नागपुरात क्रेन कोसळून दोन मजुरांचा मृत्यू, दोघे गंभीर जखमी

नागपुरात बांधकामाच्या ठिकाणी निष्काळजीपणाचे एक भीषण चित्र समोर आले आहे. या दुर्घटनेत दोन मजुरांचा जीव गेला आणि दोन कुटुंबांवर आयुष्यभराचे दुःख कोसळले. गणेशपेठ पोलीस स्टेशनच्या हद्दीत कॉटन मार्केटमधील म्हाडा परिसरात टेक्सटाइल पार्कचे काम सुरू आहे. तिथे सुमारे 100 फूट उंचीवर काम करणाऱ्या क्रेनचा वरचा भाग अचानक तुटून खाली कोसळला. यात दोन मजुरांचा मृत्यू झाला, तर इतर दोघे गंभीर जखमी आहेत.

म्हाडा परिसरात टेक्सटाइल पार्क आणि कमर्शियल कॉम्प्लेक्स उभारले जात आहे. या कामासाठी परिसरात दोन अवाढव्य क्रेन बसवण्यात आल्या होत्या. सकाळी 10.30 वाजता त्यातील एका क्रेनचा सुमारे 100 फूट उंचीवरचा वरचा भाग अचानक तुटून खाली पडला. उंचावरून पडलेला हा जड भाग जवळच उभ्या असलेल्या दुसऱ्या क्रेनवर जाऊन आदळला. अपघात इतका भयंकर होता की बांधकामाच्या जागी काम करणारे मजूर त्याच्या तडाख्यात सापडले. काही क्षणांतच संपूर्ण परिसरात किंकाळ्या आणि धावपळ सुरू झाली.

या दुर्घटनेत चार मजूर गंभीर जखमी झाले. घटनेची माहिती पोलीस आणि फायर ब्रिगेडला देण्यात आली. जखमी मजुरांना रुग्णालयात नेण्यात आले. तिथे भंडारा येथील रहिवासी विश्वनाथ कठाने आणि उत्तर प्रदेशातील मुकेश निशाद यांना मृत घोषित करण्यात आले. म्हणजेच चार जखमींपैकी दोघांचा मृत्यू झाला असून बाकीच्या दोन जखमींवर उपचार सुरू आहेत. हे दोन जीव सध्या मृत्यूशी झुंज देत आहेत.

100 फूट उंचीवर काम करणाऱ्या क्रेनचा भाग नेमका कसा तुटला, हा सर्वात मोठा प्रश्न आहे. काम सुरू करण्यापूर्वी क्रेनची तांत्रिक तपासणी झाली होती का, यंत्रसामग्रीची नियमित देखभाल होत होती का आणि सर्वात महत्त्वाचे म्हणजे मजुरांचा जीव वाचवण्यासाठी घटनास्थळी पुरेशी सुरक्षा व्यवस्था होती का, या प्रश्नांची पोलीस चौकशी करत आहेत.

या बांधकामाचे कंत्राट म्हाडाकडून बी.जी. शिर्के कन्स्ट्रक्शन टेक्नॉलॉजी प्रायव्हेट लिमिटेड या कंपनीला देण्यात आले आहे. दुर्घटनेच्या वेळी कंपनीचे अधिकारीही तिथे हजर होते, असे सांगितले जाते.

शहरात खासगी आणि सरकारी अशी अनेक मोठी कामे सुरू आहेत. तिथे सुरक्षा नियमांचे पालन होत नाही. दुर्घटना घडल्यानंतरच यंत्रणा सक्रिय होते. या प्रकरणी डीसीपी झोन-3 राहुल मदने यांची बाईट घेण्यात आली.