मालतपूर आरोग्य केंद्र दोन खोल्यांतच; दसऱ्यापर्यंत कार्यवाही नाही तर उपोषण, वाडकरांचा इशारा

वाई तालुक्याच्या पश्चिम भागातील लोकांना आरोग्यसेवा देणारे मालतपूर प्राथमिक आरोग्य केंद्र सध्या गावच्या चावडीवरील फक्त दोन खोल्यांत चालू आहे. या केंद्रासाठी सुसज्ज इमारत उभारण्याचा प्रश्न अनेक वर्षांपासून रखडलेला आहे, त्यामुळे नागरिकांना अपुऱ्या सोयींमध्येच आरोग्यसेवा घ्यावी लागत आहे.

जागेचा ताबा आणि मोजणीची प्रक्रिया अडकल्यामुळे हा प्रश्न सुटत नाही, असा आरोप रोहित वाडकर यांनी केला आहे. जिल्हा परिषद प्रशासन राजकीय दबावाखाली काम करत असल्याचा आरोप करत त्यांनी इशारा दिला आहे की, दसऱ्यापर्यंत ठोस कार्यवाही झाली नाही तर नागरिकांसह आमरण उपोषण करणार.

मालतपूर प्राथमिक आरोग्य केंद्र हे वाई तालुक्याच्या पश्चिम भागातील नागरिकांसाठी महत्त्वाचे केंद्र आहे. तरीही सध्या ते गावच्या चावडीवरील अवघ्या दोन खोल्यांमध्ये चालते. वाढती गरज पाहता या केंद्राला स्वतंत्र आणि सुसज्ज इमारत मिळणे आवश्यक आहे, असे यात म्हटले आहे.

याबाबत सतत पाठपुरावा करूनही प्रशासन ठोस निर्णय घेत नाही, अशी खंत रोहित वाडकर यांनी व्यक्त केली. ग्रामीण भागातील लोकांच्या आरोग्याशी संबंधित प्रश्न अनेक वर्षे प्रलंबित राहणे दुर्दैवी आहे, असेही त्यांनी म्हटले आहे.

या सगळ्या प्रकरणाच्या केंद्रस्थानी मालतपूर येथील सर्व्हे क्रमांक ८७/३५ मधील जागा आहे. ही जागा जिल्हा परिषदेच्या मुख्य कार्यकारी अधिकारी यांच्या नावावर असल्याचे सांगितले जाते. मात्र प्रत्यक्ष ताबा मिळण्याची प्रक्रिया अजून पूर्ण झालेली नाही. जागेच्या मोजणीसाठी आरोग्य विभागाने ३ जुलै रोजी महसूल विभागाला पत्र दिले होते.

त्यानंतरही अपेक्षित कार्यवाही झाली नाही, असा आरोप वाडकर यांनी केला. जागेची मोजणी कधी होणार, ताबा कधी मिळणार आणि इमारत उभारण्याचे काम कधी सुरू होणार, याबद्दल प्रशासनाने स्पष्ट कालमर्यादा जाहीर करावी, अशी त्यांची मागणी आहे.

जिल्हा परिषदेच्या मुख्य कार्यकारी अधिकारी यशनी नागराजन यांच्या कार्यपद्धतीबद्दलही वाडकर यांनी प्रश्न उपस्थित केले आहेत. अधिकारी आणि तालुका आरोग्य विभागावर राजकीय दबाव आणला जात असल्याने कामात अडथळे येत आहेत, असा त्यांचा आरोप आहे.

याआधी याच प्रश्नावरून एकमेकांवर टीका करणारे मकरंद आबा आणि दिनकर शिंदे आता एकत्र असतानाही आरोग्य केंद्राचा प्रश्न सुटलेला नाही, अशी टीकाही त्यांनी केली. प्रशासनाने नुसती आश्वासने न देता प्रत्यक्ष कामाला सुरुवात करावी, अशी त्यांची मागणी आहे. दसऱ्यापर्यंत ठोस निर्णय आणि कार्यवाही झाली नाही, तर पश्चिम भागातील नागरिकांना सोबत घेऊन आमरण उपोषण सुरू करण्याचा इशारा वाडकर यांनी दिला आहे.