल्याबद्दल विचारले गेले, तेव्हा तो स्पष्ट बोलला होता. तो म्हणाला होता, "निवड माझ्या हातात नाही. मला निश्चितपणे खेळायचे आहे. सरतेशेवटी, संघ व्यवस्थापन, निवड समिती, प्रशिक्षक आणि कर्णधार यांचे स्वतःचे दृष्टिकोन आहेत आणि या मालिकेसाठी माझी निवड न करण्यामागे त्यांची स्वतःची कारणे असली पाहिजेत. त्यांनी माझ्याशी बोलले होते, त्यामुळे संघ जाहीर झाल्यावर मला आश्चर्य वाटले नाही."

जडेजा सोशल मीडियावर फारसा सक्रिय असलेला खेळाडू म्हणून ओळखला जात नाही. त्याने शेवटची प्रतिक्रिया यंदा फेब्रुवारीमध्ये रविचंद्रन अश्विनच्या नेपाळ क्रिकेटबद्दलच्या पोस्टला दिली होती. त्यामुळे बीसीसीआयच्या मुख्य निवड समितीच्या पोस्टवर त्याचे अचानक दिसणे आणि अर्ज प्रक्रियेबद्दल विचारणा करणे, यावरून आगरकर यांच्या कार्यकाळातला त्याचा अनुभव फारसा सुखकर नव्हता, असे दिसते.