नागपूर जिल्ह्यात चारा व पाणीटंचाईची शक्यता, जिल्हाधिकारी कुमार आशीर्वाद यांचे कडक आदेश

नागपूर जिल्ह्यात जनावरांसाठी सध्या साधारण 260 ते 270 दिवस पुरेल एवढा चारा उपलब्ध आहे. तरीही पुढच्या काळात चाराटंचाई निर्माण होण्याची शक्यता लक्षात घेऊन फेब्रुवारीपर्यंतची गरज भागवण्यासाठी आतापासूनच चारा लागवड आणि कायमस्वरूपी उपाययोजना सुरू करण्याचे निर्देश जिल्हाधिकारी कुमार आशीर्वाद यांनी दिले आहेत.

जिल्हाधिकारी कार्यालयात चाराटंचाईच्या आढाव्यासाठी बैठक झाली. त्यात ते बोलत होते. बैठकीला निवासी उपजिल्हाधिकारी अनूप खांडे, जिल्हा अधीक्षक कृषी अधिकारी डॉ. अर्चना कड आणि पशुसंवर्धन विभागाचे जिल्हा उपायुक्त नितीन फुके हे उपस्थित होते.

लागवडीसाठी जमिनीची माहिती गोळा करण्यास सांगण्यात आले आहे. जलसंपदा आणि सिंचन विभागाने डिसेंबरअखेर उपलब्ध होणाऱ्या गाळपेर जमिनीची तसेच तलावांच्या बुडित क्षेत्राची गावनिहाय माहिती एकत्र करावी, असे सांगितले आहे. चारा लागवडीला योग्य असलेल्या सरकारी पडीक जमिनी आणि इतर उपलब्ध क्षेत्रांची यादी तहसीलदारांनी तयार करावी, असेही त्यांनी म्हटले.

या जमिनीवर चारा पिकवण्याची इच्छा असलेले शेतकरी आणि पशुपालक यांची यादी तालुका कृषी अधिकारी आणि पशुसंवर्धन अधिकारी यांनी करावी, असे त्यांनी सांगितले. त्याचबरोबर चाराटंचाई भासण्याची शक्यता असलेल्या गावांची यादीही तयार करायची आहे.

चारा बियाण्यांसाठी अतिरिक्त निधीची तरतूदही सांगण्यात आली. वैयक्तिक लाभाच्या चारा बियाणे योजनेशिवाय शेतकरी गट किंवा महिला स्वयंसहायता गटांकडून जादा बियाण्यांची मागणी आली, तर जिल्हा नियोजन समितीमार्फत (डीपीसी) त्यासाठी निधी दिला जाईल. ठरलेल्या प्रक्रियेनुसार बियाणे वेळेत शेतकऱ्यांपर्यंत पोहोचेल याची काळजी घ्यावी, असेही सांगितले. पुढे कोरडा आणि ओला चारा साठवण्यासाठी उपलब्ध गोदामे व योग्य जागांची यादी तयार करण्याचे निर्देशही देण्यात आले आहेत.

कृषी आणि पशुसंवर्धन विभागाने चारा लागवड तसेच सरकारी योजनांबद्दल व्यापक जनजागृती करावी, असे त्यांनी सांगितले. जिल्ह्यातील 173 संस्थांच्या प्रतिनिधींसोबत बैठक घेऊन चाऱ्याची उपलब्धता आणि नियोजन यावर चर्चा केली जाईल. शुक्रवारी संध्याकाळपर्यंत सर्व तालुकास्तरीय अधिकारी संयुक्त बैठक घेऊन आवश्यक आकडेवारी आणि आराखडा तयार करतील.

संभाव्य पाणीटंचाईचाही विचार करण्यात आला आहे. चाराटंचाईसोबतच पाणीटंचाईचा सामना करण्यासाठी प्रत्येक गावाचा पेयजल टंचाई निवारण आराखडा तयार करावा, असे कुमार आशीर्वाद यांनी सांगितले. बँक डॅम आणि बोअरवेल यांच्या दुरुस्तीला प्राधान्य द्यावे, असेही ते म्हणाले.

अधिकाऱ्यांनी स्वतः ग्रामपंचायतींना भेट देऊन सरपंच, उपसरपंच आणि गावकऱ्यांशी चर्चा करावी, असे सांगण्यात आले. सर्व संबंधित विभागांनी आपापसात समन्वय ठेवून वेळेत आवश्यक पावले उचलावीत, असे आवाहन जिल्हाधिकारी कुमार आशीर्वाद यांनी केले आहे.