वाईच्या महागणपती घाटावर खासगी पार्किंगचा कारभार; वाहनांच्या रांगा, नगरपालिकेकडे अधिकृत पार्किंगची मागणी

वाई शहरातील महागणपती मंदिर परिसरातल्या गणपती घाटावर वाहतूक कोंडीचा प्रश्न दिवसेंदिवस गंभीर होत चालला आहे. मंदिरासमोरच्या जागेत खासगी पार्किंग व्यवस्था आहे आणि तिचा नाहक त्रास नागरिकांना सहन करावा लागतो, अशा तक्रारी स्थानिक नागरिक करत आहेत. या त्रासामुळे नागरिक आणि भाविक दोघेही अडचणीत आले आहेत.

वाहन पार्किंगमध्ये घ्यायचे तर आधी पावती करावी लागते. ती प्रक्रिया पूर्ण होईपर्यंत वाहने रस्त्यावरच उभी राहतात आणि तिथे रांग लागते. त्यामुळे वाहतुकीचा बोजवारा उडतो, असे चित्र या भागात वारंवार पाहायला मिळत आहे.

महागणपती मंदिरासमोरचा हा परिसर वाई शहरातला अतिशय वर्दळीचा भाग आहे. रस्त्याकडेला वाहनांची गर्दी वाढली की काही वेळातच कोंडी गंभीर होते. खासगी पार्किंगमुळे सार्वजनिक रस्त्यावर खोळंबा होत असेल, तर नगरपालिकेने या व्यवस्थेची तातडीने तपासणी करावी आणि काही नियमबाह्य आढळले तर कायदेशीर कारवाई करावी, अशी नागरिकांची मागणी आहे.

या परिसरात वाहतूक नियंत्रणासाठी होमगार्ड तैनात आहेत. पण वाहनचालक त्यांच्या सूचना अपेक्षेप्रमाणे ऐकत नाहीत, अशा तक्रारी आहेत. त्यामुळे वाहने अस्ताव्यस्त उभी राहतात आणि थोड्याच वेळात रस्त्यावर कोंडी होते. फक्त होमगार्ड उभे केल्याने प्रश्न सुटणार नाही. वाहतुकीचे नियोजन, पार्किंगची शिस्त आणि नियमांची प्रभावी अंमलबजावणी गरजेची आहे, असे म्हटले जात आहे.

कायमस्वरूपी तोडगा म्हणून नगरपालिकेने नदीक्षेत्रातील उपलब्ध जागेचा नियोजनपूर्वक वापर करून अधिकृत पार्किंग उभारावी, ही मागणी आता जोर धरू लागली आहे. असे झाले तर मुख्य रस्त्यावरचा वाहनांचा भार कमी होईल, मंदिर परिसरातील वाहतूक सुरळीत होईल आणि अधिकृत पार्किंग शुल्कातून नगरपालिकेलाही उत्पन्नाचा स्रोत मिळू शकेल.

वाईच्या पर्यटन आणि धार्मिक वैभवाचा केंद्रबिंदू असलेल्या महागणपती परिसरातच नागरिकांना पार्किंग आणि कोंडीचा सामना करावा लागत असेल, तर प्रशासनाने ही बाब गांभीर्याने घेण्याची वेळ आली आहे. खासगी पार्किंगमुळे सार्वजनिक वाहतूक विस्कळीत होत असेल, तर त्याची जबाबदारी निश्चित करण्याची गरज आहे.

नगरपालिका, पोलीस प्रशासन आणि संबंधित यंत्रणांनी एकत्र येऊन या परिसराची पाहणी करावी. पार्किंगचे नियमन, वाहतूक नियंत्रण आणि पर्यायी पार्किंगची व्यवस्था याबाबत ठोस निर्णय घ्यावा, असे नागरिकांना वाटते. नाहीतर महागणपती घाटावरील कोंडीचा फास दिवसेंदिवस अधिक घट्ट होण्याची शक्यता आहे, अशी भावना स्थानिक नागरिक व्यक्त करत आहेत.