छठपूजेसाठी मुंबई महापालिकेची तयारी, परवानग्यांसाठी एक खिडकी योजना राबवणार

मुंबई शहर आणि उपनगरांत यंदाही छठपूजा उत्साहात आणि सुरळीतपणे पार पडावी, यासाठी मुंबई महानगरपालिकेने (BMC) खास नियोजन करावे, अशी मागणी पुढे आली आहे. भाविकांना लागणाऱ्या सुविधांवर चर्चा करण्यासाठी गुरुवारी महापालिका आयुक्त कार्यालयात एक बैठक झाली. या बैठकीला 20 हून अधिक छठपूजा समित्यांचे प्रतिनिधी हजर होते. त्यांनी आपल्या सूचना आणि मागण्या मांडल्या. त्यानुसार गरज असलेल्या सुविधा उपलब्ध करून देण्याचे आश्वासन महापालिका आयुक्त अश्विनी भिडे यांनी दिले.

मढ-मार्वे, जुहू चौपाटी, गिरगाव चौपाटी, दादर चौपाटी आणि बाणगंगा अशा ठिकाणी छठपूजेसाठी भाविक मोठ्या संख्येने जमतात. त्यातही जुहू चौपाटीवर सुमारे पाच लाख भाविक येतात, त्यामुळे तिथे पुरेशा सुविधा हव्यात, अशी मागणी बैठकीत झाली. सार्वजनिक स्वच्छतागृहे, कपडे बदलण्यासाठी वेगळ्या खोल्या, पिण्याचे पाणी आणि इतर मूलभूत सोयी यावर समित्यांच्या प्रतिनिधींनी विशेष भर दिला.

गरजेनुसार मुंबईत वेगवेगळ्या ठिकाणी कृत्रिम तलाव तयार करावेत, छठपूजेच्या काही दिवस आधी सर्व चौपाट्यांची साफसफाई करावी आणि गिरगाव चौपाटीवर पूजा-अर्चेसाठी व्यासपीठ उभारावे, अशाही मागण्या करण्यात आल्या. छठपूजेसाठी लागणारे साहित्य आणि इतर सोयी महापालिकेने द्याव्यात, अशी अपेक्षाही प्रतिनिधींनी बोलून दाखवली.

पूजेच्या आयोजनासाठी लागणाऱ्या परवानग्या सहज मिळाव्यात म्हणून महापालिकेच्या सर्व संबंधित विभागीय कार्यालयांमध्ये एक खिडकी योजना राबवण्याबाबत सूचना दिल्या जातील, असे महापालिकेकडून सांगण्यात आले. तसेच प्रत्येक ठिकाणी समन्वयासाठी नोडल अधिकारी नेमला जाईल. गरज पडल्यास आणखी कृत्रिम तलाव उभारणे, अग्निशमन दलाची व्यवस्था, पिण्याचे पाणी, सीसीटीव्ही यंत्रणा, विद्युत रोषणाई, फिरती स्वच्छतागृहे आणि कपडे बदलण्यासाठी खोल्या उपलब्ध करून देण्याचे आश्वासनही महापालिकेने दिले.

मुंबई महानगरपालिका इतर सणांच्या वेळी जशा सुविधा देते, त्याच धर्तीवर छठपूजेसाठीही व्यवस्था केली जाईल, असे आयुक्त अश्विनी भिडे यांनी सांगितले. भाविकांची कोणत्याही प्रकारे गैरसोय होऊ नये, याची विशेष काळजी घेतली जाईल, असेही आश्वासन त्यांनी दिले. या वेळी भाजप मुंबई उपाध्यक्ष आचार्य पवन त्रिपाठी, नगरसेवक बाळा तावडे, महापालिकेचे अधिकारी आणि समित्यांचे प्रतिनिधी उपस्थित होते.

कॅबिनेट मंत्री मंगलप्रभात लोढा यांनीही भाविकांना सुविधा देण्याचे आवाहन केले आहे. छठपूजा हा श्रद्धेचा आणि सांस्कृतिक परंपरेचा महत्त्वाचा उत्सव आहे, असे सांगत त्यांनी मागणी केली की महापालिकेने पूजास्थळांवर कृत्रिम तलाव, स्वच्छता, पिण्याचे पाणी, स्वच्छतागृहे अशा सोयी द्याव्यात. एक खिडकी योजनेतून परवानग्यांची प्रक्रिया सोपी करून भाविकांची गैरसोय टाळावी, असेही ते म्हणाले. मुंबईची सर्वसमावेशक संस्कृती जपत छठपूजा उत्सव सुरक्षित आणि उत्साहात नक्कीच पार पडेल, असेही लोढा यावेळी म्हणाले.