मूलमध्ये शेतात कापूस वेचताना वाघाची झडप, ५० वर्षांचे शेतकरी गंभीर जखमी

चंद्रपूर जिल्ह्यातील मूल तालुक्यात कापसाच्या शेतात काम करणाऱ्या एका शेतकऱ्यावर वाघाने हल्ला केला. दाबगाव मक्ता परिसरातील कक्ष क्रमांक ३० मध्ये ही घटना घडली. सुनील मोतीराम कोडापे (वय ५०, रा. दाबगाव मक्ता) हे या हल्ल्यात गंभीर जखमी झाले आहेत. या प्रकारामुळे तालुक्यात भीतीचे वातावरण आहे.

कोडापे हे मौजा चक कन्हळगाव येथील आपल्या शेतात आठ ते दहा मजुरांसह कापूस वेचणीसाठी गेले होते. सगळे जण कामात गुंतलेले असताना दबा धरून बसलेल्या वाघाने अचानक त्यांच्यावर झडप घातली. हल्ला इतका अचानक झाला की बचावाची संधीच त्यांना मिळाली नाही. जवळच काम करणाऱ्या इतर मजुरांनी आरडाओरडा केला आणि त्यामुळे वाघ तिथून पळून गेला. त्यामुळे मोठा अनर्थ टळला.

घटनेची माहिती मिळताच वनविभागाचे वनपाल मनीष निमकर, वनरक्षक कवळे आणि त्यांचे पथक लगेच घटनास्थळी पोहोचले. सहकाऱ्यांच्या मदतीने कोडापे यांना तातडीने मूल येथील उपजिल्हा रुग्णालयात नेण्यात आले. तिथे प्राथमिक उपचार झाले, पण प्रकृती गंभीर असल्याने पुढील उपचारांसाठी त्यांना चंद्रपूर येथील जिल्हा सामान्य रुग्णालयात हलवण्यात आले.

चिचपल्ली वनपरिक्षेत्राचे वनक्षेत्राधिकारी महेशकर यांनी मूल येथील उपजिल्हा रुग्णालयात जाऊन कोडापे यांची भेट घेतली आणि त्यांच्या प्रकृतीची आस्थेने विचारपूस केली. वनविभागाच्या वतीने तातडीची आकस्मिक आर्थिक मदत म्हणून १० हजार रुपयांचा चेकही त्यांना देण्यात आला.

यंदा पावसाने पाठ फिरवली आणि तालुक्यात दुष्काळी परिस्थिती निर्माण झाली, त्यामुळे शेतकरी आधीच आर्थिक अडचणीत आहेत. हाताशी आलेले पीक वाचवण्यासाठी आणि मजुरीसाठी त्यांना जीव धोक्यात घालून शेतात जावे लागत आहे. वन्यप्राण्यांचा वावर दिवसेंदिवस वाढत आहे आणि थेट हल्लेही होत आहेत, त्यामुळे शेतकरी हवालदिल झाले आहेत. दिवाळी अवघ्या काही दिवसांवर असताना ही घटना घडल्याने शेतकरी कुटुंबांमध्ये दुःख आणि चिंता पसरली आहे.

शेतीचा हंगाम सुरू असल्याने शेतकरी आणि मजुरांना जीव मुठीत धरून काम करावे लागत आहे. म्हणूनच दाबगाव मक्ता, चक कन्हळगाव आणि आसपासच्या परिसरात वनविभागाने तातडीने गस्त वाढवावी, वाघाच्या हालचालींवर बंदोबस्त ठेवावा आणि शेतात जाणाऱ्या लोकांच्या सुरक्षिततेसाठी ठोस उपाययोजना कराव्यात, अशी संतप्त मागणी परिसरातील नागरिक करत आहेत. शेतकऱ्यांच्या जिवाचा प्रश्न ऐरणीवर आला असून प्रशासनाने या गंभीर प्रकरणाची तातडीने दखल घ्यावी, अशी अपेक्षा व्यक्त होत आहे.