सडक अर्जुनीत ७० पैकी फक्त ७ पाणीपुरवठा योजना सुरू, बडोले यांचे अधिकाऱ्यांना निर्देश

सडक अर्जुनी, ६ नोव्हेंबर - उन्हाळा जवळ येत असताना ग्रामीण भागात पाणीटंचाईचे संकट उभे राहू नये, म्हणून प्रशासनाने आताच नीट नियोजन करावे, असे स्पष्ट निर्देश अर्जुनी मोरगाव विधानसभा क्षेत्राचे आमदार इंजि. राजकुमार बडोले यांनी दिले. पाणीटंचाई निवारणाच्या उपाययोजना प्रभावीपणे राबवाव्यात आणि नागरिकांना पिण्याच्या पाण्यासाठी कोणताही त्रास सहन करावा लागू नये, यासाठी संबंधित विभागाच्या अधिकाऱ्यांनी विशेष दक्षता घ्यावी, असे त्यांनी सांगितले.

पंचायत समिती सडक अर्जुनीच्या सभागृहात आज, ६ नोव्हेंबर रोजी पाणीटंचाई निवारणाबाबत आढावा बैठक झाली. तहसीलदार इंद्रायणी गोमासे यांच्या अध्यक्षतेखाली झालेल्या या बैठकीला आमदार राजकुमार बडोले प्रमुख उपस्थित होते.

ग्रामीण पाणीपुरवठा उपविभाग सडक अर्जुनी अंतर्गत तालुक्यातील वेगवेगळ्या पाणीपुरवठा योजनांचा यावेळी सविस्तर आढावा घेतला गेला. तालुक्यात एकूण ७० पाणीपुरवठा योजना आहेत, पण त्यातील फक्त ७ योजनाच सुरू असल्याचे बैठकीत समोर आले. बहुतेक योजना बंद असल्यामुळे पाणीपुरवठ्याच्या नियोजनावर प्रश्नचिन्ह उभे राहिले आहे. या परिस्थितीची गंभीर दखल घेत बडोले यांनी बंद पडलेल्या योजना तातडीने पुन्हा सुरू करण्याचे निर्देश संबंधित अधिकाऱ्यांना दिले.

तालुक्यातील अनेक गावांत, तसेच दुर्गम वस्त्या आणि वाड्यांमध्ये येत्या काळात पाणीटंचाईची समस्या निर्माण होण्याची शक्यता आहे. त्यामुळे टंचाई आल्यानंतर उपाय शोधण्यापेक्षा संभाव्य परिस्थितीचा आधीच अंदाज घेऊन प्रतिबंधात्मक उपाययोजना राबवणे गरजेचे आहे, असे बडोले यांनी अधोरेखित केले. ज्या गावांत पाण्याची अडचण येण्याची शक्यता आहे, तेथे आवश्यक त्या उपाययोजना तातडीने सुरू कराव्यात, अशा सूचनाही त्यांनी दिल्या.

बैठकीत पाणीटंचाई निवारणाच्या टप्पा क्रमांक १, २ आणि ३ अंतर्गत राबवल्या जाणाऱ्या विविध पाणीपुरवठा योजनांवर सखोल चर्चा झाली. योजनांची सध्याची स्थिती, त्या बंद पडण्याची कारणे, दुरुस्तीची गरज आणि पुढील काळातील पाणीपुरवठ्याचे नियोजन याबाबत संबंधित अधिकाऱ्यांकडून माहिती घेण्यात आली.

फक्त कागदावर नियोजन न करता प्रत्यक्ष गावपातळीवर पाणीपुरवठा सुरळीत राहील, याची जबाबदारी संबंधित विभागाने घ्यावी, असे बडोले यांनी सांगितले. ग्रामसेवक, तलाठी आणि पाणीपुरवठा विभागाच्या अधिकाऱ्यांनी एकमेकांशी समन्वय ठेवून गावनिहाय पाणीटंचाईचा आढावा घ्यावा, असेही ते म्हणाले. तालुक्यातील कोणत्याही गावाला पुढच्या काळात पिण्याच्या पाण्याची अडचण भासू नये, यासाठी प्रशासनाने आतापासूनच ठोस कृती आराखडा तयार करून त्याची काटेकोर अंमलबजावणी करावी, असेही त्यांनी स्पष्ट केले.

या बैठकीला पंचायत समिती सभापती चेतन वडगाये, उपसभापती निशाताई काशीवार, जिल्हा परिषद सदस्य कविताताई रंगारी आणि निशाताई तोडासे, गटविकास अधिकारी आदित्य ठाकरे, सहाय्यक गटविकास अधिकारी टी. एम. खोटेले, पंचायत समिती सदस्य डॉ. रुकीराम वाढई, शिवाजी गहाणे, अल्लाउद्दीन राजानी आणि ग्रामीण पाणीपुरवठा उपविभागीय अभियंता टी. एम. मानकर उपस्थित होते. पाणीपुरवठा योजनेशी संबंधित विविध विभागांचे अधिकारी, ग्रामसेवक आणि तलाठीही बैठकीला हजर होते.