घुग्घुसजवळ ट्रकच्या धडकेत दुचाकीवरील तिघा तरुणांचा मृत्यू, चालकावर गुन्हा

घुग्घुस-चंद्रपूर मार्गावरील शेनगाव येथे सपरा पेट्रोल पंपाजवळ शुक्रवारी (६ नोव्हेंबर) पहाटे सुमारे ४.४५ वाजता भीषण अपघात झाला. ट्रकने दुचाकीला धडक दिली आणि त्यात दुचाकीवरील तिघा तरुणांचा मृत्यू झाला. यापैकी दोघांचा जागीच जीव गेला, तर तिसऱ्याचा चंद्रपूरच्या शासकीय रुग्णालयात उपचार सुरू असताना मृत्यू झाला.

अपघात इतका जोरदार होता की मृत तरुणांची दुचाकी अक्षरशः चक्काचूर झाली होती. तिघेही एकाच दुचाकीवरून प्रवास करत होते. समोरून आलेल्या भरधाव ट्रकने त्यांच्या दुचाकीला जोरात धडक दिली, असे सांगितले जाते.

पोलिसांनी सांगितल्यानुसार, अपघातानंतर ट्रकचालक गाडीसह घटनास्थळावरून फरार झाला. पोलिसांनी तपासाची चक्रे फिरवून त्याची ओळख पटवली असून त्याच्याविरोधात गुन्हा दाखल केला आहे.

या मार्गावर सध्या लॉईड्स मेटल कंपनीच्या पाइपलाइनचे काम सुरू आहे. त्यामुळे चंद्रपूरकडून घुग्घुसकडे जाणारा मार्ग बंद ठेवण्यात आला होता. परिणामी घुग्घुस ते चंद्रपूर या एकाच मार्गावरून दोन्ही बाजूंची वाहतूक सुरू होती.

मिळालेल्या माहितीनुसार, मृत तरुणांमध्ये गडचिरोली जिल्ह्यातील कोरची तालुक्यातील बोतेकसा येथील रहिवासी जयदीप श्रीराम हलामी आणि तनेश्वर कुमारसाय नांग यांचा समावेश आहे. तिसरे तरुण गोपाल बुधाराम नैताम हे छत्तीसगड जिल्ह्यातील मानपूर क्षेत्रातील आंबागड चौकी येथील रहिवासी होते. तिघे जण दुचाकी क्रमांक MH-33-AJ-9969 वरून घुग्घुसहून चंद्रपूरच्या दिशेने निघाले होते.

दिवाळी साजरी करण्यासाठी हे तिघे आपापल्या गावी निघाले होते, अशी माहिती समोर आली आहे. सणाच्या तोंडावरच त्यांच्यावर काळाने घाला घातल्याने तिन्ही कुटुंबांवर शोककळा पसरली आहे.

विरुद्ध दिशेने आलेल्या भरधाव ट्रकने समोरून धडक दिल्यानंतर जयदीप श्रीराम हलामी आणि तनेश्वर कुमारसाय नांग यांचा जागीच मृत्यू झाला. गोपाल नैताम गंभीर जखमी झाले होते. त्यांना तात्काळ चंद्रपूर येथील शासकीय रुग्णालयात दाखल करण्यात आले, मात्र उपचारादरम्यान डॉक्टरांनी त्यांना मृत घोषित केले.

पोलिसांनी ओळख पटवलेल्या आरोपी ट्रकचालकाचे नाव धर्मेंद्र उमराव प्रजापती (वय ३७ वर्षे) असे आहे. तो पडोली येथील पंकज झा ट्रान्सपोर्टमध्ये चालक म्हणून काम करतो. आरोपी मूळचा उत्तर प्रदेशातील फतेहपूर जिल्ह्यातील खागा तहसीलमधील एकडला येथील रहिवासी आहे. घुग्घुस पोलीस या अपघाताप्रकरणी पुढील कायदेशीर कारवाई आणि तपास करत आहेत.