उपवासात गोड खावेसे वाटतेय? झटपट होणारी राजगिऱ्याची पौष्टिक खीर नक्की करून पाहा

शारदीय नवरात्रोत्सवाला ११ ऑक्टोबरपासून सुरुवात झाली आहे. नवरात्रीच्या या नऊ दिवसांत सगळीकडे आनंदाचे आणि उत्साहाचे वातावरण असते. महिलांसोबतच पुरुषही या नऊ दिवसांत उपवास करतात.

उपवासाच्या दिवसांत आहारात वेगवेगळे पदार्थ खाल्ले जातात. अशा वेळी खाण्यासोबतच भरपूर पाणीही प्यावे. मात्र उपवासाला बहुतेकदा वेफर्स आणि तेलकट पदार्थच जास्त खाल्ले जातात. तेच तेलकट पदार्थ वारंवार खाण्यापेक्षा राजगिऱ्याची पौष्टिक खीर खावी.

राजगिऱ्यात कॅल्शियम, लोह, फायबर आणि इतरही अनेक घटक चांगल्या प्रमाणात असतात. उपवासाच्या दिवशी सहज पचणारे पदार्थ आहारात असावेत. ही खीर करायला साहित्य अगदी कमी लागते आणि पदार्थ कमी वेळात तयार होतो. आता ही खीर कशी करायची, ते पाहूया.

खीरसाठी लागणारे साहित्य असे: राजगिरा, साखर, सुका मेवा, वेलची पावडर, काजू, बदाम, दूध, केशर, मखाना आणि तूप.

सर्वप्रथम एका वाटीत राजगिरा घ्या, त्यात पाणी घाला आणि तो तीन तास भिजत ठेवा. त्यामुळे राजगिरा मऊ होईल. त्यानंतर कढईत मखाने मंद आचेवर कुरकुरीत होईपर्यंत भाजून घ्या. असे केल्याने खिरीची चव आणखी छान लागते.

आता कढईत पाणी आणि तूप घालून पाण्याला उकळी काढा. पाण्याला उकळी आली की त्यात भिजवलेला राजगिरा आणि मखाने घाला. कढईवर झाकण ठेवून चार ते पाच मिनिटे मंद आचेवर शिजवा.

राजगिरा आणि मखाना मऊ झाले की त्यात आटवून घेतलेले दूध घाला आणि चमच्याने सतत ढवळत राहा. त्यानंतर त्यात साखर, वेलची पावडर, तुपात भाजलेला सुका मेवा आणि केशराच्या काड्या घालून सगळे व्यवस्थित मिसळून घ्या.

खीर दाटसर झाली की गॅस बंद करा आणि खाण्यासाठी सर्व्ह करा. अशा सोप्या पद्धतीने बनवलेली टेस्टी राजगिऱ्याची खीर उपवासाच्या दिवशी गोड खाण्याची इच्छा भागवते.