अतिष कदम यांच्यावरील हल्ल्याच्या निषेधार्थ मेढ्यात सर्वपक्षीय मोर्चा, आरोपींना अटकेची मागणी

पंचायत समिती सदस्य अतिष कदम यांच्यावर पोलीस ठाण्यात हल्ला झाला होता. त्यातील आरोपींना तात्काळ अटक करून त्यांच्यावर कठोर कारवाई करावी, अशी मागणी करत आज मेढा येथे सर्वपक्षीय मोर्चा काढण्यात आला. उषा उंबरकर यांच्यावर झालेल्या अन्यायाच्या विरोधातही हा मोर्चा होता.

दुपारी वेण्णा चौकापासून निषेध मोर्चाला सुरुवात झाली आणि तो मेढा पोलीस ठाण्यावर नेण्यात आला. मेढ्यातील मुख्य चौकात एकनाथ ओंबळे यांच्यासह प्रमुख मंडळींची भाषणे झाली. मोर्चात शिवसेना, राष्ट्रवादी, मनसे आदी पक्षांचे नेते आणि कार्यकर्ते सहभागी झाले होते. एकनाथ ओंबळे, सुनिता ओंबळे, सुनिता दुंदळे, शिल्पा शिंद, मोहनराव शिंदे, सुरेश पार्टे, समीर गोळे, सचिन करंजेकर, सोनाली पवार, रणधीर गोरे, सचिन जवळ, नारायण शिंगटे, राम कदम यांच्यासह तालुक्यातील महिला आणि पुरुष मोठ्या संख्येने या निषेध मोर्चात उतरले होते.

छत्रपती शिवाजी महाराज चौकात बोलताना वाशी महानगरपालिकेचे नगरसेवक अंकुशबाबा कदम म्हणाले, की जावली तालुक्याने तुम्हाला चार टर्म निवडून दिले, प्रेम दिले, त्याच जावलीत तुम्ही दहशत माजवण्याचे काम करत आहात. जावलीतील जनता हे कदापि सहन करणार नाही, असे ते म्हणाले. छत्रपतींच्या काळात शेतकऱ्याच्या पिकाच्या देठाला हात लावण्याची हिंमत कुणात नव्हती, असेही त्यांनी सांगितले. तुम्ही स्वतःला शिवरायांचे वंशज म्हणवता ना, मग त्यांचा एक टक्का तरी आदर्श घ्यावा, अशी कळकळीची विनंती त्यांनी केली.

अतिष कदम यांच्या घरासमोर गुलाल उधळला गेला आणि फटाके फोडले गेले, याकडे अंकुशबाबा कदम यांनी लक्ष वेधले. घरात दोन महिन्यांचे बाळ असताना फटाके घरात जाईपर्यंत फोडले जातात, एवढा कसला उन्माद, सत्तेचा माज आणि सत्तेची मस्ती पाहिजे, असा सवाल त्यांनी केला. एका महिलेला "उषा कुठं गेलीस, कोणत्या बिळात गेलीस" असे म्हणणे म्हणजे सत्तेचा उन्मादच आहे, अशी टीका त्यांनी केली.

रस्त्यांची कामे ओरबाडून घ्यायची, ठेकेदार बनायचे, ठेके घ्यायचे, त्यातून पैसा मिळवायचा आणि माज करायचा, पण हा माज आम्ही उतरवल्याशिवाय राहणार नाही, असा दम अंकुशबाबा कदम यांनी दिला. आम्ही छत्रपतींना मानणारे आहोत, पण तालुक्यात दहशत आणि गुंडगिरी आता सहन करणार नाही, असे ते म्हणाले. जनता सुज्ञ आहे, असेही त्यांनी सांगितले. परळी भागात एक वाल्मिक कराड तयार केला आणि जावलीतही एक वाल्मिक कराड तयार केला, पण जावलीतील जनता हे कदापि सहन करणार नाही, असे त्यांनी ठणकावून सांगितले. दुंद गावाला पाणी देणाऱ्यांना मंत्र्यांनी दम द्यायचा, एवढी वाईट अवस्था आहे, पण हा माज उतरवण्याचे काम आम्ही करू, असेही ते म्हणाले.

मेढा पोलीस ठाण्याचे सहाय्यक पोलीस निरीक्षक सुधीर पाटील यांनी निवेदन स्वीकारले. दोन जणांना अटक केली असल्याचे सांगून, तिसऱ्या आरोपीला आज रात्रीपर्यंत अटक करू, असे आश्वासन त्यांनी दिले.

नेते एकनाथ ओंबळे यावेळी म्हणाले, की जावलीकर शांत आणि संयमी आहेत, मात्र काहींना जावळीचा बिहार बनवायचा आहे. जावलीकर हे कदापि सहन करणार नाहीत, असे ते म्हणाले. जिल्हा परिषद निवडणुकीत येथील जनतेने आपली जागा दाखवली आहे, असेही त्यांनी सांगितले.