कॉकपिटमध्ये चाकूहल्ला होऊनही कॅप्टन स्मित माछार लढले; मोदी, ट्रम्प, नेत्यानाहूंकडून कौतुक

भारतीय वंशाचे कॅप्टन स्मित माछार (Smit Machchhar) यांच्या शौर्याची चर्चा सध्या जगभर सुरू आहे. दुबईहून इस्रायलच्या तेल अवीवला निघालेल्या फ्लायदुबईच्या (Flydubai) विमानात कॉकपिटमध्ये त्यांच्यावर जीवघेणा हल्ला झाला. तरीही स्वतःच्या प्राणाची पर्वा न करता त्यांनी शेकडो प्रवाशांचे प्राण वाचवले.

विमानातील ओमानचा सह-वैमानिक विमानाचा ताबा घेऊन ते क्रॅश करण्याच्या तयारीत होता, असे सांगितले जाते. त्याने अचानक कॅप्टन माछार यांच्यावर चाकूने वार केले. त्यात माछार गंभीर जखमी झाले.

फ्लायदुबईचे FZ1073 हे विमान उड्डाणानंतर 34,000 फीट उंचीवर असताना नियंत्रण कक्षाला अचानक '7700' हा स्क्वॉक कोड पाठवण्यात आला. काही वेळातच विमानाने '7500' हा कोड प्रसारित केला. हा कोड साधारणपणे विमान हायजॅक झाल्यास किंवा कोणत्याही बेकायदेशीर हस्तक्षेपाच्या वेळी वापरला जातो.

गंभीर जखमी असतानाही माछार यांनी प्रतिकार केला आणि बाहेरून मदत मिळावी म्हणून कॉकपिटचा दरवाजा उघडला. विमानात इस्रायलचे 150 प्रवासी होते. हायजॅकिंगच्या शक्यतेमुळे सगळीकडे खळबळ उडाली. विमानाने मार्ग बदलून सौदी अरेबियाच्या दिशेने वळण घेतले आणि सुरक्षेसाठी इस्रायली फायटर जेट्स तातडीने पोहोचून विमानाला एस्कॉर्ट करत राहिले.

दरवाजा उघडताच एक इस्रायली प्रवासी मदतीसाठी धावला. त्याने थेट कॉकपिटमध्ये शिरून हल्ला करणाऱ्या सह-वैमानिकाला सीटवरून खाली खेचले. त्यानंतर इतर प्रवासी आणि केबिन क्रूने त्याला पूर्णपणे ताब्यात घेतले.

अमेरिकेचे अध्यक्ष डोनाल्ड ट्रम्प यांनी माध्यमांना सांगितले की, त्या प्रवाशाला हे सगळे कसे जमले असे विचारले गेले, तेव्हा तो 'एयर डिजास्टर्स' या टीव्ही शोचा मोठा चाहता असल्याचे त्याने सांगितले. तो शो पाहून विमान नियंत्रणाची काही मूलभूत माहिती त्याला मिळाली होती. नंतर अतिरिक्त वैमानिकांनी विमानाचे नियंत्रण सांभाळले आणि जखमी कॅप्टन माछार यांनी सौदी अरेबियाच्या तबुक (Tabuk) विमानतळावर विमान सुरक्षितपणे आपत्कालीन लँडिंग करून उतरवले.

पंतप्रधान नरेंद्र मोदी यांनी 'एक्स'वर (X) संदेश टाकून माछार यांना सलाम केला. ते म्हणाले, "कॅप्टन स्मित माछार हे खरे हिरो आहेत. अत्यंत गंभीर धोक्याचा सामना करावा लागलेला असताना आणि स्वतः गंभीर जखमी झालेले असतानाही, त्यांनी इतरांचे प्राण वाचवण्यासाठी असीम धैर्य आणि अटूट संकल्प दाखवला. त्यांच्या वीरतेमुळे शेकडो लोकांचे प्राण वाचले असून एक मोठी दुर्घटना टळली आहे. भारताला कॅप्टन माछार यांच्यावर गर्व आहे. ते लवकरात लवकर पूर्णपणे स्वस्थ व्हावेत आणि त्यांना उत्तम आरोग्य लाभावे, यासाठी मी प्रार्थना करतो."

इस्रायलचे पंतप्रधान बिन्यामिन नेत्यानाहू म्हणाले, "कॅप्टन स्मित माछार यांनी दाखवलेल्या अतुलनीय धैर्याबद्दल मी त्यांना नमन करतो. शरीरात धारदार शस्त्र खुपसले गेल्यामुळे गंभीररित्या जखमी होऊनही ते लढले, त्यांनी कडवा प्रतिकार केला आणि विमानाच्या कॉकपिटचा दरवाजा उघडला. यामुळे प्रवासी आणि क्रू मेंबर्सना मिळून हल्लेखोराला काबूत आणता आले आणि एक भीषण अनर्थ टळला. कॅप्टन माछार यांनी इस्रायली नागरिकांसह 174 प्रवाशांचे प्राण वाचवले आहेत. ते खरे नायकाचे प्रतीक आहेत."

ट्रम्प यांनीही प्रतिक्रिया दिली. चाकूच्या हल्ल्याने गंभीर आणि रक्ताने माखलेले असतानाही माछार यांनी कॉकपिटचा दरवाजा उघडून मदतीसाठी हाक दिली, अशा बिकट परिस्थितीत हार न मानणे आणि प्रसंगावधान दाखवणे असाधारण आहे, असे ते म्हणाले. सह-वैमानिकाच्या मनसुब्यांबद्दल ट्रम्प म्हणाले, "तो कदाचित दहशतवादी असावा किंवा कोणीतरी डोके फिरलेला सनकी असावा."

कॅप्टन माछार 2022 मध्ये फ्लायदुबईमध्ये वैमानिक म्हणून रुजू झाले. त्याआधी तब्बल 10 वर्षे ते स्पाइसजेटमध्ये (SpiceJet) पायलट होते. सध्या ते कुटुंबासह दुबईत राहतात. त्यांच्यावर रुग्णालयात उपचार सुरू असून प्रकृतीत वेगाने सुधारणा होत आहे. या घटनेचे गांभीर्य लक्षात घेऊन फ्लायदुबई एअरलाइनने इस्रायलहून येणाऱ्या आणि इस्रायलकडे जाणाऱ्या आपल्या सर्व उड्डाणांना तात्पुरती स्थगिती दिली आहे.