कुटुंबाला सांभाळताना स्वतःलाही जपणारी आजची स्त्री, मोहिनी फेम अनघा ठाकूरचं मत

कलर्स मराठीवरील 'मोहिनी' या मालिकेमुळे प्रेक्षकांसमोर आलेली अभिनेत्री अनघा ठाकूर थोड्याच काळात त्यांच्या पसंतीला उतरली आहे. गालावरची खळी आणि लाघवी अभिनय यामुळे तिची सध्या सगळीकडे चर्चा आहे. 'माझ्यातील दुर्गा' या खास सिरीजच्या निमित्ताने तिच्याशी गप्पा झाल्या आणि तिच्या दृष्टीने दुर्गाशक्ती म्हणजे काय, हे तिने सांगितलं.

अनघाने आधी फायनान्शियल अनालिस्ट म्हणून काम केलं आणि मग ती अशा क्षेत्रात आली जिथे कशाचीच शाश्वती नसते. या प्रवासाबद्दल ती हसत म्हणाली की, नोकरी करत असताना FOMO नव्हता. रुपारेल कॉलेजमध्ये असताना थिएटर आणि डान्स केला, त्यामुळे या क्षेत्रात काहीतरी करावं असं वाटत होतं. पण कोरोना आला आणि अचानक सगळं थांबलं. सोशल मीडिया तेव्हा जोरात चालू होता, पण आपण काहीच करत नाही असं तिला वाटत होतं. ती पोस्ट ग्रॅज्युएशन करत होती आणि ऑडिशन कशी द्यायची याचे विचार डोक्यात होते. पाच वर्षं तिने नोकरी केली, पण कलाक्षेत्रात काही करत नसल्याचा तिला त्रास होत होता.

मी प्रचंड आशावादी आहे, असं सांगून ती म्हणाली की, नोकरी करतानाही ती कॉन्टॅक्ट शोधत राहिली, ऑडिशन आणि प्रोफाईलची माहिती घेत राहिली. सोशल मीडियावर प्रॉडक्शन हाऊसना डीएम करून तिने दोन-तीन वर्षं खूप प्रयत्न केले. ऑडिशन्स दिल्यानंतर तिला मोहिनीची भूमिका मिळाली आणि प्रयत्नांना यश आलं.

श्रावणक्वीन ही स्पर्धा आपल्या आयुष्याचा टर्निंगपॉईंट होता, असं अनघाने सांगितलं. स्पर्धेसाठी १५-२० दिवस हवे होते, पण नोकरी करताना तिथे जाऊन राहणं शक्य नव्हतं. तरीही २५ व्या वर्षी काहीही करून भाग घ्यायचा असं ठरवून तिने ऑफिसमध्ये सिक लिव्ह टाकली. ४०० मुलींच्या ऑडिशनमधून १६ जणींत तिची निवड झाली. रॅम्प वॉक आणि ४ इंच हिल्स घालून चालणं हे सगळं तिच्यासाठी नवं होतं. सगळ्या मुली टॅलेंटेड होत्या आणि इनसिक्युरिटीही होती, हे ती नाकारत नाही. तरीही मनात जिंकण्याची जिद्द होती आणि १०० टक्के योगदान दिलं. आजची आधुनिक स्त्री कशी आहे, असा शेवटचा प्रश्न होता; स्वतःशी रिलेट करून दिलेलं उत्तर परीक्षकांना आवडलं आणि ती विजेती ठरली.

मालिकेत ती सध्या तलवारबाजी आणि दांडपट्टा असे थरारक सीन करते. हा वेगळाच अनुभव असून तयारी अगदी बेसिकपासून करावी लागली, असं ती म्हणाली. ऑक्टोबर हिटमुळे त्रास झाला आणि सराव करताना हाताला खूप लागलं, पण मज्जाही आली. सकाळी ९.३० ला सुरू करून ३-४ वाजेपर्यंत तेच चालू असायचं. तेव्हा जिजाऊ, ताराराणी आणि झाशीची राणी डोळ्यांसमोर आल्या, अंगावर काटा आला. ऐतिहासिक स्त्री पात्र करायला मिळावं, अशी तिची खूप इच्छा आहे.

आजची दुर्गा कशी आहे, यावर ती एक क्षणही न थांबता म्हणाली की, आजची मुलगी स्वाभिमान नक्की जपते आणि स्वतःची स्वप्नं पूर्ण करण्याला महत्त्व देते. पूर्वीच्या महिला स्वतःला मागे ठेवून नवरा-मुलगा पुढे जाऊ दे असं म्हणायच्या. आताची स्त्री मात्र स्वतःसकट कुटुंबाला जपणारी आहे आणि त्यात काहीच चुकीचं नाही, असं तिला वाटतं. प्रत्येक मुलीला पुढे जाण्याची आणि स्वतःला सिद्ध करण्याची संधी मिळायलाच हवी.

सुरुवातीला शारीरिक आणि मानसिक दमछाक झाल्याचं तिने सांगितलं. ८-९ महिन्यांपासून ती १२ तासांची शिफ्ट करते. ६ महिने तिने सुट्टी घेतली नाही, पण आता सगळं सोपं जातं आणि आई-बाबांनाही वेळ देता येतो. वर्षातून एकदा हेल्थ चेक अप करायलाच हवा, प्लानिंग आणि मॅनेजमेंट गरजेचं आहे, असं ती म्हणाली.

इंडस्ट्रीत काय बदलावं, असं विचारल्यावर ती म्हणाली की, ती न्यूकमर आहे आणि इथे पीएफ, मेडिक्लेम असं काहीच नाही. ऑफिसमध्ये सिक्युरिटी असते, इथे नाही. हा कॉर्पोरेट आणि इंडस्ट्रीमधला फरक आहे आणि तो बदलायला हवा, असं तिला मनापासून वाटतं.

अन्याय सहन न करण्याचा अनुभव सांगताना ती म्हणाली की, १५ वर्षांची असल्यापासून ती मुंबईत एकटी राहते. माटुंग्याला यशवंत नाट्यगृहाच्या बाजूच्या बिल्डिंगमध्ये राहत असताना ती बिस्किट आणायला खाली गेली. एक माणूस तिच्याकडे बघत होता आणि नंतर पाठलाग करत आला. ती घाबरली, पण नशेत असलेल्या त्या माणसाला तिने जोरात ढकललं आणि आरडाओरडा केला. प्रत्येक मुलीने शारीरिक आणि मानसिकरित्या मजबूत असलं पाहिजे, कारण कोणत्याही क्षणी दुर्गेचं रूप घ्यावं लागतं, असं ती म्हणाली.

तिच्या आयुष्यातली दुर्गा तिची आई आहे, कारण ती प्रचंड आशावादी आणि सकारात्मक आहे. कामाच्या बाबतीत हयगय करायची नाही, हे तिच्याकडूनच आलं. चाहत्यांना तिने संदेश दिला की, मस्त रहा आणि कायम स्ट्राँग रहा.