मुंबई सिटी एफसीचा कर्णधार आकाश मिश्रा; संघघोषणेतून मराठी रंगभूमीला मानवंदना

इंडियन सुपर लीगचा (ISL) नवा हंगाम लवकरच सुरू होणार असून फुटबॉल चाहत्यांना त्याची उत्सुकता आहे. हंगाम सुरू होण्याआधी सगळे संघ आपापल्या नव्या संघाची घोषणा करत आहेत. याच क्रमात मुंबई सिटी एफसीने (Mumbai City FC) आपला नवा कर्णधार जाहीर केला आहे. विशेष म्हणजे, संघातील वेगवेगळ्या जबाबदाऱ्यांची घोषणा करताना क्लबने मराठी रंगभूमीला अनोखी मानवंदना दिली आहे.

नव्या हंगामात मुंबईच्या संघाचे नेतृत्व आकाश मिश्रा यांच्याकडे सोपवण्यात आले आहे. मुख्य प्रशिक्षक मनोलो मार्केझ यांच्या मार्गदर्शनाखाली संघ हंगामासाठी सज्ज आहे. नेतृत्व गटात कार्लोस डेलगाडो यांच्याकडे उपकर्णधारपदाची जबाबदारी आहे. ब्रँडन फर्नांडिस हे तिसरे, तर वलपुईया हे चौथे कर्णधार म्हणून जबाबदारी सांभाळणार आहेत.

अनुभवी खेळाडूंच्या या गटामुळे संघाला मैदानावर आणि मैदानाबाहेरही योग्य दिशा मिळेल, असा विश्वास क्लबने व्यक्त केला आहे. आकाश मिश्रा हे संरक्षणफळीतले म्हणजेच डिफेंडर म्हणून विश्वासार्ह खेळाडू मानले जातात. आता संघाचे नेतृत्व करण्याची जबाबदारीही त्यांच्यावर आली आहे. खेळाडूंना एकत्र ठेवणे, संघाची मूल्ये जपणे आणि मैदानावर चांगली कामगिरी करण्यासाठी सर्वांना प्रेरणा देणे, यावर त्यांचा भर असेल.

कर्णधारपदी निवड झाल्यानंतर आकाश मिश्रा यांनी आनंद व्यक्त केला. मुंबई सिटी एफसीचे नेतृत्व करणे हा आपल्यासाठी मोठा सन्मान आहे, असे त्यांनी सांगितले. क्लबने दाखवलेल्या विश्वासाबद्दल त्यांनी आभार मानले. संपूर्ण नेतृत्व गट एकत्र काम करून चाहत्यांना अभिमान वाटेल अशी कामगिरी करण्याचा प्रयत्न करेल, असेही त्यांनी स्पष्ट केले.

मुख्य प्रशिक्षक मनोलो मार्केझ यांनीही नव्या नेतृत्व गटावर विश्वास दाखवला. आकाश हा समर्पित खेळाडू आहे आणि मुंबई सिटी एफसीचे प्रतिनिधित्व करण्याची जबाबदारी त्याला समजते, असे ते म्हणाले. आपल्या कामगिरीतून तो इतरांसमोर आदर्श ठेवेल, असा विश्वास मार्केझ यांनी व्यक्त केला. कार्लोस, ब्रँडन आणि वलपुईया यांच्या अनुभवाचाही संघाला फायदा होईल, असे त्यांनी नमूद केले.

क्लबने सोशल मीडियावरून संघाची घोषणा केली, तेव्हा मराठी रंगभूमीच्या समृद्ध परंपरेला मनापासून मानवंदना दिली. महाराष्ट्राच्या सांस्कृतिक वारशातील महत्त्वाचा भाग असलेल्या मराठी नाट्यपरंपरेचा सन्मान करण्याचा हा क्लबचा उपक्रम आहे. त्यामुळे नव्या हंगामातील संघाच्या घोषणेला एक सांस्कृतिक बाज मिळाला असून, क्रीडाप्रेमींसोबत मराठी संस्कृतीवर प्रेम करणाऱ्यांचेही लक्ष त्याकडे गेले आहे.

मुंबई सिटी एफसीच्या नव्या हंगामातील मोहिमेची सुरुवात ११ ऑक्टोबर रोजी गोव्यातील फातोर्डा स्टेडियमवर होणार आहे. तिथे संघाचा सामना चर्चिल ब्रदर्स एफसीविरुद्ध असून, तो सायंकाळी ७.३० वाजता सुरू होईल.