जावळीत दारूबंदी असतानाही विक्री, उत्पादन शुल्क विभागाची आठ ठिकाणी छापेमारी

राज्यात दारूबंदीचा प्रयोग म्हणून ओळखल्या जाणाऱ्या जावळी तालुक्यात पुन्हा एकदा अवैध मद्यविक्रीचा मुद्दा समोर आला आहे. राज्य उत्पादन शुल्क विभागाने २१ सप्टेंबर रोजी तालुक्यातील वेगवेगळ्या गावांमध्ये अचानक छापे टाकले. या कारवाईत आठ संशयितांविरुद्ध गुन्हे दाखल करण्यात आले असून देशी-विदेशी दारू आणि बिअरसह एकूण २९ हजार ५०० रुपयांचा मुद्देमाल जप्त करण्यात आला.

संपूर्ण जावळी तालुक्यात दारूबंदी लागू असतानाही काही भागांत छुप्या पद्धतीने दारू विकली जात असल्याच्या तक्रारी सातत्याने येत होत्या. या कारवाईमुळे दारूबंदीची अंमलबजावणी नीट होते का, हा प्रश्न पुन्हा उपस्थित झाला आहे. अवैध मद्यविक्री रोखण्याची जबाबदारी पोलीस आणि उत्पादन शुल्क विभाग या दोघांचीही असते, त्यामुळे या दोन्ही विभागांमध्ये समन्वय आहे की नाही, याविषयीही चर्चा सुरू झाली आहे.

जावळी तालुका दारूमुक्त करण्यासाठी काही वर्षांपूर्वी तिथल्या महिलांनी मोठे आंदोलन उभारले होते. त्यामुळे जावळीतील दारूबंदी हा केवळ प्रशासनाचा निर्णय न राहता एक सामाजिक चळवळ बनली होती. मात्र गेल्या काही काळापासून तालुक्यात चोरून दारू विकली जात असल्याच्या तक्रारी वारंवार पुढे येत आहेत.

उत्पादन शुल्क विभागाने बिभवी, मेढा, सोमर्डी, करहर, सोनगाव आणि आनेवाडी या भागांत ही कारवाई केली. बिभवीत आकाश आगलावे यांच्याकडून ५ हजार ४८० रुपयांची देशी दारू व बिअर जप्त करण्यात आली. मेढ्यात मयुरेश गोरे यांच्याकडून ४ हजार २०० रुपयांची तर गणेश विष्णू धनावडे यांच्याकडून २ हजार ८०० रुपयांची देशी दारू जप्त झाली. सोमर्डीत निरंजन साहेबराव परामणे यांच्याकडून २ हजार ४०० रुपयांची देशी दारू जप्त करण्यात आली. करहरमध्ये दिपाली रमेश गोळे यांच्याकडून ५ हजार ३४० रुपयांची देशी-विदेशी दारू आणि संभाजी रामचंद्र गोळे यांच्याकडून ३ हजार ३६० रुपयांची देशी दारू जप्त करण्यात आली. सोनगावात दिपक संजय शेवते यांच्याकडून २ हजार ८० रुपयांची, तर आनेवाडीत अनिल मुगुटराव फरांदे यांच्याकडून ३ हजार ८४० रुपयांची देशी दारू जप्त करण्यात आली. या सगळ्या कारवाईत मिळून एकूण २९ हजार ५०० रुपयांचा मुद्देमाल जप्त झाला.

उत्पादन शुल्क आयुक्त राजेश देशमुख यांनी जावळीतील अवैध मद्यविक्रीकडे विशेष लक्ष दिल्यानंतर विभागाने वेगाने कारवाई सुरू केल्याचे सांगितले जात आहे. यापूर्वी अवैध मद्यविक्रीच्या कारवाईवरून पोलीस आणि उत्पादन शुल्क विभाग एकमेकांवर जबाबदारी ढकलत असल्याची चर्चा होती. मात्र आता उत्पादन शुल्क विभागाने एकाच दिवशी आठ ठिकाणी कारवाई केल्याने दारूबंदीच्या अंमलबजावणीचा मुद्दा पुन्हा चर्चेत आला आहे.

अवैध व्यवसाय ज्या हद्दीत आढळेल, त्या भागातील संबंधित बिट अंमलदारावर कारवाई करण्याचे संकेत पोलीस प्रशासनाने आधीच दिले होते. त्यामुळे उत्पादन शुल्क विभागाने ज्या भागांत अवैध दारूविक्रीविरोधात कारवाई केली, त्या हद्दीतील बिट अंमलदारांवर पोलीस अधीक्षक पिंगळे कारवाई करणार का, हा प्रश्न आता उपस्थित होत आहे. याबाबत पोलीस प्रशासन पुढे काय भूमिका घेते, याकडे जावळीकरांचे लक्ष लागले आहे.