कुडाळ-मेढा मार्गावरील निरंजना नदीचा पूल अर्धवटच; अवजड वाहनांना परवानगी, पण विद्यार्थ्यांची एसटी बंद

कुडाळ-मेढा मार्गावरील निरंजना नदीच्या पुलाचे काम कोट्यवधींचा निधी खर्च करून गेल्या वर्षभरापासून सुरू आहे. एवढा निधी खर्च होऊनही हे काम अजून अर्धवटच आहे. याच पुलावरून काही अवजड वाहनांची वाहतूक सुरू झाली आहे, पण विद्यार्थ्यांसाठी गरजेची असलेली एसटी बससेवा मात्र अजून सुरू झालेली नाही.

अवजड वाहनांना या पुलावरून जाण्याची परवानगी मिळते, मग फक्त विद्यार्थ्यांच्या एसटी बसलाच अडथळा का, असा संतप्त सवाल विद्यार्थी, पालक आणि प्रवासी विचारत आहेत.

पुलाचे काम अर्धवट असल्यामुळे सोनगाव, आर्डे, बेलावडे, कुडाळ, नेवेकरवाडी, करंदोशी, गोपाळपंताची वाडी आणि पानस परिसरातील विद्यार्थ्यांना मोठ्या अडचणींना तोंड द्यावे लागत आहे. एसटी बससेवा पूर्वीसारखी सुरू नसल्याने शाळा-कॉलेजमध्ये वेळेवर पोहोचणे त्यांना कठीण झाले आहे. त्यामुळे खासगी वाहनांचा आधार घ्यावा लागत आहे आणि त्याचा अतिरिक्त आर्थिक भार पालकांवर पडत आहे.

सध्या परीक्षा सुरू होत असल्याने विद्यार्थ्यांची धावपळ आणखीनच वाढली आहे. अशा वेळी मेढा एसटी आगाराने विद्यार्थ्यांच्या अडचणींकडे गांभीर्याने पाहावे आणि मेढा येथून पाचवडच्या दिशेने जाणारी एसटी बससेवा तातडीने सुरू करावी, अशी मागणी पालक आणि विद्यार्थ्यांकडून जोर धरू लागली आहे.

पुलामुळे आजही कुडाळ-हुमगाव-आखाडे मार्गे वळसा घालून प्रवास करावा लागतो. त्यामुळे विद्यार्थी, पालक, दररोज मेढ्याकडे जाणारे शासकीय कर्मचारी आणि व्यावसायिक या सर्वांचा वेळ आणि पैसा दोन्ही वाया जात आहे. पुलाचे काम पूर्णत्वाकडे जात असताना मेढा एसटी महामंडळ बससेवा सुरू करण्याबाबत ठोस निर्णय का घेत नाही, असाही प्रश्न लोक विचारत आहेत.

पुलावरून वाहतूक सुरू करण्यासाठी आवश्यक असलेली सुरक्षिततेची तपासणी आणि संबंधित यंत्रणेची परवानगी पूर्ण झाली असेल, तर मेढा एसटी महामंडळाने विनाविलंब बससेवा सुरू करण्यासाठी पुढाकार घ्यावा, अशी अपेक्षा व्यक्त होत आहे. पुलावरून एसटी चालवणे अजून सुरक्षित नसेल, तर पर्यायी मार्गाने विद्यार्थ्यांना दिलासा देणारी व्यवस्था करावी, अशीही मागणी आहे.

विद्यार्थ्यांचे शिक्षण आणि परीक्षेचा प्रश्न लक्षात घेता सार्वजनिक बांधकाम विभाग प्रशासन आणि मेढा एसटी महामंडळाने केवळ आश्वासनांवर न थांबता प्रत्यक्ष कार्यवाही करावी, अशी मागणी होत आहे. एसटी महामंडळ विद्यार्थ्यांच्या अडचणींची दखल घेऊन बससेवा नेमकी कधी सुरू करणार, याकडे संपूर्ण कुडाळ परिसराचे लक्ष लागले आहे.