दुबईत अल बरशा पॉन्ड पार्कमध्ये पहिले 'वर्क फ्रॉम पार्क' केंद्र सुरू

ऑफिसच्या बंदिस्त चार भिंतींमध्ये किंवा कॅफेमधल्या गोंगाटात काम करून कंटाळलेल्यांसाठी दुबईत एक नवी सोय सुरू झाली आहे. दुबई नगरपालिकेने 'वर्क फ्रॉम पार्क' (Work From Park) ही संकल्पना प्रत्यक्षात आणली असून, दुबईतील पहिल्या अधिकृत केंद्राचे उद्घाटन अल बरशा पॉन्ड पार्क (Al Barsha Pond Park) येथे करण्यात आले आहे.

आता नोकरदार, फ्रीलान्सर्स आणि स्टार्टअप उद्योजक हिरव्यागार झाडांच्या सावलीत, तलावाच्या पार्श्वभूमीवर बसून आपले ऑफिसचे काम करू शकतील. हा प्रकल्प 'लेट्सवर्क' (LetsWork) हा फ्लेक्सिबल वर्कस्पेस प्लॅटफॉर्म आणि 'ग्रुप अमाना' (Group AMANA) ही शाश्वत बांधकाम कंपनी यांच्या भागीदारीतून उभारण्यात आला आहे. इथे फक्त बसायला बाक नाही, तर कामासाठी आधुनिक आणि आरामदायक वातावरण तयार केले आहे.

उद्यानातील मोकळ्या हवेत, झाडांच्या सावलीत आणि इमारतीच्या छतावर (Rooftop) असलेले आऊटडोअर डेस्क पूर्णपणे मोफत आहेत. कोणताही नागरिक किंवा पर्यटक आधी बुकिंग न करता या जागेचा आणि हाय-स्पीड इंटरनेटचा वापर करू शकतो.

उन्हाचा त्रास टाळायचा असेल किंवा शांततेत काम करायचे असेल, तर वातानुकूलित (Climate-Controlled) इंडोर वर्कस्पेसही आहे. त्यात तीन मुख्य विभाग आहेत. पहिला को-वर्किंग झोन (Co-working Zone), जिथे एकाच वेळी ३० जण काम करू शकतात. ५० दिरहॅम (AED 50, सुमारे १,१५० रुपये) दैनंदिन पासमध्ये दिवसभर काम करता येते आणि एक कॉफी किंवा चहा मोफत मिळतो.

दुसरा विभाग मीटिंग रूम्सचा आहे. ९ जणांची क्षमता असलेल्या दोन अत्याधुनिक मीटिंग रूम्स उपलब्ध असून, त्यात प्रेझेंटेशनसाठी ऑडिओ-व्हिज्युअल स्क्रीन आणि व्हाईटबोर्ड आहे. तिसरा विभाग वर्कस्पेस सूट्स (Workspace Suites) चा आहे. फ्रीलान्सर्स, स्टार्टअप्स आणि कंपन्यांना १ महिन्यापासून १ वर्षापर्यंतच्या कालावधीसाठी फिक्स डेस्क आणि प्रायव्हेट ऑफिस भाड्याने घेता येते.

बुकिंग करणे सोपे आहे. वापरकर्ते LetsWork App, अधिकृत वेबसाईट किंवा थेट WhatsApp (04 581 3652) वरून काही मिनिटांत आपली सीट किंवा मीटिंग रूम बुक करू शकतात.

या वर्कस्पेसच्या उभारणीत उद्यानातील झाडांना किंवा नैसर्गिक सौंदर्याला कोणतीही हानी पोहोचवलेली नाही. 'डूबॉक्स' (DuBox) या ऑफ-साइट मॉड्यूलर बांधकाम तंत्रज्ञानाचा वापर करून हे स्ट्रक्चर बाहेर तयार करण्यात आले आणि नंतर पार्कमध्ये असेंबल करण्यात आले.

या उपक्रमामुळे पालकांना मोठा दिलासा मिळाला आहे. मुले उद्यानात खेळत असताना किंवा झोपाळ्यावर मजा करत असताना शेजारी बसून त्यांना लॅपटॉपवर काम करता येईल. उद्यानातील जॉगिंग ट्रॅक (Jogging Tracks), सायकल ट्रॅक, खेळाची मैदाने आणि रेस्टॉरंट्स पूर्वीप्रमाणेच सुरू राहतील.

हा उपक्रम 'दुबई २०४० अर्बन मास्टर प्लॅन' (Dubai 2040 Urban Master Plan) आणि 'दुबई इकॉनॉमिक अजेंडा D33' या दूरदृष्टीचा एक महत्त्वाचा भाग आहे. अल बरशा पॉन्ड पार्कमधील या पहिल्या प्रयोगाच्या यशानंतर दुबईतील इतर प्रमुख सार्वजनिक उद्यानांमध्येही अशी 'वर्क फ्रॉम पार्क' केंद्रे उभारली जाणार आहेत.