कॉकपिटमध्ये चाकूहल्ला, गंभीर जखमी असतानाही मुंबईच्या कॅप्टन स्मित मच्छार यांनी वाचवले 180 प्रवाशांचे प्राण

फ्लायदुबईच्या एका विमानात आकाशात उड्डाण सुरू असताना कॉकपिटमध्येच चाकूहल्ला झाला. हजारो फूट उंचीवर विमान उडत होते आणि आत शेकडो प्रवासी आरामात प्रवास करत होते. अशा वेळी अचानक कॉकपिटमध्ये रक्ताचा सडा पडेल असा हिंसक हल्ला झाला. या संकटात मुंबईचे कॅप्टन स्मित मच्छार स्वतः गंभीर जखमी असतानाही त्यांनी विमान सुरक्षितपणे आपत्कालीन लँडिंग करून उतरवले आणि विमानातील 180 प्रवाशांचे प्राण वाचले. मृत्यूच्या दाढेतून या प्रवाशांना सुखरूप बाहेर काढून त्यांनी अतुलनीय शौर्य दाखवले आहे.

हे विमान फ्लायदुबईचे FZ1073 होते आणि ते दुबईहून तेल अवीवच्या दिशेने जात होते. रिपोर्ट्सनुसार, विमानाच्या सह-वैमानिकाने कॉकपिटमध्येच कॅप्टन स्मित मच्छार यांच्यावर अचानक चाकूने प्राणघातक हल्ला केला.

या अचानक झालेल्या हल्ल्यामुळे कॉकपिटमधील नियंत्रण सुटले. अवघ्या 37 सेकंदांत विमान तब्बल 14,300 फूट खाली आले. विमानातले प्रवासी प्रचंड घाबरले आणि सगळीकडे घबराट पसरली.

अंगावर रक्त आणि गंभीर जखमा असतानाही कॅप्टन मच्छार यांनी हार मानली नाही. त्यांनी विमानाचे नियंत्रण पुन्हा आपल्या हातात घेतले. इतर कर्मचाऱ्यांच्या मदतीने आरोपी सह-वैमानिकाला जागेवरच रोखण्यात आले. त्यानंतर विमान तातडीने सऊदी अरबच्या ताबुक (Tabuk) येथे सुखरूप उतरवण्यात आले.

कॅप्टन स्मित मच्छार हे मूळचे मुंबईचे आहेत आणि अनुभवी व्यावसायिक वैमानिक आहेत. बोईंग 737 विमानांच्या वेगवेगळ्या प्रकारांवर त्यांच्याकडे 9,750 तासांपेक्षा जास्त उड्डाणाचा अनुभव आहे. संकटाच्या वेळी त्यांनी दाखवलेली समयसूचकता आणि धैर्य हे त्यांच्या या मोठ्या अनुभवाचे फळ मानले जात आहे.

मच्छार यांनी जवळपास 11 वर्षे स्पाइसजेटमध्ये काम केले. त्यानंतर जून 2022 मध्ये ते डायरेक्ट-एंट्री कॅप्टन म्हणून फ्लायदुबईत रुजू झाले. ते लाईन ट्रेनिंग कॅप्टन म्हणूनही काम करतात, म्हणजे नव्या पायलटना ते प्रशिक्षण देतात.

स्वतःचा जीव धोक्यात असताना आणि शरीरातून रक्तस्त्राव होत असतानाही 180 प्रवाशांचे प्राण वाचवणाऱ्या या मुंबईकर वीराचे आता जगभरात कौतुक होत आहे. पंतप्रधान नरेंद्र मोदी यांनी त्यांच्या धाडसाची दखल घेतली आणि 1 ऑक्टोबर 2026 रोजी एक्सवर (X) संदेश दिला. मोदी यांनी म्हटले आहे, "कॅप्टन स्मित मच्छार हे हिरो आहेत. अत्यंत गंभीर धोक्यातही आणि गंभीर जखमी असतानाही त्यांनी इतरांचे प्राण वाचवण्यासाठी प्रचंड धैर्य आणि अढळ जिद्द दाखवली. त्यांच्या शौर्यामुळे शेकडो जणांचे प्राण वाचले आणि एक मोठी दुर्घटना टळली. भारताला कॅप्टन मच्छार यांचा अभिमान आहे. ते लवकर बरे व्हावेत, त्यांना नवी ताकद आणि उत्तम आरोग्य लाभावे, यासाठी मी प्रार्थना करतो."